၃. ဝေနာဂပုရသုတ္တဝဏ္ဏနာ

၆၄. တတိယေ ဧဝံနာမကေ ဇနပဒေတိ ယတ္ထ နာမဂ္ဂဟဏေန ကောသလသဒ္ဒဿ ရုဠှီသဒ္ဒတံ ဒဿေတိ. တထာ ဟိ ကောသလာ နာမ ဇာနပဒိနော ရာဇကုမာရာ၊ တေသံ နိဝါသော ဧကောပိ ဇနပဒေါ ရုဠှီသဒ္ဒေန ‘‘ကောသလာ’’တိ ဝုစ္စတိ. အက္ခရစိန္တကာ ဟိ ဤဒိသေသု ဌာနေသု ယုတ္တေ ဝိယ သလိင်္ဂဝစနာနိ (ပါဏိနိ ၁.၂.၅၁) ဣစ္ဆန္တိ. အယမေတ္ထ ရုဠှီ ယထာ အညတ္ထာပိ ‘‘ကုရူသု ဝိဟရတိ၊ အင်္ဂေသု ဝိဟရတီ’’တိ စ. တဗ္ဗိသေသနေ ပန ဇနပဒသဒ္ဒေ ဇာတိသဒ္ဒေ ဧကဝစနမေဝ ယထာ ‘‘ကောသလေသု ဇနပဒေ’’တိ. စာရိကန္တိ စရဏံ. စရဏံ ဝါ စာရော၊ သော ဧဝ စာရိကာ. တယိဒံ မဂ္ဂဂမနံ ဣဓာဓိပ္ပေတံ၊ န စုဏ္ဏိကဂမနမတ္တန္တိ အာဟ ‘‘အဒ္ဓါနဂမနံ ဂစ္ဆန္တော’’တိ. တံ ဝိဘာဂေန ဒဿေတုံ ‘‘စာရိကာ စ နာမေသာ’’တိအာဒိ ဝုတ္တံ. တတ္ထ ဒူရေပီတိ ဒူရေပိ နာတိဒူရေပိ. သဟသာ ဂမနန္တိ သီဃဂမနံ. မဟာကဿပပစ္စုဂ္ဂမနာဒီသူတိ အာဒိ-သဒ္ဒေန အာဠဝကာဒီနံ အတ္ထာယ ဂမနံ သင်္ဂဏှာတိ. ဘဂဝါ ဟိ မဟာကဿပတ္ထေရံ ပစ္စုဂ္ဂစ္ဆန္တော မုဟုတ္တေန တိဂါဝုတမဂ္ဂမဂမာသိ. အာဠဝကဿတ္ထာယ တိံသယောဇနံ၊ တထာ အင်္ဂုလိမာလဿ၊ ပုက္ကုသာတိဿ ပန ပဉ္စစတ္တာလီသယောဇနံ၊ မဟာကပ္ပိနဿ ဝီသယောဇနသတံ၊ ဓနိယဿတ္ထာယ သတ္တ ယောဇနသတာနိ၊ ဓမ္မသေနာပတိနော သဒ္ဓိဝိဟာရိကဿ ဝနဝါသိဿ တိဿသာမဏေရဿ တိဂါဝုတာဓိကံ ဝီသယောဇနသတံ အဂမာသိ. ဣမံ သန္ဓာယာတိ ဣမံ အတုရိတစာရိကံ သန္ဓာယ.

ဥပလဘိံသူတိ ဧတ္ထ သဝနဝသေန ဥပလဘိံသူတိ ဣမမတ္ထံ ဒဿေန္တော ‘‘သောတဒွါရ။ပေ။ ဇာနိံသူ’’တိ အာဟ. သဗ္ဗမ္ပိ ဝါကျံ အဝဓာရဏဖလတ္တာ အန္တောဂဓာဝဓာရဏန္တိ အာဟ ‘‘ပဒပူရဏမတ္တေ ဝါ နိပါတော’’တိ. အဝဓာရဏတ္ထေနာတိ ပန ဣမိနာ ဣဋ္ဌတ္ထတောဝဓာရဏတ္ထံ ခေါ-သဒ္ဒဂ္ဂဟဏန္တိ ဒဿေတိ. အဿောသီတိ ပဒံ ခေါ-သဒ္ဒေ ဂဟိတေ တေန ဖုလ္လိတမဏ္ဍိတဝိဘူသိတံ ဝိယ ဟောန္တံ ပူရိတံ နာမ ဟောတိ၊ တေန စ ပုရိမပစ္ဆိမပဒါနိ သံသိလိဋ္ဌာနိ နာမ ဟောန္တိ၊ န တသ္မိံ အဂ္ဂဟိတေတိ အာဟ ‘‘ပဒပူရဏေန ဗျဉ္ဇနသိလိဋ္ဌတာမတ္တမေဝါ’’တိ. မတ္တသဒ္ဒေါ ဝိသေသနိဝတ္တိအတ္ထော. တေနဿ အနတ္ထန္တရဒီပနတာ ဒဿိတာ ဟောတိ၊ ဧဝသဒ္ဒေန ပန ဗျဉ္ဇနသိလိဋ္ဌတာယ ဧကန္တိကတာ.

သမိတပါပတ္တာတိ အစ္စန္တံ အနဝသေသတော သဝါသနံ သမိတပါပတ္တာ. ဧဝဉှိ ဗာဟိရကဝီတရာဂသေက္ခာသေက္ခပါပသမနတော ဘဂဝတော ပါပသမနံ ဝိသေသိတံ ဟောတိ. တေနဿ ယထာဘူတဂုဏာဓိဂတမေတံ နာမံ ယဒိဒံ သမဏောတိ ဒီပေတိ. အနေကတ္ထတ္တာ နိပါတာနံ ဣဓ အနုဿဝတ္ထော အဓိပ္ပေတောတိ အာဟ ‘‘ခလူတိ အနုဿဝတ္ထေ နိပါတော’’တိ. အာလပနမတ္တန္တိ ပိယာလာပဝစနမတ္တံ. ပိယသမုဒါဟာရာ ဟေတေ ‘‘ဘော’’တိ ဝါ ‘‘အာဝုသော’’တိ ဝါ ‘‘ဒေဝါနံ ပိယာ’’တိ ဝါ. ဂေါတ္တဝသေနာတိ ဧတ္ထ ဂံ တာယတီတိ ဂေါတ္တံ. ဂေါတမောတိ ဟိ ပဝတ္တမာနံ ဝစနံ ဗုဒ္ဓိဉ္စ တာယတိ ဧကံသိကဝိသယတာယ ရက္ခတီတိ ဂေါတ္တံ. ယထာ ဟိ ဗုဒ္ဓိ အာရမ္မဏဘူတေန အတ္ထေန ဝိနာ န ဝတ္တတိ၊ တထာ အဘိဓာနံ အဘိဓေယျဘူတေန၊ တသ္မာ သော ဂေါတ္တသင်္ခါတော အတ္ထော တာနိ တာယတိ ရက္ခတီတိ ဝုစ္စတိ. ကော ပန သောတိ? အညကုလပရမ္ပရာသာဓာရဏံ တဿ ကုလဿ အာဒိပုရိသသမုဒါဂတံ တံကုလပရိယာပန္နသာဓာရဏံ သာမညရူပန္တိ ဒဋ္ဌဗ္ဗံ. ဧတ္ထ စ သမဏောတိ ဣမိနာ ပရိက္ခကဇနေဟိ ဘဂဝတော ဗဟုမတဘာဝေါ ဒဿိတော သမိတပါပတာကိတ္တနတော. ဂေါတမောတိ ဣမိနာ လောကိယဇနေဟိ ဥစ္စာကုလသမ္ဘူတတာ ဒီပိတာ တေန ဥဒိတောဒိတဝိပုလခတ္တိယကုလဝိဘာဝနတော. သဗ္ဗခတ္တိယာနဉှိ အာဒိဘူတမဟာသမ္မတမဟာရာဇတော ပဋ္ဌာယ အသမ္ဘိန္နံ ဥဠာရတမံ သကျရာဇကုလံ.

ကေနစိ ပါရိဇုညေနာတိ ဉာတိပါရိဇုညဘောဂပါရိဇုညာဒိနာ ကေနစိပိ ပါရိဇုညေန ပရိဟာနိယာ အနဘိဘူတော အနဇ္ဈောတ္ထဋော. တထာ ဟိ တဿ ကုလဿ န ကိဉ္စိ ပါရိဇုညံ လောကနာထဿ အဘိဇာတိယံ၊ အထ ခေါ ဝဍ္ဎိယေဝ. အဘိနိက္ခမနေ စ တတောပိ သမိဒ္ဓတမဘာဝေါ လောကေ ပါကဋော ပညာတောတိ. သကျကုလာ ပဗ္ဗဇိတောတိ ဣဒံ ဝစနံ ဘဂဝတော သဒ္ဓါပဗ္ဗဇိတဘာဝဒီပနံ ဝုတ္တံ မဟန္တံ ဉာတိပရိဝဋ္ဋံ မဟန္တဉ္စ ဘောဂက္ခန္ဓံ ပဟာယ ပဗ္ဗဇိတဘာဝသိဒ္ဓိတော.

ဣတ္ထမ္ဘူတာချာနတ္ထေတိ ဣတ္ထံ ဧဝံပကာရော ဘူတော ဇာတောတိ ဧဝံ ကထနတ္ထေ. ဥပယောဂဝစနန္တိ ‘‘အဗ္ဘုဂ္ဂတော’’တိ ဧတ္ထ အဘိ-သဒ္ဒေါ ဣတ္ထမ္ဘူတာချာနတ္ထဇောတကော၊ တေန ယောဂတော ‘‘တံ ခေါ ပန ဘဝန္တ’’န္တိ ဣဒံ သာမိအတ္ထေ ဥပယောဂဝစနံ. တေနာဟ ‘‘တဿ ခေါ ပန ဘောတော ဂေါတမဿာတိ အတ္ထော’’တိ. ကလျာဏဂုဏသမန္နာဂတောတိ ကလျာဏေဟိ ဂုဏေဟိ ယုတ္တော၊ တန္နိဿိတော တဗ္ဗိသယတာယာတိ အဓိပ္ပါယော. သေဋ္ဌောတိ ဧတ္ထာပိ ဧသေဝ နယော. ကိတ္တေတဗ္ဗတော ကိတ္တိ၊ သာ ဧဝ သဒ္ဒနီယတော သဒ္ဒေါတိ အာဟ ‘‘ကိတ္တိသဒ္ဒေါတိ ကိတ္တိယေဝါ’’တိ. အဘိတ္ထဝနဝသေန ပဝတ္တော သဒ္ဒေါ ထုတိဃောသော. သဒေဝကံ လောကံ အဇ္ဈောတ္ထရိတွာ ဥဂ္ဂတောတိ အနညသာဓာရဏေ ဂုဏေ အာရဗ္ဘ ပဝတ္တတ္တာ သဒေဝကံ လောကံ အဇ္ဈောတ္ထရိတွာ အဘိဘဝိတွာ ဥဂ္ဂတော.

သော ဘဂဝါတိ ယော သော သမတိံသ ပါရမိယော ပူရေတွာ သဗ္ဗကိလေသေ ဘဉ္ဇိတွာ အနုတ္တရံ သမ္မာသမ္ဗောဓိံ အဘိသမ္ဗုဒ္ဓေါ ဒေဝါနံ အတိဒေဝေါ သက္ကာနံ အတိသက္ကော ဗြဟ္မာနံ အတိဗြဟ္မာ လောကနာထော ဘာဂျဝန္တတာဒီဟိ ကာရဏေဟိ သဒေဝကေ လောကေ ‘‘ဘဂဝါ’’တိ ပတ္ထဋကိတ္တိသဒ္ဒေါ၊ သော ဘဂဝါ. ‘‘ဘဂဝါ’’တိ စ ဣဒံ သတ္ထု နာမကိတ္တနံ. တေနာဟ အာယသ္မာ ဓမ္မသေနာပတိ ‘‘ဘဂဝါတိ နေတံ နာမံ မာတရာ ကတ’’န္တိအာဒိ (မဟာနိ. ၈၄). ပရတော ပန ဘဂဝါတိ ဂုဏကိတ္တနံ. ယထာ ကမ္မဋ္ဌာနိကေန ‘‘အရဟ’’န္တိအာဒီသု နဝသု ဌာနေသု ပစ္စေကံ ဣတိ-သဒ္ဒံ ယောဇေတွာ ဗုဒ္ဓဂုဏာ အနုဿရိယန္တိ၊ ဧဝံ ဗုဒ္ဓဂုဏသံကိတ္တနေနပီတိ ဒဿေန္တော ‘‘ဣတိပိ အရဟံ ဣတိပိ သမ္မာသမ္ဗုဒ္ဓေါ။ပေ။ ဣတိပိ ဘဂဝါ’’တိ အာဟ. ‘‘ဣတိပေတံ ဘူတံ ဣတိပေတံ တစ္ဆ’’န္တိအာဒီသု (ဒီ. နိ. ၁.၆) ဝိယ ဣဓ ဣတိသဒ္ဒေါ အာသန္နပစ္စက္ခကရဏတ္ထော၊ ပိ-သဒ္ဒေါ သမ္ပိဏ္ဍနတ္ထော၊ တေန စ တေသံ ဂုဏာနံ ဗဟုဘာဝေါ ဒီပိတော၊ တာနိ စ သံကိတ္တေန္တေန ဝိညုနာ စိတ္တဿ သမ္မုခီဘူတာနေဝ ကတွာ သံကိတ္တေတဗ္ဗာနီတိ ဒဿေန္တော ‘‘ဣမိနာ စ ဣမိနာ စ ကာရဏေနာတိ ဝုတ္တံ ဟောတီ’’တိ အာဟ. ဧဝံ နိရူပေတွာ ကိတ္တေန္တော ယော ကိတ္တေတိ၊ တဿ ဘဂဝတိ အတိဝိယ အဘိပ္ပသာဒေါ ဟောတိ.

အာရကတ္တာတိ သုဝိဒူရတ္တာ. အရီနန္တိ ကိလေသာရီနံ. အရာနန္တိ သံသာရစက္ကဿ အရာနံ. ဟတတ္တာတိ ဝိဒ္ဓံသိတတ္တာ. ပစ္စယာဒီနန္တိ စီဝရာဒိပစ္စယာနဉ္စေဝ ပူဇာဝိသေသာနဉ္စ. တတောတိ ဝိသုဒ္ဓိမဂ္ဂတော (ဝိသုဒ္ဓိ. ၁.၁၂၅-၁၂၇). ယထာ စ ဝိသုဒ္ဓိမဂ္ဂတော၊ ဧဝံ တံသံဝဏ္ဏနာတောပိ နေသံ ဝိတ္ထာရော ဂဟေတဗ္ဗော.

ဣမံ လောကန္တိ နယိဒံ မဟာဇနဿ သမ္မုခမတ္တံ သန္ဓာယ ဝုတ္တံ၊ အထ ခေါ အနဝသေသံ ပရိယာဒါယာတိ ဒဿေတုံ ‘‘သဒေဝက’’န္တိအာဒိ ဝုတ္တံ. တေနာဟ ‘‘ဣဒါနိ ဝတ္တဗ္ဗံ နိဒဿေတီ’’တိ. ပဇာတတ္တာတိ ယထာသကံ ကမ္မကိလေသေဟိ နိဗ္ဗတ္တတ္တာ. ပဉ္စကာမာဝစရဒေဝဂ္ဂဟဏံ ပါရိသေသနယေန ဣတရေသံ ပဒန္တရေန ဂဟိတတ္တာ. သဒေဝကန္တိ စ အဝယဝေန ဝိဂ္ဂဟော သမုဒါယော သမာသတ္ထော. ဆဋ္ဌကာမာဝစရဒေဝဂ္ဂဟဏံ ပစ္စာသတ္တိနယေန. တတ္ထ ဟိ သော ဇာတော တန္နိဝါသီ စ. သဗြဟ္မကဝစနေန ဗြဟ္မကာယိကာဒိဗြဟ္မဂ္ဂဟဏန္တိ ဧတ္ထာပိ ဧသေဝ နယော. ပစ္စတ္ထိကသမဏဗြာဟ္မဏဂ္ဂဟဏန္တိ နိဒဿနမတ္တမေတံ အပစ္စတ္ထိကာနံ သမိတဗာဟိတပါပါနဉ္စ သမဏဗြာဟ္မဏာနံ သမဏဗြာဟ္မဏဝစနေန ဂဟိတတ္တာ. ကာမံ ‘‘သဒေဝက’’န္တိအာဒိဝိသေသနာနံ ဝသေန သတ္တဝိသယော လောကသဒ္ဒေါတိ ဝိညာယတိ တုလျယောဂဝိသယတ္တာ တေသံ၊ ‘‘သလောမကော သပက္ခကော’’တိအာဒီသု ပန အတုလျယောဂေပိ အယံ သမာသော လဗ္ဘတီတိ ဗျဘိစာရဒဿနတော ပဇာဂဟဏန္တိ အာဟ ‘‘ပဇာဝစနေန သတ္တလောကဂ္ဂဟဏ’’န္တိ.

အရူပိနော သတ္တာ အတ္တနော အာနေဉ္ဇဝိဟာရေန ဝိဟရန္တာ ဒိဗ္ဗန္တီတိ ဒေဝါတိ ဣမံ နိဗ္ဗစနံ လဘန္တီတိ အာဟ ‘‘သဒေဝကဂ္ဂဟဏေန အရူပါဝစရလောကော ဂဟိတော’’တိ. တေနာဟ ‘‘အာကာသာနဉ္စာယတနူပဂါနံ ဒေဝါနံ သဟဗျတ’’န္တိ (အ. နိ. ၃.၁၁၇). သမာရကဂ္ဂဟဏေန ဆကာမာဝစရဒေဝလောကော ဂဟိတော တဿ သဝိသေသံ မာရဿ ဝသေ ဝတ္တနတော. သဗြဟ္မကဂ္ဂဟဏေန ရူပီဗြဟ္မလောကော ဂဟိတော အရူပီဗြဟ္မလောကဿ ဂဟိတတ္တာ. စတုပရိသဝသေနာတိ ခတ္တိယာဒိစတုပရိသဝသေန. ဣတရာ ပန စတဿော ပရိသာ သမာရကာဒိဂ္ဂဟဏေန ဂဟိတာ ဧဝါတိ. အဝသေသသတ္တလောကော နာဂဂရုဠာဒိဘေဒေါ. တီဟာကာရေဟီတိ ဒေဝမာရဗြဟ္မသဟိတတာသင်္ခါတေဟိ တီဟိ ပကာရေဟိ. တီသု ပဒေသူတိ ‘‘သဒေဝက’’န္တိအာဒီသု တီသု ပဒေသု. တေန တေနာကာရေနာတိ သဒေဝကတ္တာဒိနာ တေန တေန ပကာရေန. တေဓာတုကမေဝ ပရိယာဒိန္နန္တိ ပေါရာဏာ အာဟူတိ ယောဇနာ.

အဘိညာတိ ယကာရလောပေနာယံ နိဒ္ဒေသော၊ အဘိဇာနိတွာတိ အယမေတ္ထ အတ္ထောတိ အာဟ ‘‘အဘိညာယ အဓိကေန ဉာဏေန ဉတွာ’’တိ. အနုမာနာဒိပဋိက္ခေပေါတိ အနုမာနအတ္ထာပတ္တိအာဒိပ္ပဋိက္ခေပေါ ဧကပ္ပမာဏတ္တာ. သဗ္ဗတ္ထ အပ္ပဋိဟတဉာဏစာရတာယ ဟိ သဗ္ဗပစ္စက္ခာ ဗုဒ္ဓါ ဘဂဝန္တော.

အနုတ္တရံ ဝိဝေကသုခန္တိ ဖလသမာပတ္တိသုခံ. တေန ဝိမိဿာပိ ကဒါစိ ဘဂဝတော ဓမ္မဒေသနာ ဟောတီတိ ‘‘ဟိတွာပီ’’တိ ပိ-သဒ္ဒဂ္ဂဟဏံ. ဘဂဝါ ဟိ ဓမ္မံ ဒေသေန္တော ယသ္မိံ ခဏေ ပရိသာ သာဓုကာရံ ဝါ ဒေတိ၊ ယထာသုတံ ဝါ ဓမ္မံ ပစ္စဝေက္ခတိ၊ တံ ခဏံ ပုဗ္ဗဘာဂေန ပရိစ္ဆိန္ဒိတွာ ဖလသမာပတ္တိံ သမာပဇ္ဇတိ၊ ယထာပရိစ္ဆေဒဉ္စ သမာပတ္တိတော ဝုဋ္ဌာယ ဌိတဋ္ဌာနတော ပဋ္ဌာယ ဓမ္မံ ဒေသေတိ. အပ္ပံ ဝါ ဗဟုံ ဝါ ဒေသေန္တောတိ ဥဂ္ဃဋိတညုဿ ဝသေန အပ္ပံ ဝါ၊ ဝိပဉ္စိတညုဿ နေယျဿ ဝါ ဝသေန ဗဟုံ ဝါ ဒေသေန္တော. ဓမ္မဿ ကလျာဏတာ စ နိယျာနိကတာ စ သဗ္ဗသော အနဝဇ္ဇဘာဝေနေဝါတိ အာဟ ‘‘အနဝဇ္ဇမေဝ ကတွာ’’တိ.

ဒေသကာယတ္တေန အာဏာဒိဝိဓိနာ အတိသဇ္ဇနံ ပဗောဓနံ ဒေသနာတိ သာ ပရိယတ္တိဓမ္မဝသေန ဝေဒိတဗ္ဗာတိ အာဟ ‘‘ဒေသနာယ တာဝ စာတုပ္ပဒိကဂါထာယပီ’’တိအာဒိ. နိဒါနနိဂမာနိပိ သတ္ထု ဒေသနာယ အနုဝိဓာနတော တဒန္တောဂဓာနိ ဧဝါတိ အာဟ ‘‘နိဒါနံ အာဒိ၊ ဣဒမဝေါစာတိ ပရိယောသာန’’န္တိ.

သာသိတဗ္ဗပုဂ္ဂလဂတေန ယထာပရာဓာဒိသာသိတဗ္ဗဘာဝေန အနုသာသနံ တဒင်္ဂဝိနယာဒိဝသေန ဝိနယနံ သာသနန္တိ တံ ပဋိပတ္တိဓမ္မဝသေန ဝေဒိတဗ္ဗန္တိ အာဟ ‘‘သီလသမာဓိဝိပဿနာ’’တိအာဒိ. ကုသလာနန္တိ အနဝဇ္ဇဓမ္မာနံ သီလသမထဝိပဿနာနံ သီလဒိဋ္ဌီနဉ္စ အာဒိဘာဝေါ တံမူလိကတ္တာ ဥတ္တရိမနုဿဓမ္မာနံ. အရိယမဂ္ဂဿ အန္တဒွယဝိဂမေန မဇ္ဈိမာပဋိပဒါဘာဝေါ ဝိယ သမ္မာပဋိပတ္တိယာ အာရဗ္ဘ နိဗ္ဗတ္တီနံ ဝေမဇ္ဈတာပိ မဇ္ဈဘာဝေါတိ ဝုတ္တံ ‘‘အတ္ထိ၊ ဘိက္ခဝေ။ပေ။ မဇ္ဈိမံ နာမာ’’တိ. ဖလံ ပရိယောသာနံ နာမ သဥပါဒိသေသတာဝသေန. နိဗ္ဗာနံ ပရိယောသာနံ နာမ အနုပါဒိသေသတာဝသေန. ဣဒါနိ တေသံ ဒွိန္နမ္ပိ သာသနဿ ပရိယောသာနတံ အာဂမေန ဒဿေတုံ ‘‘တသ္မာတိဟ တွ’’န္တိအာဒိ ဝုတ္တံ. ‘‘သာတ္ထံ သဗျဉ္ဇန’’န္တိအာဒိဝစနတော ဓမ္မဒေသနာယ အာဒိမဇ္ဈပရိယောသာနံ အဓိပ္ပေတန္တိ အာဟ ‘‘ဣဓ။ပေ။ အဓိပ္ပေတ’’န္တိ. တသ္မိံ တသ္မိံ အတ္ထေ ကထာဝဓိသဒ္ဒပ္ပဗန္ဓော ဂါထာဝသေန သုတ္တဝသေန စ ဝဝတ္ထိတော ပရိယတ္တိဓမ္မော၊ သော ဣဓ ဒေသနာတိ ဝုတ္တော၊ တဿ ပန အတ္ထော ဝိသေသတော သီလာဒိ ဧဝါတိ အာဟ ‘‘ဘဂဝါ ဟိ ဓမ္မံ ဒေသေန္တော။ပေ။ ဒဿေတီ’’တိ. တတ္ထ သီလံ ဒဿေတွာတိ သီလဂ္ဂဟဏေန သသမ္ဘာရံ သီလံ ဂဟိတံ၊ တထာ မဂ္ဂဂ္ဂဟဏေန သသမ္ဘာရော မဂ္ဂေါတိ တဒုဘယဝသေန အနဝသေသတော ပရိယတ္တိအတ္ထံ ပရိယာဒါယ တိဋ္ဌတိ. တေနာတိ သီလာဒိဒဿနေန. အတ္ထဝသေန ဟိ ဣဓ ဒေသနာယ အာဒိကလျာဏာဒိဘာဝေါ အဓိပ္ပေတော. ကထိကသဏ္ဌိတီတိ ကထိကဿ သဏ္ဌာနံ ကထနဝသေန သမဝဋ္ဌာနံ.

န သော သာတ္ထံ ဒေသေတိ နိယျာနတ္ထဝိရဟတော တဿာ ဒေသနာယ. ဧကဗျဉ္ဇနာဒိယုတ္တာ ဝါတိ သိထိလာဒိဘေဒေသု ဗျဉ္ဇနေသု ဧကပ္ပကာရေနေဝ ဒွိပ္ပကာရေနေဝ ဝါ ဗျဉ္ဇနေန ယုတ္တာ ဒမိဠဘာသာ ဝိယ. ဝိဝဋကရဏတာယ ဩဋ္ဌေ အဖုသာပေတွာ ဥစ္စာရေတဗ္ဗတော သဗ္ဗနိရောဋ္ဌဗျဉ္ဇနာ ဝါ ကိရာတဘာသာ ဝိယ. သဗ္ဗဿေဝ ဝိဿဇ္ဇနီယယုတ္တတာယ သဗ္ဗဝိဿဋ္ဌဗျဉ္ဇနာ ဝါ ယဝနဘာသာ ဝိယ. သဗ္ဗဿေဝ သာနုသာရတာယ သဗ္ဗနိဂ္ဂဟိတဗျဉ္ဇနာ ဝါ ပါရသိကာဒိမိလက္ခဘာသာ ဝိယ. သဗ္ဗာပေသာ ဗျဉ္ဇနေကဒေသဝသေနေဝ ပဝတ္တိယာ အပရိပုဏ္ဏဗျဉ္ဇနာတိ ကတွာ ‘‘အဗျဉ္ဇနာ’’တိ ဝုတ္တာ.

ဌာနကရဏာနိ သိထိလာနိ ကတွာ ဥစ္စာရေတဗ္ဗံ အက္ခရံ ပဉ္စသု ဝဂ္ဂေသု ပဌမတတိယန္တိ ဧဝမာဒိ သိထိလံ. တာနိ အသိထိလာနိ ကတွာ ဥစ္စာရေတဗ္ဗံ အက္ခရံ ဝဂ္ဂေသု ဒုတိယစတုတ္ထန္တိ ဧဝမာဒိ ဓနိတံ. ဒွိမတ္တကာလံ ဒီဃံ. ဧကမတ္တကာလံ ရဿံ. တဒေဝ လဟုကံ လဟုကမေဝ. သံယောဂပရံ ဒီဃဉ္စ ဂရုကံ. ဌာနကရဏာနိ နိဂ္ဂဟေတွာ ဥစ္စာရေတဗ္ဗံ နိဂ္ဂဟိတံ. ပရေန သမ္ဗန္ဓံ ကတွာ ဥစ္စာရေတဗ္ဗံ သမ္ဗန္ဓံ. တထာ န သမ္ဗန္ဓံ ဝဝတ္ထိတံ. ဌာနကရဏာနိ ဝိဿဋ္ဌာနိ ကတွာ ဥစ္စာရေတဗ္ဗံ ဝိမုတ္တံ. ဒသဓာ ဗျဉ္ဇနဗုဒ္ဓိယာ ပဘေဒေါတိ ဧဝံ သိထိလာဒိဝသေန ဗျဉ္ဇနဗုဒ္ဓိယာ အက္ခရုပ္ပါဒကစိတ္တဿ ဒသပ္ပကာရေန ပဘေဒေါ. သဗ္ဗာနိ ဟိ အက္ခရာနိ စိတ္တသမုဋ္ဌာနာနိ ယထာဓိပ္ပေတတ္ထဗျဉ္ဇနတော ဗျဉ္ဇနာနိ စ.

အမက္ခေတွာတိ အမိလေစ္ဆေတွာ၊ အဝိနာသေတွာ၊ အဟာပေတွာတိ အတ္ထော. ဘဂဝါ ယမတ္ထံ ဉာပေတုံ ဧကဂါထံ ဧကဝါကျမ္ပိ ဒေသေတိ၊ တမတ္ထံ တာယ ဒေသနာယ ပရိမဏ္ဍလပဒဗျဉ္ဇနာယ ဧဝ ဒေသေတီတိ အာဟ ‘‘ပရိပုဏ္ဏဗျဉ္ဇနမေဝ ကတွာ ဓမ္မံ ဒေသေတီ’’တိ. ဣဓ ကေဝလသဒ္ဒေါ အနဝသေသဝါစကော၊ န အဝေါမိဿတာဒိဝါစကောတိ အာဟ ‘‘သကလာဓိဝစန’’န္တိ. ပရိပုဏ္ဏန္တိ သဗ္ဗသော ပုဏ္ဏံ. တံ ပန ကိဉ္စိ ဦနံ ဝါ အဓိကံ ဝါ န ဟောတီတိ ‘‘အနူနာဓိကဝစန’’န္တိ ဝုတ္တံ. တတ္ထ ယဒတ္ထံ ဒေသိတံ၊ တဿ သာဓကတ္တာ အနူနတာ ဝေဒိတဗ္ဗာ၊ တဗ္ဗိဓုရဿ ပန အသာဓကတ္တာ အနဓိကတာ. သကလန္တိ သဗ္ဗဘာဂဝန္တံ. ပရိပုဏ္ဏမေဝါတိ သဗ္ဗသော ပရိပုဏ္ဏမေဝ. တေနာဟ ‘‘ဧကဒေသနာပိ အပရိပုဏ္ဏာ နတ္ထီ’’တိ. အပရိသုဒ္ဓါ ဒေသနာ နာမ ဟောတိ တဏှာသံကိလေသတ္တာ. လောကာမိသံ စီဝရာဒယော ပစ္စယာ၊ တတ္ထ အဂဓိတစိတ္တတာယ လောကာမိသနိရပေက္ခော. ဟိတဖရဏေနာတိ ဟိတူပသံဟရဏေန. မေတ္တာဘာဝနာယ မုဒုဟဒယောတိ မေတ္တာဘာဝနာယ ကရုဏာယ ဝါ မုဒုဟဒယော. ဥလ္လုမ္ပနသဘာဝသဏ္ဌိတေနာတိ သကလသံကိလေသတော ဝဋ္ဋဒုက္ခတော စ ဥဒ္ဓရဏာကာရာဝဋ္ဌိတေန စိတ္တေန၊ ကရုဏာဓိပ္ပါယေနာတိ အတ္ထော. တသ္မာတိ ယသ္မာ သိက္ခတ္တယသင်္ဂဟံ သကလံ သာသနံ ဣဓ ဗြဟ္မစရိယန္တိ အဓိပ္ပေတံ၊ တသ္မာ. ဗြဟ္မစရိယန္တိ ဣမိနာ သမာနာဓိကရဏာနိ သဗ္ဗပဒါနိ ယောဇေတွာ အတ္ထံ ဒဿေန္တော ‘‘သော ဓမ္မံ ဒေသေတိ။ပေ။ ပကာသေတီတိ ဧဝမေတ္ထ အတ္ထော ဒဋ္ဌဗ္ဗော’’တိ အာဟ.

သုန္ဒရန္တိ ဘဒ္ဒကံ. ဘဒ္ဒကတာ စ ပဿန္တဿ ဟိတသုခါဝဟဘာဝေန ဝေဒိတဗ္ဗာတိ အာဟ ‘‘အတ္ထာဝဟံ သုခါဝဟ’’န္တိ. တတ္ထ အတ္ထာဝဟန္တိ ဒိဋ္ဌဓမ္မိကသမ္ပရာယိကပရမတ္ထသံဟိတဟိတာဝဟံ. သုခါဝဟန္တိ ယထာဝုတ္တတိဝိဓသုခါဝဟံ. တထာနုရူပါနန္တိ တာဒိသာနံ. ယာဒိသေဟိ ပန ဂုဏေဟိ ဘဂဝါ သမန္နာဂတော၊ တေဟိ စတုပ္ပမာဏိကဿ လောကဿ သဗ္ဗထာပိ အစ္စန္တပ္ပသာဒနီယော တေသံ ယထာဘူတသဘာဝတ္တာတိ ဒဿေန္တော ‘‘ယထာရူပေါ’’တိအာဒိမာဟ. တတ္ထ ယထာဘူတ။ပေ။ အရဟတန္တိ ဣမိနာ ဓမ္မပ္ပမာဏလူခပ္ပမာဏာနံ သတ္တာနံ ဘဂဝတော ပသာဒါဝဟတာ ဒဿိတာ၊ ဣတရေန ဣတရေသံ. ဒဿနမတ္တမ္ပိ သာဓု ဟောတီတိ ဧတ္ထ ကောသိယဝတ္ထု ကထေတဗ္ဗံ. ဥဘတောပက္ခိကာတိ မိစ္ဆာဒိဋ္ဌိသမ္မာဒိဋ္ဌိဝသေန ဥဘယပက္ခိကာ. ကေရာဋိကာတိ သဌာ.

အနေကတ္ထတ္တာ နိပါတာနံ ယာဝဉ္စိဒန္တိ နိပါတသမုဒါယော အဓိမတ္တပ္ပမာဏပရိစ္ဆေဒံ ဒီပေတီတိ အာဟ ‘‘အဓိမတ္တပ္ပမာဏပရိစ္ဆေဒဝစနမေတ’’န္တိ. အဓိမတ္တဝိပ္ပသန္နာနီတိ အဓိကပ္ပမာဏေန ဝိပ္ပသန္နာနိ. ဝိပ္ပသန္နာနီတိ စ ပကတိအာကာရံ အတိက္ကမိတွာ ဝိပ္ပသန္နာနီတိ အတ္ထော. နနု စ စက္ခာဒီနံ ဣန္ဒြိယာနံ မနောဝိညေယျတ္တာ ကထံ တေန တေသံ ဝိပ္ပသန္နတာ ဝိညာယတီတိ အာဟ ‘‘တဿ ဟီ’’တိအာဒိ. တဿာတိ ဗြာဟ္မဏဿ. တေသန္တိ စက္ခာဒီနံ ပဉ္စန္နံ ဣန္ဒြိယာနံ. ဧဝမ္ပိ မနိန္ဒြိယေန ပတိဋ္ဌိတောကာသဿ အဒိဋ္ဌတ္တာ ကထံ မနိန္ဒြိယဿ ဝိပ္ပသန္နတာ တေန ဝိညာယတီတိ အာဟ ‘‘ယသ္မာ ပနာ’’တိအာဒိ. နယဂ္ဂါဟပညာ ဟေသာ တဿ ဗြာဟ္မဏဿ. မနေ ဝိပ္ပသန္နေယေဝ ဟောတိ ပသန္နစိတ္တသမုဋ္ဌိတရူပသမ္ပဒါဟိ ဧဝ စက္ခာဒီနံ ပတိဋ္ဌိတောကာသဿ ပသန္နတာသမ္ဘဝတော.

ဇမ္ဗောနဒသုဝဏ္ဏံ ရတ္တဝဏ္ဏမေဝ ဟောတီတိ အာဟ ‘‘သုရတ္တဝဏ္ဏဿာ’’တိ. ဇမ္ဗောနဒသုဝဏ္ဏဿ ဃဋိကာတိ ဇမ္ဗောနဒသုဝဏ္ဏပိဏ္ဍံ. ဣမိနာ နေက္ခန္တိ နေက္ခပ္ပမာဏဇမ္ဗောနဒသုဝဏ္ဏေန ကတံ အကတဘဏ္ဍံ ဝုတ္တန္တိ ဒဿေတိ. နေက္ခန္တိ ဝါ အတိရေကပဉ္စသုဝဏ္ဏေန ကတပိလန္ဓနံ ကတဘဏ္ဍံ ဝုတ္တံ. တဉှိ ဃဋ္ဋနမဇ္ဇနက္ခမံ ဟောတီတိ. သုဝဏ္ဏန္တိ စ ပဉ္စဓရဏဿ သမညာ၊ တသ္မာ ပဉ္စဝီသတိဓရဏဟိရညဝိစိတံ အာဘရဏံ ဣဓ နေက္ခန္တိ အဓိပ္ပေတံ. ဇမ္ဗောနဒန္တိ မဟာဇမ္ဗုသာခါယ ပဝတ္တနဒိယံ နိဗ္ဗတ္တံ. တံ ကိရ ရတနံ ရတ္တံ. သုဝဏ္ဏာကာရေ မဟာဇမ္ဗုဖလရသေ ဝါ ပထဝိယံ ပဝိဋ္ဌေ သုဝဏ္ဏင်္ကုရာ ဥဋ္ဌဟန္တိ၊ တေန သုဝဏ္ဏေန ကတပိလန္ဓနန္တိပိ အတ္ထော. သုပရိကမ္မကတန္တိ သုဋ္ဌု ကတပရိကမ္မံ. သမ္ပဟဋ္ဌန္တိ သမ္မာ ပဟဋ္ဌံ ဃဋ္ဋနာဒိဝသေန သုကတပရိကမ္မံ. တေနာဟ ‘‘သုဝဏ္ဏကာရ။ပေ။ သုပရိမဇ္ဇိတန္တိ အတ္ထော’’တိ.

ဝါဠရူပါနီတိ အာဟရိမာနိ ဝါဠရူပါနိ. ‘‘အကပ္ပိယရူပါကုလော အကပ္ပိယမဉ္စော ပလ္လင်္ကောတိ သာရသမာသေ. ရတနစိတြန္တိ ဘိတ္တိစ္ဆေဒါဒိဝသေန ရတနစိတြံ. ရုက္ခတူလလတာတူလပေါဋကိတူလာနံ ဝသေန တိဏ္ဏံ တူလာနံ. ဥဒ္ဒလောမိယံ ကေစီတိ သာရသမာသာစရိယာ ဥတ္တရဝိဟာရိနော စ. တထာ ဧကန္တလောမိယံ. ကောသေယျကဋ္ဋိဿမယန္တိ ကောသေယျကသဋမယံ. အဇိနစမ္မေဟီတိ အဇိနမိဂစမ္မေဟိ. တာနိ ကိရ စမ္မာနိ သုခုမတရာနိ. တသ္မာ ဒုပဋ္ဋတိပဋ္ဋာနိ ကတွာ သိဗ္ဗန္တိ. တေန ဝုတ္တံ ‘‘အဇိနပ္ပဝေဏီ’’တိအာဒိ.

နိကာမလာဘီတိ ယထိစ္ဆိတလာဘီ. တေနာဟ ‘‘ဣစ္ဆိတိစ္ဆိတလာဘီ’’တိ. ဝိပုလလာဘီတိ ဥဠာရလာဘီ. ကသိရန္တိ ဟိ ပရိတ္တံ ဝုစ္စတိ၊ တပ္ပဋိက္ခေပေန အကသိရံ ဥဠာရံ. တေနာဟ ‘‘မဟန္တလာဘီ’’တိအာဒိ.

လဒ္ဓါ စ န ကပ္ပန္တီတိ သာမညေန ပဋိသိဒ္ဓတ္တာ သဗ္ဗထာ န ကပ္ပတီတိ ကဿစိ အာသင်္ကာ သိယာ၊ တန္နိဝတ္တနတ္ထံ ‘‘ကိဉ္စိ ကိဉ္စိ ကပ္ပတီ’’တိအာဒိမာဟ. တတ္ထ သုဒ္ဓကောသေယျန္တိ ရတနပရိသိဗ္ဗနရဟိတံ. ဧတ္ထ စ ‘‘သုဒ္ဓကောသေယျံ ပန ဝဋ္ဋတီ’’တိ ဝိနယေ (မဟာဝ. အဋ္ဌ. ၂၅၄) ဝုတ္တတ္တာ ဣဓာပိ ဧတ္တကမေဝ ဝုတ္တံ. ဒီဃနိကာယဋ္ဌကထာယံ (ဒီ. နိ. အဋ္ဌ. ၁.၁၅) ပန ‘‘ဌပေတွာ တူလိကံ သဗ္ဗာနေဝ ဂေါနကာဒီနိ ရတနပရိသိဗ္ဗိတာနိ န ဝဋ္ဋန္တီ’’တိ ဝုတ္တံ. တတ္ထ ‘‘ဌပေတွာ တူလိက’’န္တိ ဧတေန ရတနသိဗ္ဗနရဟိတာပီ တူလိကာ န ဝဋ္ဋတီတိ ဒီပေတိ. ဝစနတောတိ ဧတေန ဝိနယေ (စူဠဝ. ၂၉၇) ဝုတ္တဘာဝံ ဒဿေတိ. ဧကေန ဝိဓာနေနာတိ ယထာဝုတ္တမေဝ ဝိဓာနံ သန္ဓာယ ဝဒတိ. ယဒိ ဧဝံ ကသ္မာ ဘဂဝတာ ‘‘လဒ္ဓါ စ န ကပ္ပန္တီ’’တိ သာမညေန ပဋိသေဓော ကတောတိ အာဟ ‘‘အကပ္ပိယံ ပန ဥပါဒါယာ’’တိအာဒိ.

ပလ္လင်္ကန္တိ ဧတ္ထ ပရိ-သဒ္ဒေါ သမန္တတောတိ ဧတသ္မိံ အတ္ထေ ဝတ္တတိ၊ တသ္မာ ဝါမူရုံ ဒက္ခိဏူရုဉ္စ သမံ ဌပေတွာ ဥဘော ပါဒေ အညမညသမ္ဗန္ဓေ ကတွာ နိသဇ္ဇာ ပလ္လင်္ကန္တိ အာဟ ‘‘သမန္တတော ဦရုဗဒ္ဓါသန’’န္တိ. ဦရူနံ ဗန္ဓနဝသေန နိသဇ္ဇာ. ပလ္လင်္ကံ အာဘုဇိတွာတိ စ ယထာ ပလ္လင်္ကဝသေန နိသဇ္ဇာ ဟောတိ၊ ဧဝံ ဥဘော ပါဒေ အာဘုဇေ သမိဉ္ဇိတေ ကတွာတိ အတ္ထော. တံ ပန ဥဘိန္နံ ပါဒါနံ တထာ သမ္ဗန္ဓတာကရဏန္တိ အာဟ ‘‘ဗန္ဓိတွာ’’တိ. ဥဇုံ ကာယံ ပဏိဓာယာတိ ဥပရိမံ သရီရံ ဥဇုကံ ဌပေတွာ အဋ္ဌာရသ ပိဋ္ဌိကဏ္ဋကေ ကောဋိယာ ကောဋိံ ပဋိပါဒေတွာ. ဧဝဉှိ နိသိန္နဿ စမ္မမံသနှာရူနိ န ပဏမန္တိ. အထဿ ယာ တေသံ ပဏမနပစ္စယာ ခဏေ ခဏေ ဝေဒနာ ဥပ္ပဇ္ဇေယျုံ၊ တာ န ဥပ္ပဇ္ဇန္တိ. တာသု အနုပ္ပဇ္ဇမာနာသု စိတ္တံ ဧကဂ္ဂံ ဟောတိ၊ ကမ္မဋ္ဌာနံ န ပရိပတတိ၊ ဝုဒ္ဓိံ ဖာတိံ ဂစ္ဆတိ. တေနာဟ ‘‘အဋ္ဌာရသ ပိဋ္ဌိကဏ္ဋကေ’’တိအာဒိ. ဥဇုံ ကာယံ ဌပေတွာတိ ဥပရိမံ ကာယံ ဥဇုကံ ဌပေတွာ၊ အယမေဝ ဝါ ပါဌော. ဟေဋ္ဌိမကာယဿ ဟိ အနုဇုကဋ္ဌပနံ နိသဇ္ဇာဝစနေနေဝ ဗောဓိတန္တိ. ဥဇုံ ကာယန္တိ ဧတ္ထ ကာယ-သဒ္ဒေါ ဥပရိမကာယဝိသယော.

ပရိမုခန္တိ ဧတ္ထ ပရိ-သဒ္ဒေါ အဘိသဒ္ဒေန သမာနတ္ထောတိ အာဟ ‘‘ကမ္မဋ္ဌာနာဘိမုခ’’န္တိ၊ ဗဟိဒ္ဓါ ပုထုတ္တာရမ္မဏတော နိဝါရေတွာ ကမ္မဋ္ဌာနံယေဝ ပုရက္ခတွာတိ အတ္ထော. ဧတ္ထ ယထာ ‘‘ဝနန္တညေဝ ပဝိသာမီ’’တိအာဒိနာ ဘာဝနာနုရူပံ သေနာသနံ ဒဿိတံ၊ ဧဝံ ‘‘နိသီဒါမီ’’တိ ဣမိနာ အလီနာနုဒ္ဓစ္စပက္ခိယော သန္တော ဣရိယာပထော ဒဿိတော၊ ‘‘ပလ္လင်္ကံ အာဘုဇိတွာ’’တိ ဣမိနာ နိသဇ္ဇာယ ဒဠှဘာဝေါ၊ ‘‘ပရိမုခံ သတိံ ဥပဋ္ဌပေတွာ’’တိ ဣမိနာ အာရမ္မဏပရိဂ္ဂဟူပါယော. ပရိဂ္ဂဟိတနိယျာနန္တိ သဗ္ဗထာ ဂဟိတာသမ္မောသံ ပရိစ္စတ္တသမ္မောသံ သတိံ ကတွာ၊ ပရမသတိနေပက္ကံ ဥပဋ္ဌပေတွာတိ အတ္ထော. ပရီတိ ပရိဂ္ဂဟဋ္ဌော ‘‘ပရိဏာယိကာ’’တိအာဒီသု (ဓ. သ. ၁၆.၂၀) ဝိယ. မုခန္တိ နိယျာနဋ္ဌော ‘‘သုညတဝိမောက္ခ’’န္တိအာဒီသု (ပဋိ. မ. ၁.၂၀၉-၂၁၀) ဝိယ. ပဋိပက္ခတော နိဂ္ဂမနဋ္ဌော ဟိ နိယျာနဋ္ဌော.

စတ္တာရိ ရူပါဝစရဇ္ဈာနာနိ ဒိဗ္ဗဘာဝါဝဟတ္တာ ဒိဗ္ဗဝိဟာရာ နာမ ဟောန္တီတိ တဒါသန္နပ္ပဝတ္တစင်္ကမောပိ တဒုပစာရတော ဒိဗ္ဗော နာမ ဟောတီတိ အာဟ ‘‘စတ္တာရိ ဟိ ရူပဇ္ဈာနာနီ’’တိအာဒိ. သမာပဇ္ဇိတွာ စင်္ကမန္တဿာတိ ဣဒဉ္စ စင်္ကမန္တဿ အန္တရန္တရာ သမာပတ္တိံ သမာပဇ္ဇိတွာ ဥဋ္ဌာယုဋ္ဌာယ စင်္ကမနံ သန္ဓာယ ဝုတ္တံ. န ဟိ သမာပတ္တိံ သမာပဇ္ဇိတွာ အဝုဋ္ဌိတေန သက္ကာ စင်္ကမိတုံ. သမာပတ္တိတော ဝုဋ္ဌာယ စင်္ကမန္တဿပိ စင်္ကမောတိ ဣဒံ ပန သမာပတ္တိတော ဝုဋ္ဌဟိတွာ အန္တရန္တရာ သမာပဇ္ဇိတွာ စင်္ကမန္တဿ ဝသေန ဝုတ္တံ. ဒွီသုဝိဟာရေသူတိ ဗြဟ္မဝိဟာရေ၊ အရိယဝိဟာရေ စ. မေတ္တာဈာနာဒယော ဟိတူပသံဟာရာဒိဝသေန ပဝတ္တိယာ ဗြဟ္မဘူတာ သေဋ္ဌဘူတာ ဝိဟာရာတိ ဗြဟ္မဝိဟာရာ. အနညသာဓာရဏတ္တာ ပန အရိယာနံ ဝိဟာရာတိ အရိယဝိဟာရာ၊ စတဿောပိ ဖလသမာပတ္တိယော. ဣဓ ပန အရဟတ္တဖလသမာပတ္တိယေဝ အာဂတာ.

ပစ္စဝေက္ခဏာယ ဖလသမာပတ္တိ ကထိတာ သမာပတ္တိံ သမာပဇ္ဇိတွာ ဝုဋ္ဌိတဿ ပစ္စဝေက္ခဏာသမ္ဘဝတော. စင်္ကမာဒယောတိ ဖလသမာပတ္တိံ သမာပန္နဿပိ သမာပတ္တိတော ဝုဋ္ဌိတဿပိ စင်္ကမဋ္ဌာနနိသဇ္ဇာဒယော. အရိယစင်္ကမာဒယော ဟောန္တိ န ပန ပစ္စဝေက္ခန္တဿာတိ အဓိပ္ပါယော.

ဝေနာဂပုရသုတ္တဝဏ္ဏနာ နိဋ္ဌိတာ.