၅. နိဝေသကသုတ္တဝဏ္ဏနာ

၇၆. ပဉ္စမေ ကိစ္စကရဏီယေသု သဟဘာဝဋ္ဌေန အမာ ဟောန္တီတိ အမစ္စာ. ‘‘အယံ အဇ္ဈတ္တိကော’’တိ ဧဝံ ဇာနန္တိ၊ ဉာယန္တိ ဝါတိ ဉာတီ. သဿုသသုရပက္ခိကာတိ သဿုသသုရာ စ တပ္ပက္ခိကော စ သဿုသသုရပက္ခိကာ. လောဟိတေန သမ္ဗဒ္ဓါတိ သာလောဟိတာ. ပိတုပက္ခိကာ ဝါ ဉာတီ၊ မာတုပက္ခိကာ သာလောဟိတာ. မာတုပိတုပက္ခိကာ ဝါ ဉာတီ၊ သဿုသသုရပက္ခိကာ သာလောဟိတာ. အဝေစ္စ ရတနဿ ဂုဏေ ယာထာဝတော ဉတွာ ပသာဒေါ အဝေစ္စပ္ပသာဒေါ. သော ပန ယသ္မာ မဂ္ဂေနာဂတတ္တာ ကေနစိ အကမ္ပနီယော စ အပ္ပဓံသိယော စ ဟောတိ၊ တသ္မာ ဧဝံ ဝုတ္တံ ‘‘အစလပ္ပသာဒေါ’’တိ. ဘာဝညထတ္တန္တိ သဘာဝဿ အညထတ္တံ.

ဝီသတိယာ ကောဋ္ဌာသေသူတိ ကေသာဒိမတ္ထလုင်္ဂပရိယန္တေသု. ဒွါဒသသု ကောဋ္ဌာသေသူတိ ပိတ္တာဒိမုတ္တပရိယန္တေသု. စတူသု ကောဋ္ဌာသေသူတိ ‘‘ယေန စ သန္တပ္ပတိ၊ ယေန စ ဇီရီယတိ၊ ယေန စ ပရိဒယှတိ၊ ယေန စ အသိတပီတခါယိတသာယိတံ သမ္မာ ပရိဏာမံ ဂစ္ဆတီ’’တိ (မ. နိ. ၁.၃၀၄) ဧဝံ ဝုတ္တေသု စတူသု ကောဋ္ဌာသေသု. ဆသု ကောဋ္ဌာသေသူတိ ‘‘ဥဒ္ဓင်္ဂမာ ဝါတာ၊ အဓောဂမာ ဝါတာ၊ ကုစ္ဆိသယာ ဝါတာ၊ ကောဋ္ဌာသယာ ဝါတာ၊ အင်္ဂမင်္ဂါနုသာရိနော ဝါတာ၊ အဿာသော ပဿာသော’’တိ (မ. နိ. ၂.၃၀၅) ဧဝံ ဝုတ္တေသု ဆသု ကောဋ္ဌာသေသု. ဝိတ္ထမ္ဘနံ သေသဘူတတ္တယသန္ထမ္ဘိတတာပါဒနံ၊ ‘‘ဥပကီဠန’’န္တိ ဧကေ. သေသံ သုဝိညေယျမေဝ.

နိဝေသကသုတ္တဝဏ္ဏနာ နိဋ္ဌိတာ.