၇. ပုတ္တသုတ္တဝဏ္ဏနာ

၈၇. သတ္တမေ မ-ကာရော ပဒသန္ဓိကရော ‘‘အညမည’’န္တိအာဒီသု ဝိယ. နိစ္စလသမဏောတိ ထိရသမဏော. အဘိသိဉ္စိတဗ္ဗောတိ အဘိသေကောတိ ကမ္မသာဓနော အဘိသေကသဒ္ဒေါ. တေနာဟ ‘‘အဘိသေကံ ကာတုံ ယုတ္တော’’တိ.

ဗာကုလတ္ထေရော ဝိယာတိ ထေရော ဟိ မဟာယသဿီ၊ တဿ ပုတ္တဓီတရော နတ္တုပနတ္တကာ သုခုမသာဋကေဟိ စီဝရာနိ ကာရေတွာ ရဇာပေတွာ သမုဂ္ဂေ ပက္ခိပိတွာ ပဟိဏန္တိ. ထေရဿ နဟာနကာလေ နဟာနကောဋ္ဌကေ ဌပေန္တိ. ထေရော တာနိ နိဝါသေတိ စေဝ ပါရုပတိ စ. တေနေဝေတံ ဝုတ္တံ.

ခဒိရဝနမဂ္ဂေ သီဝလိတ္ထေရော ဝိယာတိ သတ္ထရိ ကိရ တံ မဂ္ဂံ ပဋိပန္နေ ဒေဝတာ ‘‘အမှာကံ အယျဿ သီဝလိတ္ထေရဿ သက္ကာရံ ကရိဿာမာ’’တိ စိန္တေတွာ ဧကေကယောဇနေ ဝိဟာရံ ကာရေတွာ ဧကယောဇနတော ဥဒ္ဓံ ဂန္တုံ အဒတွာ ပါတောဝ ဥဋ္ဌာယ ဒိဗ္ဗာနိ ယာဂုအာဒီနိ ဂဟေတွာ ‘‘အမှာကံ အယျော သီဝလိတ္ထေရော ကဟံ နိသိန္နော’’တိ ဝိစရန္တိ. ထေရော အတ္တနော အဘိဟဋံ ဗုဒ္ဓပ္ပမုခဿ ဘိက္ခုသံဃဿ ဒါပေသိ. ဧဝံ သတ္ထာ သပရိဝါရော တိံသယောဇနိကံ ကန္တာရံ သီဝလိတ္ထေရဿ ပုညဖလံ အနုဘဝမာနောဝ အဂမာသိ. တေနေဝေတံ ဝုတ္တံ.

အဋ္ဌကနာဂရသုတ္တေ အာနန္ဒတ္ထေရော ဝိယာတိ အဋ္ဌကနာဂရကော ကိရ ဂဟပတိ ထေရဿ ဓမ္မဒေသနာယ ပသီဒိတွာ ပဉ္စသတဂ္ဃနကံ ဝိဟာရံ ကာရေတွာ အဒါသိ. တံ သန္ဓာယေတံ ဝုတ္တံ.

ပိလိန္ဒဝစ္ဆတ္ထေရော ဝိယာတိ ထေရဿ ကိရ ဣဒ္ဓါနုဘာဝေန ပသန္နာ မနုဿာ သပ္ပိအာဒီနိ ဗဟူနိ ဘေသဇ္ဇာနိ အဘိဟရိံသု. ပကတိယာပိ စ အာယသ္မာ ပိလိန္ဒဝစ္ဆော လာဘီ ဟောတိ ပဉ္စန္နံ ဘေသဇ္ဇာနံ၊ လဒ္ဓံ လဒ္ဓံ ပရိသာယ ဝိဿဇ္ဇေတိ. တေနေတံ ဝုတ္တံ ‘‘ဂိလာနပစ္စယံ ပိလိန္ဒဝစ္ဆတ္ထေရော ဝိယာ’’တိ.

တိဏ္ဏမ္ပိ သန္နိပါတေန နိဗ္ဗတ္တာနီတိ ပိတ္တာဒီနံ တိဏ္ဏမ္ပိ ဝိသမာနံ သန္နိပါတေန ဇာတာနိ. အတိသီတာဒိဘာဝေန ဥတူနံ ပရိဏာမောတိ အာဟ ‘‘အတိသီတအတိဥဏှဥတုတော ဇာတာနီ’’တိ. ပုရိမဥတုတော ဝိသဒိသော ဥတု ဥတုပရိဏာမော၊ တတော ဇာတာနိ ဥတုပရိဏာမဇာနိ၊ ဝိသဘာဂဥတုတော ဇာတာနီတိ အတ္ထော. ဇင်္ဂလဒေသဝါသီနဉှိ အနူပဒေသေ ဝသန္တာနံ ဝိသဘာဂေါဝ ဥတု ဥပ္ပဇ္ဇတိ၊ အနူပဒေသဝါသီနဉ္စ ဇင်္ဂလဒေသေတိ. ဧဝံ မလယသမုဒ္ဒတီရာဒိဝသေနပိ ဥတုဝိသဘာဂတာ ဥပ္ပဇ္ဇတိယေဝ. တတော ဇာတာနိ ဥတုပရိဏာမဇာနိ နာမ.

အတ္တနော ပကတိစရိယာနံ ဝိသမံ ကာယဿ ပရိဟရဏဝသေန ဝိသမပရိဟာရဇာနိ. တာနိ ပန အစ္စာသနအတိဋ္ဌာနာဒိနာ ဝေဒိတဗ္ဗာနီတိ အာဟ ‘‘အစ္စာသနအတိဋ္ဌာနာဒိကာ’’တိ. အာဒိ-သဒ္ဒေန မဟာဘာရဝဟဏသုဓာကောဋ္ဋနအဒေသကာလစရဏာဒီနိ သင်္ဂဏှာတိ. ပရဿ ဥပက္ကမတော နိဗ္ဗတ္တာနိ ဩပက္ကမိကာနိ၊ အယံ စောရောတိ ဝါ ပါရဒါရိကောတိ ဝါ ဂဟေတွာ ဇဏ္ဏုကကပ္ပရမုဂ္ဂရာဒီဟိ နိပ္ပေါထနဥပက္ကမံ ပစ္စယံ ကတွာ ဥပ္ပန္နာနီတိ အတ္ထော. တေနာဟ ‘‘ဝဓဗန္ဓနာဒိဥပက္ကမေန နိဗ္ဗတ္တာနီ’’တိ. ကေဝလန္တိ ဗာဟိရံ ပစ္စယံ အနပေက္ခိတွာ ကေဝလံ၊ တေန ဝိနာတိ အတ္ထော. တေနာဟ ‘‘ပုဗ္ဗေကတကမ္မဝိပါကဝသေနေဝ ဇာတာနီ’’တိ.

ပုတ္တသုတ္တဝဏ္ဏနာ နိဋ္ဌိတာ.