၄. ဥဒကရဟဒသုတ္တဝဏ္ဏနာ

၁၀၄. စတုတ္ထေ ဥဒကရဟဒေါ ဇဏ္ဏုကမတ္တေပိ ဥဒကေ သတိ ပဏ္ဏရသသမ္ဘိန္နဝဏ္ဏတ္တာ ဝါ ဗဟလတ္တာ ဝါ ဥဒကဿ အပညာယမာနတလော ဥတ္တာနော ဂမ္ဘီရောဘာသော နာမ ဟောတီတိ အာဟ ‘‘ပုရာဏပဏ္ဏရသ။ပေ။ ဂမ္ဘီရောဘာသော နာမာ’’တိ. တိပေါရိသစတုပေါရိသေ ပန ဥဒကေ သတိ အစ္ဆတ္တာ ဥဒကဿ ပညာယမာနတလော ဂမ္ဘီရော ဥတ္တာနောဘာသော နာမ ဟောတီတိ အာဟ ‘‘အစ္ဆဝိပ္ပသန္နမဏိဝဏ္ဏဥဒကော ဥတ္တာနောဘာသော နာမာ’’တိ. ဥဘယကာရဏသမ္ဘဝတော ပန ဣတရေ ဒွေ ဝေဒိတဗ္ဗာ. ပုဂ္ဂလေပိ ကိလေသုဿဒဘာဝတော ဂုဏဂမ္ဘီရတာယ စ အဘာဝတော ဂုဏဂမ္ဘီရာနံ သဒိသေဟိ အဘိက္ကမနာဒီဟိ ယုတ္တော ဥတ္တာနော ဂမ္ဘီရောဘာသော နာမ. ဣမိနာ နယေန သေသာ ဝေဒိတဗ္ဗာ.

ဥဒကရဟဒသုတ္တဝဏ္ဏနာ နိဋ္ဌိတာ.