၃. အတ္ထဝသသုတ္တဝဏ္ဏနာ

၄၃. တတိယေ အတ္ထော နာမ ဖလံ၊ တံ ဧတဿ ဝသောတိ အတ္ထဝသော. ဟေတု၊ အတ္ထော ဧတဿ အတ္ထီတိ အတ္ထော၊ သော ဧဝါတိ အာဟ ‘‘တယော အတ္ထေ တီဏိ ကာရဏာနီ’’တိ. ဓမ္မဒေသနာ နာမ ဥက္ကဋ္ဌနိဒ္ဒေသေန စတုန္နံ အရိယသစ္စာနံ ပကာသနာတိ အာဟ ‘‘စတုသစ္စဓမ္မံ ပကာသေတီ’’တိ. အဋ္ဌကထံ ဉာဏေန ပဋိသံဝေဒီတိ ပါဠိပဒါနံ အတ္ထံ ဝိဝရဏဉာဏေန ပဋိ ပဋိ သံဝေဒနသီလော ‘‘အယံ ဣမဿ ဘာသိတဿ အတ္ထော’’တိ. ဧတေန အတ္ထပဋိသမ္ဘိဒါဗျာပါရမာဟ. ပါဠိဓမ္မံ ပဋိသံဝေဒီတိ ပါဠိဂတိံ ပါဠိံ ပဒဝိဝရဏံ ပဋိ ပဋိ သံဝေဒနသီလော. ဧတေန ဓမ္မပဋိသမ္ဘိဒါဗျာပါရမာဟ.

အတ္ထဝသသုတ္တဝဏ္ဏနာ နိဋ္ဌိတာ.