၄. တတိယသမာဓိသုတ္တဝဏ္ဏနာ

၉၄. စတုတ္ထေ သဏ္ဌပေတဗ္ဗန္တိ သမ္မဒေဝ ဌပေတဗ္ဗံ. ယထာ ပန ဌပိတံ သဏ္ဌပိတံ ဟောတိ၊ တံ ဒဿေတုံ ‘‘သန္နိသာဒေတဗ္ဗ’’န္တိအာဒိ ဝုတ္တံ. တတ္ထ သန္နိသာဒေတဗ္ဗန္တိ သမာဓိပ္ပဋိပက္ခေ ကိလေသေ သန္နိသီဒါပေန္တေန စိတ္တံ ဂေါစရဇ္ဈတ္တေ သန္နိသီဒါပေတဗ္ဗန္တိ. ဧကောဒိ ကာတဗ္ဗန္တိ အဗျဂ္ဂဘာဝါပါဒနေန ဧကဂ္ဂံ ကာတဗ္ဗံ. သမာဒဟိတဗ္ဗန္တိ ယထာ အာရမ္မဏေ သုဋ္ဌု အပ္ပိတံ ဟောတိ၊ ဧဝံ သမ္မာ သမ္မဒေဝ အာဒဟိတဗ္ဗံ၊ သုဋ္ဌု အာရောပေတဗ္ဗံ သမာဟိတံ ကာတဗ္ဗန္တိ အတ္ထော.

တတိယသမာဓိသုတ္တဝဏ္ဏနာ နိဋ္ဌိတာ.