၅. ကေသမုတ္တိသုတ္တဝဏ္ဏနာ

၆၆. ပဉ္စမေ ကေသမုတ္တံ နိဝါသော ဧတေသန္တိ ကေသမုတ္တိယာတိ အာဟ ‘‘ကေသမုတ္တနိဂမဝါသိနော’’တိ. အဋ္ဌဝိဓပါနကာနီတိ အမ္ဗပါနာဒိအဋ္ဌဝိဓာနိ ပါနာနိ.

‘‘မာ အနုဿဝေနာ’’တိအာဒီသု ပန ဧကော ဒဟရကာလတော ပဋ္ဌာယ ဧဝံ အနုဿဝေါ အတ္ထိ၊ ဧဝံ စိရကာလကတာယ အနုဿုတိယာ လဗ္ဘမာနံ ကထမိဒံ အညထာ သိယာ၊ တသ္မာ ဘူတမေတန္တိ အနုဿဝေန ဂဏှာတိ၊ တထာ ဂဟဏံ ပဋိက္ခိပန္တော ‘‘မာ အနုဿဝေနာ’’တိ အာဟ. အနု အနု သဝနံ အနုဿဝေါ. အပရော ‘‘အမှာကံ ပိတုပိတာမဟာဒိဝုဒ္ဓါနံ ဥပဒေသပရမ္ပရာယ ဣဒမာဘတံ၊ ဧဝံ ပရမ္ပရာဘတကထံ နာမ န အညထာ သိယာ၊ တသ္မာ ဘူတမေတ’’န္တိ ဂဏှာတိ၊ တံ ပဋိက္ခိပန္တော ‘‘မာ ပရမ္ပရာယာ’’တိ အာဟ. ဧကော ကေနစိ ကိသ္မိဉ္စိ ဝုတ္တမတ္တေ ‘‘ဧဝံ ကိရ ဧတ’’န္တိ ဂဏှာတိ၊ တံ နိသေဓေန္တော ‘‘မာ ဣတိကိရာယာ’’တိ အာဟ. ပိဋကံ ဂန္ထော သမ္ပဒီယတိ ဧတဿာတိ ပိဋကသမ္ပဒါနံ၊ ဂန္ထဿ ဥဂ္ဂဏှနကော. တေန ပိဋကဥဂ္ဂဏှနကဘာဝေန ဧကစ္စော တာဒိသံ ဂန္ထံ ပဂုဏံ ကတွာ တေန တံ သမေန္တံ သမေတိ၊ တသ္မာ ‘‘ဘူတမေတ’’န္တိ ဂဏှာတိ၊ တံ သန္ဓာယေသ ပဋိက္ခေပေါ ‘‘မာ ပိဋကသမ္ပဒါနေနာ’’တိ၊ အတ္တနော ဥဂ္ဂဟဂန္ထသမ္ပတ္တိယာ မာ ဂဏှိတ္ထာတိ ဝုတ္တံ ဟောတိ. သမေတန္တိ သံဂတံ.

ကောစိ ကဉ္စိ ဝိတက္ကေန္တော ‘‘ဧဝမေဝ တေန ဘဝိတဗ္ဗ’’န္တိ ကေဝလံ အတ္တနော သင်္ကပ္ပဝသေန ‘‘ဘူတမိဒ’’န္တိ ဂဏှာတိ၊ တံ သန္ဓာယေတံ ဝုတ္တံ ‘‘မာ တက္ကဟေတူ’’တိ. အညော ‘‘ဣမာယ ယုတ္တိယာ ဘူတမိဒ’’န္တိ ကေဝလံ အနုမာနတော နယဂ္ဂါဟေန ဂဏှာတိ၊ တံ ပဋိက္ခိပန္တော ‘‘မာ နယဟေတူ’’တိ အာဟ. ကဿစိ ‘‘ဧဝမေတံ သိယာ’’တိ ပရိကပ္ပေန္တဿ ဧကံ ကာရဏံ ဥပဋ္ဌာတိ၊ သော ‘‘အတ္ထေတ’’န္တိ အတ္တနော ပရိကပ္ပိတာကာရေန ဂဏှာတိ၊ တံ ပဋိသေဓေန္တော ‘‘မာ အာကာရပရိဝိတက္ကေနာ’’တိ အာဟ. အပရဿ စိန္တယတော ယထာပရိကပ္ပိတံ ကဉ္စိ အတ္ထံ ‘‘ဧဝမေတံ န အညထာ’’တိ အဘိနိဝိသန္တဿ ဧကာ ဒိဋ္ဌိ ဥပ္ပဇ္ဇတိ. ယာ ယဿ တံ ကာရဏံ နိဇ္ဈာယန္တဿ ပစ္စက္ခံ ဝိယ နိရူပေတွာ စိန္တေန္တဿ ခမတိ. သော ‘‘အတ္ထေတ’’န္တိ ဒိဋ္ဌိနိဇ္ဈာနက္ခန္တိယာ ဂဏှာတိ၊ တံ သန္ဓာယာဟ ‘‘မာ ဒိဋ္ဌိနိဇ္ဈာနက္ခန္တိယာ’’တိ.

အကုသလဝေရဿာတိ ပါဏာတိပါတာဒိပဉ္စဝိဓံ ဝေရံ သန္ဓာယ ဝဒတိ. ကောဓော နာမ စေတသော ဒုက္ခန္တိ အာဟ ‘‘ကောဓစိတ္တဿ အဘာဝေနာ’’တိ. ကိလေသဿာတိ စိတ္တံ ဝိဗာဓေန္တဿ ဥပတာပေန္တဿ ဥဒ္ဓစ္စကုက္ကုစ္စာဒိကိလေသဿ. သေသမေတ္ထ ဥတ္တာနမေဝ.

ကေသမုတ္တိသုတ္တဝဏ္ဏနာ နိဋ္ဌိတာ.