၆. ဒေဝဒူတသုတ္တဝဏ္ဏနာ

၃၆. ဆဋ္ဌေ ဒေဝဒူတာနီတိ လိင်္ဂဝိပလ္လာသံ ကတွာ ဝုတ္တန္တိ အာဟ ‘‘ဒေဝဒူတာ’’တိ၊ ဥဘယလိင်္ဂံ ဝါ ဧတံ ပဒံ၊ တသ္မာ နပုံသကလိင်္ဂဝသေန ပါဠိယံ ဝုတ္တဿ ပုလ္လိင်္ဂဝသေန အတ္ထဒဿနံ ကတံ. ဒေဝေါတိ မစ္စူတိ အဘိဘဝနဋ္ဌေန သတ္တာနံ အတ္တနော ဝသေ ဝတ္တာပနတော မစ္စုရာဇာ ‘‘ဒေဝေါ’’တိ ဝုစ္စတိ. ယထာ ဟိ ဒေဝေါ ပကတိသတ္တေ အဘိဘဝတိ၊ ဧဝံ မစ္စု သဗ္ဗသတ္တေ အဘိဘဝတိ၊ တသ္မာ ဒေဝေါ ဝိယာတိ ဒေဝေါ. ‘‘တဿ ဒူတာ’’တိ ဝတွာ ဣဒါနိဿ ဒူတေ တေသံ ဒူတဘာဝဉ္စ ဝိဘာဝေတုံ ‘‘ဇိဏ္ဏဗျာဓိမတာ ဟီ’’တိအာဒိ ဝုတ္တံ. တေန စောဒနတ္ထေန ဒေဝဿ ဒူတာ ဝိယာတိ ဒေဝဒူတာတိ ဒဿေတိ. ‘‘အဟံ အသုကံ ပမဒ္ဒိတုံ အာဂမိဿာမိ၊ တုဝံ တဿ ကေသေ ဂဟေတွာ မာ ဝိဿဇ္ဇေဟီ’’တိ မစ္စုဒေဝဿ အာဏာကရာ ဒူတာ ဝိယာတိ ဟိ ဒူတာတိ ဝုစ္စန္တိ.

ဣဒါနိ သဒ္ဓါတဗ္ဗဋ္ဌေန ဒေဝါ ဝိယ ဒူတာတိ ဒေဝဒူတာတိ ဒဿေန္တော ‘‘ဒေဝါ ဝိယ ဒူတာ’’တိအာဒိမာဟ. တတ္ထ အလင်္ကတပ္ပဋိယတ္တာယာတိ ဣဒံ အတ္တနော ဒိဗ္ဗာနုဘာဝံ အာဝိကတွာ ဌိတာယာတိ ဒဿနတ္ထံ ဝုတ္တံ. ဒေဝတာယ ဗျာကရဏသဒိသမေဝ ဟောတိ န စိရဿေဝ ဇရာဗျာဓိမရဏဿ သမ္ဘဝတော. ဝိသုဒ္ဓိဒေဝါနန္တိ ခီဏာသဝဗြဟ္မာနံ. တေ ဟိ စရိမဘဝေ ဗောဓိသတ္တာနံ ဇိဏ္ဏာဒိဘေဒံ ဒဿေန္တိ၊ တသ္မာ အန္တိမဘဝိကဗောဓိသတ္တာနံ ဝိသုဒ္ဓိဒေဝေဟိ ဥပဋ္ဌာပိတဘာဝံ ဥပါဒါယ တဒညေသမ္ပိ တေဟိ အနုပဋ္ဌာပိတာနမ္ပိ တထာ ဝေါဟရိတဗ္ဗတာ ပရိယာယသိဒ္ဓါတိ ဝေဒိတဗ္ဗာ. ဒိသွာဝါတိ ဝိသုဒ္ဓိဒေဝေဟိ ဒဿိတေ ဒိသွာဝ. တတောယေဝ ဟိ တေ ဝိသုဒ္ဓိဒေဝါနံ ဒူတာ ဝုတ္တာ.

ကသ္မာ အာရဒ္ဓန္တိ ကေဝလံ ဒေဝဒူတေ ဧဝ သရူပတော အဒဿေတွာတိ အဓိပ္ပါယော. ဒေဝါနံ ဒူတာနံ ဒဿနူပါယတ္တာ တထာ ဝုတ္တန္တိ ဒဿေန္တော ‘‘ဒေဝဒူတာ။ပေ။ သမနုယုဉ္ဇတီ’’တိ အာဟ. တတ္ထ ဒေဝဒူတာ။ပေ။ ဒဿနတ္ထန္တိ ဒေဝဒူတာနံ အနုယုဉ္ဇနဋ္ဌာနူပဂဿ ကမ္မဿ ဒဿနတ္ထံ.

ဧကစ္စေ ထေရာတိ အန္ဓကာဒိကေ ဝိညာဏဝါဒိနော စ သန္ဓာယ ဝဒတိ. နေရယိကေ နိရယေ ပါလေန္တိ တတော နိဂ္ဂန္တုံ အပ္ပဒါနဝသေန ရက္ခန္တီတိ နိရယပါလာ. အထ ဝါ နိရယပါလတာယ နေရယိကာနံ နိရယဒုက္ခေန ပရိယောနဒ္ဓါယ အလံ သမတ္ထာတိ နိရယပါလာ. တန္တိ ‘‘နတ္ထိ နိရယပါလာ’’တိ ဝစနံ. ပဋိသေဓိတမေဝါတိ ‘‘အတ္ထိ နိရယေသု နိရယပါလာ အတ္ထိ စ ကာရဏိကာ’’တိအာဒိနာ နယေန အဘိဓမ္မေ (ကထာ. ၈၆၆) ပဋိသေဓိတမေဝ. ယဒိ နိရယပါလာ နာမ န သိယုံ၊ ကမ္မကာရဏာပိ န ဘဝေယျ. သတိ ဟိ ကာရဏိကေ ကမ္မကာရဏာယ ဘဝိတဗ္ဗန္တိ အဓိပ္ပါယော. တေနာဟ ‘‘ယထာ ဟီ’’တိအာဒိ. ဧတ္ထာဟ – ‘‘ကိံ ပနေတေ နိရယပါလာ နေရယိကာ၊ ဥဒါဟု အနေရယိကာ’’တိ. ကိဉ္စေတ္ထ – ယဒိ တာဝ နေရယိကာ နိရယသံဝတ္တနိယေန ကမ္မေန နိဗ္ဗတ္တာ၊ သယမ္ပိ နိရယဒုက္ခံ ပစ္စနုဘဝေယျုံ၊ တထာ သတိ အညေသံ နေရယိကာနံ ဃာတနာယ အသမတ္ထာ သိယုံ၊ ‘‘ဣမေ နေရယိကာ ဣမေ နိရယပါလာ’’တိ ဝဝတ္ထာနဉ္စ န သိယာ. ယေ စ ယေ ဃာတေန္တိ၊ တေဟိ သမာနရူပဗလပ္ပမာဏေဟိ ဣတရေသံ ဘယသန္တာသာ န သိယုံ. အထ အနေရယိကာ၊ နေသံ တတ္ထ ကထံ သမ္ဘဝေါတိ? ဝုစ္စတေ – အနေရယိကာ နိရယပါလာ အနိရယဂတိသံဝတ္တနိယကမ္မနိဗ္ဗတ္တိတော. နိရယူပပတ္တိသံဝတ္တနိယကမ္မတော ဟိ အညေနေဝ ကမ္မုနာ တေ နိဗ္ဗတ္တန္တိ ရက္ခသဇာတိကတ္တာ. တထာ ဟိ ဝဒန္တိ သဗ္ဗတ္ထိဝါဒိနော –

‘‘ကောဓာ ကုရူရကမ္မန္တာ၊ ပါပါဘိရုစိနော တထာ၊

ဒုက္ခိတေသု စ နန္ဒန္တိ၊ ဇာယန္တိ ယမရက္ခသာ’’တိ.

တတ္ထ ယဒေကေ ဝဒန္တိ ‘‘ယာတနာဒုက္ခံ ပဋိသံဝေဒေယျုံ၊ အထ ဝါ အညမညံ ဃာတေယျု’’န္တိအာဒိ၊ တယိဒံ အသာရံ နိရယပါလာနံ နေရယိကဘာဝဿေဝ အဘာဝတော. ယဒိပိ အနေရယိကာ နိရယပါလာ၊ အယောမယာယ ပန အာဒိတ္တာယ သမ္ပဇ္ဇလိတာယ သဇောတိဘူတာယ နိရယဘူမိယာ ပရိက္ကမမာနာ ကထံ ဒါဟဒုက္ခံ နာနုဘဝန္တီတိ? ကမ္မာနုဘာဝတော. ယထာ ဟိ ဣဒ္ဓိမန္တော စေတောဝသိပ္ပတ္တာ မဟာမောဂ္ဂလ္လာနာဒယော နေရယိကေ အနုကမ္ပန္တာ ဣဒ္ဓိဗလေန နိရယဘူမိံ ဥပဂတာ ဒါဟဒုက္ခေန န ဗာဓီယန္တိ၊ ဧဝံ သမ္ပဒမိဒံ ဒဋ္ဌဗ္ဗံ.

ဣဒ္ဓိဝိသယဿ အစိန္တေယျဘာဝတောတိ စေ? ဣဒမ္ပိ တံသမာနံ ကမ္မဝိပါကဿ အစိန္တေယျဘာဝတော. တထာရူပေန ဟိ ကမ္မုနာ တေ နိဗ္ဗတ္တာ ယထာ နိရယဒုက္ခေန အဗာဓိတာ ဧဝ ဟုတွာ နေရယိကေ ဃာတေန္တိ၊ န စေတ္တကေန ဗာဟိရဝိသယာဘာဝေါ ယုဇ္ဇတိ ဣဋ္ဌာနိဋ္ဌတာယ ပစ္စေကံ ဒွါရပုရိသေသုပိ ဝိဘတ္တသဘာဝတ္တာ. တထာ ဟိ ဧကစ္စဿ ဒွါရဿ ပုရိသဿ စ ဣဋ္ဌံ ဧကစ္စဿ အနိဋ္ဌံ၊ ဧကစ္စဿ စ အနိဋ္ဌံ ဧကစ္စဿ ဣဋ္ဌံ ဟောတိ. ဧဝဉ္စ ကတွာ ယဒေကေ ဝဒန္တိ ‘‘နတ္ထိ ကမ္မဝသေန တေဇသာ ပရူပတာပန’’န္တိအာဒိ၊ တဒပါဟတံ ဟောတိ. ယံ ပန ဝဒန္တိ ‘‘အနေရယိကာနံ တေသံ ကထံ တတ္ထ သမ္ဘဝေါ’’တိ နိရယေ နေရယိကာနံ ယာတနာသဗ္ဘာဝဘာဝတော. နေရယိကသတ္တယာတနာယောဂ္ဂဉှိ အတ္တဘာဝံ နိဗ္ဗတ္တေန္တံ ကမ္မံ တာဒိသနိကန္တိ ဝိနာမိတံ နိရယဋ္ဌာနေ ဧဝ နိဗ္ဗတ္တေတိ. တေ ဟိ နေရယိကေဟိ အဓိကတရဗလာရောဟပရိဏာဟာ အတိဝိယ ဘယာနကဒဿနာ ကုရူရတရပယောဂါ စ ဟောန္တိ. ဧတေနေဝ တတ္ထ နေရယိကာနံ ဝိဗာဓကကာကသုနခါဒီနမ္ပိ နိဗ္ဗတ္တိယာ အတ္ထိဘာဝေါ သံဝဏ္ဏိတောတိ ဒဋ္ဌဗ္ဗော.

ကထမညဂတိကေဟိ အညဂတိကဗာဓနန္တိ စ န ဝတ္တဗ္ဗံ အညတ္ထာပိ တထာ ဒဿနတော. ယံ ပနေကေ ဝဒန္တိ ‘‘အသတ္တသဘာဝါ ဧဝ နိရယေ နိရယပါလာ နိရယေ သုနခါဒယော စာ’’တိ၊ တမ္ပေတေသံ မတိမတ္တံ အညတ္ထ တထာ အဒဿနတော. န ဟိ ကာစိ အတ္ထိ တာဒိသီ ဓမ္မပ္ပဝတ္တိ၊ ယာ အသတ္တသဘာဝါ၊ သမ္ပတိသတ္တေဟိ အပ္ပယောဇိတာ စ အတ္ထကိစ္စံ သာဓေန္တီ ဒိဋ္ဌပုဗ္ဗာ. ပေတာနံ ပါနီယနိဝါရကာနံ ဒဏ္ဍာဒိဟတ္ထာနဉ္စ ပုရိသာနံ သဗ္ဘာဝေ အသတ္တဘာဝေ စ ဝိသေသကာရဏံ နတ္ထီတိ တာဒိသာနံ သဗ္ဘာဝေ ကိံ ပါပကာနံ ဝတ္တဗ္ဗံ. သုပိနောပဃာတောပိ အတ္ထကိစ္စသမတ္ထတာယ အပ္ပမာဏံ ဒဿနာဒိမတ္တေနပိ တဒတ္ထသိဒ္ဓိတော. တထာ ဟိ သုပိနေ အာဟာရူပဘောဂါဒိနာ န အတ္ထသိဒ္ဓိ၊ ဣဒ္ဓိနိမ္မာနရူပံ ပနေတ္ထ လဒ္ဓပရိဟာရံ ဣဒ္ဓိဝိသယဿ အစိန္တေယျဘာဝတော. ဣဓာပိ ကမ္မဝိပါကဿ အစိန္တေယျဘာဝတောတိ စေ? တံ န၊ အသိဒ္ဓတ္တာ. နေရယိကာနံ ကမ္မဝိပါကော နိရယပါလာတိ သိဒ္ဓမေတ္တံ၊ ဝုတ္တနယေန ပါဠိတော စ တေသံ သတ္တဘာဝေါ ဧဝ သိဒ္ဓေါ. သက္ကာ ဟိ ဝတ္တုံ သတ္တသင်္ခါတာ နိရယပါလသညိတာ ဓမ္မပ္ပဝတ္တိ သာဘိသန္ဓိကပရူပဃာတိ အတ္ထကိစ္စသဗ္ဘာဝတော ဩဇာဟာရာဒိ ရက္ခသသန္တတိ ဝိယ. အဘိသန္ဓိပုဗ္ဗကတာ စေတ္ထ န သက္ကာ ပဋိက္ခိပိတုံ တထာ တထာ အဘိသန္ဓိယာ ဃာတနတော. တတော ဧဝ န သင်္ဃာတပဗ္ဗတေဟိ အနေကန္တိကတာ. ယေ ပန ဝဒန္တိ ‘‘ဘူတဝိသေသာ ဧဝ တေ ဝဏ္ဏသဏ္ဌာနာဒိဝိသေသဝန္တော ဘေရဝါကာရာ နရကပါလာတိ သမညံ လဘန္တီ’’တိ၊ တဒသိဒ္ဓံ ဥဇုကမေဝ ပါဠိယံ ‘‘အတ္ထိ နိရယေ နိရယပါလာ’’တိ ဝါဒဿ ပတိဋ္ဌာပိတတ္တာ.

အပိစ ယထာ အရိယဝိနယေ နရကပါလာနံ ဘူတမတ္တတာ အသိဒ္ဓါ၊ တထာ ပညတ္တိမတ္တဝါဒိနောပိ ဘူတမတ္တတာ အသိဒ္ဓါ သဗ္ဗသော ရူပဓမ္မာနံ အတ္ထိဘာဝဿေဝ အပ္ပဋိဇာနနတော. န ဟိ တဿ ဘူတာနိ နာမ ပရမတ္ထတော သန္တိ. ယဒိ ပရမတ္ထံ ဂဟေတွာ ဝေါဟရတိ၊ အထ ကသ္မာ စက္ခုရူပါဒီနိ ပဋိက္ခိပတီတိ? တိဋ္ဌတေသာ အနဝဋ္ဌိတတက္ကာနံ အပ္ပဟီနဝိပလ္လာသာနံ ဝါဒဝီမံသာ. ဧဝံ အတ္ထေဝ နိရယေ နိရယပါလာတိ နိဋ္ဌမေတ္ထ ဂန္တဗ္ဗံ. သတိ စ နေသံ သဗ္ဘာဝေ အသတိပိ ဗာဟိရေ ဝိသယေ နရကေ ဝိယ ဒေသာဒိနိယမော ဟောတီတိ ဝါဒေါ န သိဇ္ဈတိ၊ သတိ ဧဝ ပန ဗာဟိရေ ဝိသယေ ဒေသာဒိနိယမောတိ ဒဋ္ဌဗ္ဗံ.

ဒေဝဒူတသရာပနဝသေန သတ္တေ ယထူပစိတေ ပုညကမ္မေ ယမေတိ နိယမေတီတိ ယမော. တဿ ယမဿ ဝေမာနိကပေတာနံ ရာဇဘာဝတော ရညော. တေနာဟ ‘‘ယမရာဇာ နာမ ဝေမာနိကပေတရာဇာ’’တိ. ကမ္မဝိပါကန္တိ အကုသလကမ္မဝိပါကံ. ဝေမာနိကပေတာ ဟိ ကဏှသုက္ကဝသေန မိဿကံ ကမ္မံ ကတွာ ဝိနိပါတိကဒေဝတာ ဝိယ သုက္ကေန ကမ္မုနာ ပဋိသန္ဓိံ ဂဏှန္တိ. တထာ ဟိ မဂ္ဂဖလဘာဂိနောပိ ဟောန္တိ၊ ပဝတ္တိယံ ပန ကမ္မာနုရူပံ ကဒါစိ ပုညဖလံ၊ ကဒါစိ အပုညဖလံ ပစ္စနုဘဝန္တိ. ယေသံ ပန အရိယမဂ္ဂေါ ဥပ္ပဇ္ဇတိ၊ တေသံ မဂ္ဂါဓိဂမတော ပဋ္ဌာယ ပုညဖလမေဝ ဥပ္ပဇ္ဇတီတိ ဒဋ္ဌဗ္ဗံ. အပုညဖလံ ပုဗ္ဗေ ဝိယ ကဋုကံ န ဟောတိ၊ မနုဿတ္တဘာဝေ ဌိတာနံ ဝိယ မုဒုကမေဝ ဟောတီတိ အပရေ. ဓမ္မိကော ရာဇာတိ ဧတ္ထ တဿ ဓမ္မိကဘာဝေါ ဓမ္မဒေဝပုတ္တဿ ဝိယ ဥပ္ပတ္တိနိယတော ဓမ္မတာဝသေန ဝေဒိတဗ္ဗော. ဒွါရေသူတိ အဝီစိမဟာနရကဿ စတူသု ဒွါရေသု. ခီဏာသဝါ ဗြာဟ္မဏာ နာမ ဥက္ကဋ္ဌနိဒ္ဒေသေန.

အနုယောဂဝတ္တန္တိ အနုယောဂေ ကတေ ဝတ္တိတဗ္ဗဝတ္တံ. အာရောပေန္တောတိ ကာရာပေန္တော၊ အတ္တနော ပုစ္ဆံ ဥဒ္ဒိဿ ပဋိဝစနံ ဒါပေန္တော ပုစ္ဆတိ. ပရဿ ဟိ အဓိပ္ပါယံ ဉာတုံ ဣစ္ဆန္တော တဒုပဂံ ပယောဂံ ကရောန္တော ပုစ္ဆတိ နာမ. လဒ္ဓိန္တိ ဂါဟံ. ပတိဋ္ဌာပေန္တောတိ တတ္ထ နိစ္စကာလံ ကာရာပေန္တော. ကာရဏံ ပုစ္ဆန္တောတိ ယုတ္တိံ ပုစ္ဆန္တော. သမနုဘာသတီတိ ယထာနုယုတ္တမတ္ထံ ဝိဘူတံ ကတွာ ကထေတိ.

ဇိဏ္ဏန္တိ ဇရာပတ္တိယာ ဇိဏ္ဏံ. ဧကစ္စော ဒဟရကာလတော ပဋ္ဌာယ ပဏ္ဍုရောဂါဒိနာ အဘိဘူတကာယတာယ ဇိဏ္ဏသဒိသော ဟောတိ၊ အယံ န တထာ ဇရာပတ္တိယာ ဇိဏ္ဏောတိ ဒဿေတိ. ဂေါပါနသီ ဝိယ ဝင်္ကန္တိ ဝင်္ကဂေါပါနသီ ဝိယ ဝင်္ကံ. န ဟိ ဝင်္ကဘာဝဿ နိဒဿနတ္ထံ အဝင်္ကဂေါပါနသီ ဂယှတိ. ဘဂ္ဂန္တိ ဘဂ္ဂသရီရံ ကဋိယံ ဘဂ္ဂကာယတ္တာ. တေနာဟ ‘‘ဣမိနာပိဿ ဝင်္ကဘာဝမေဝ ဒီပေတီ’’တိ. ဒဏ္ဍပဋိသရဏန္တိ ဌာနဂမနေသု ဒဏ္ဍော ပဋိသရဏံ ဧတဿာတိ ဒဏ္ဍပဋိသရဏံ တေန ဝိနာ ဝတ္တိတုံ အသမတ္ထတ္တာ. တေနာဟ ‘‘ဒဏ္ဍဒုတိယ’’န္တိ. ဇရာတုရန္တိ ဇရာယ ပတ္ထတသံကိလန္တကာယံ. သဗ္ဗသော ကိမိဟတံ ဝိယ မဟာခလ္လာဋံ သီသမဿာတိ မဟာခလ္လာဋသီသံ. သဉ္ဇာတဝလိန္တိ သမန္တတော ဇာတဝလိကံ. ဇရာဓမ္မောတိ ဇရာပကတိကော. တေနာဟ ‘‘ဇရာသဘာဝေါ’’တိ. သဘာဝေါ စ နာမ တေဇောဓာတုယာ ဥဏှတာ ဝိယ န ကဒါစိ ဝိဂစ္ဆတီတိ အာဟ ‘‘အပရိမုတ္တော ဇရာယာ’’တိအာဒိ.

အတ္ထတော ဧဝံ ဝဒတိ နာမ၊ ဝါစာယ အဝဒန္တောပိ အတ္ထာပတ္တိတော ဧဝံ ဝဒန္တော ဝိယ ဟောတိ ဝိညူနန္တိ အတ္ထော. တရုဏော အဟောသိံ ယောဗ္ဗနေန သမန္နာဂတော. ဦရူနံ ဗလံ ဧတဿ အတ္ထီတိ ဦရုဗလီ. တေန ဒူရေပိ ဂမနာဂမနလင်္ဃနာဒိသမတ္ထတံ ဒဿေတိ၊ ဗာဟုဗလီတိ ပန ဣမိနာ ဟတ္ထေဟိ ကာတဗ္ဗကိစ္စသမတ္ထတံ၊ ဇဝဂ္ဂဟဏေန ဝေဂသာ ပဝတ္တိသမတ္ထတံ. အန္တရဟိတာတိ နဋ္ဌာ. ဧတ္ထ စ န ခေါ ပနာဟန္တိအာဒိ ဇရာယ ဒေဝဒူတဘာဝဒဿနံ. တေနာဟ ‘‘တေနေသ ဒေဝဒူတော နာမ ဇာတော’’တိ. အာဗာဓဿ အတ္ထိတာယ အာဗာဓိကံ. ဝိဝိဓံ ဒုက္ခံ အာဒဟတီတိ ဗျာဓိ၊ ဝိသေသေန ဝါ အာဓိယတိ ဧတေနာတိ ဗျာဓိ၊ ဗျာဓိ သံဇာတော ဧတဿာတိ ဗျာဓိတံ. ဧသ နယော ဒုက္ခိတန္တိ ဧတ္ထာပိ.

ဒုတိယံ ဒေဝဒူတန္တိ ဧတ္ထာပိ ဝုတ္တနယေနေဝ အတ္ထော ဝေဒိတဗ္ဗော. ဗျာဓိနာ အဘိဟတောတိ ဗျာဓိနာ ဗာဓိတော၊ ဥပဒ္ဒုတောတိ အတ္ထော.

ဝိပရိဘိန္နဝဏ္ဏောတိ ဝိပရိဘိန္နနီလဝဏ္ဏော. တဉှိ ယတ္ထ ယတ္ထ ဂဟိတပုဗ္ဗကံ၊ တတ္ထ တတ္ထ ပဏ္ဍုဝဏ္ဏံ၊ မံသုဿဒဋ္ဌာနေ ရတ္တဝဏ္ဏံ၊ ယေဘုယျေန စ နီလသာဋကပါရုတံ ဝိယ ဟောတိ. တေန ဝုတ္တံ ‘‘ဝိပရိဘိန္နနီလဝဏ္ဏော’’တိ.

‘‘ကော လဘတိ၊ ကော န လဘတီ’’တိ နိရယုပဂဿေဝ ဝသေနာယံ ဝိစာရဏာတိ ‘‘ယေန တာဝ ဗဟု ပါပံ ကတ’’န္တိအာဒိ အာရဒ္ဓံ. ဗဟု ပါပံ ကတန္တိ ဗဟုသော ပါပံ ကတံ. တေန ပါပဿ ဗဟုလီကရဏမာဟ. ဗဟူတိ ဝါ မဟန္တံ. မဟတ္ထောပိ ဟိ ဗဟုသဒ္ဒေါ ဒိဿတိ ‘‘ဗဟု ဝတ ကတံ အဿာ’’တိအာဒီသု၊ ဂရုကန္တိ ဝုတ္တံ ဟောတိ. သော ဂရုကံ ဗဟုလံ ဝါ ပါပံ ကတွာ ဌိတော နိရယေ နိဗ္ဗတ္တတိယေဝ၊ န ယမပုရိသေဟိ ယမဿ သန္တိကံ နီယတီတိ. ပရိတ္တန္တိ ပမာဏပရိတ္တတာယ ကာလပရိတ္တတာယ စ ပရိတ္တံ. ပုရိမသ္မိံ အတ္ထေ အဂရူတိ အတ္ထော၊ ဒုတိယသ္မိံ အဗဟုလန္တိ. ယထာဝုတ္တမတ္ထံ ဥပမာယ ဝိဘာဝေတုံ ‘‘ယထာ ဟီ’’တိအာဒိ ဝုတ္တံ. ကတ္တဗ္ဗမေဝ ကရောန္တီတိ ဒဏ္ဍမေဝ ကရောန္တိ. အနုဝိဇ္ဇိတွာတိ ဝီမံသိတွာ. ဝိနိစ္ဆယဋ္ဌာနန္တိ အဋ္ဋကရဏဋ္ဌာနံ. ပရိတ္တပါပကမ္မာတိ ဒုဗ္ဗလပါပကမ္မာ. အတ္တနော ဓမ္မတာယာတိ ပရေဟိ အသာရိယမာနေပိ အတ္တနော ဓမ္မတာယ သရန္တိ. တေ ဟိ ပါပကမ္မဿ ဒုဗ္ဗလဘာဝတော ကတူပစိတဿ စ ဩကာသာရဟကုသလကမ္မဿ ဗလဝဘာဝတော အတ္တနော ဓမ္မတာယပိ သရန္တိ. သာရိယမာနာပီတိ ‘‘ဣဒံ နာမ တယာ ကတံ ပုညကမ္မ’’န္တိ ပရေဟိ သာရိယမာနာပိ.

အာကာသစေတိယန္တိ ဂိရိသိခရေ အဗ္ဘောကာသေ ဝိဝဋင်္ဂဏေ ကတစေတိယံ. ရတ္တပဋေနာတိ ရတ္တဝဏ္ဏေန ပဋေန ပူဇေသိ ပဋာကံ ကတွာ. အဂ္ဂိဇာလသဒ္ဒန္တိ ပဋပဋာယန္တံ နရကေ အဂ္ဂိဇာလသဒ္ဒံ သုတွာဝ. အတ္တနာ ပူဇိတပဋံ အနုဿရီတိ တဒါ ပဋာကာယ ဝါတပ္ပဟာရသဒ္ဒေ နိမိတ္တဿ ဂဟိတတ္တာ ‘‘မယာ တဒါ အာကာသစေတိယေ ပူဇိတရတ္တပဋသဒ္ဒေါ ဝိယာ’’တိ အတ္တနာ ပူဇိတပဋံ အနုဿရိ.

သုမနပုပ္ဖကုမ္ဘေနာတိ ကုမ္ဘပရိမာဏေန သုမနပုပ္ဖရာသိနာ. ‘‘ဒသာဓိကံ နာဠိသဟဿကုမ္ဘ’’န္တိ ကေစိ၊ ‘‘ပဉ္စအမ္ဗဏ’’န္တိ အပရေ. တီဟိပိန သရတိ ဗလဝတော ပါပကမ္မေန ဗျာမောဟိတော. တုဏှီ အဟောသီတိ ‘‘ကမ္မာရဟော အယ’’န္တိ တတ္ထ ပဋိကာရံ အပဿန္တော တုဏှီ အဟောသိ.

ဧကပက္ခစ္ဆဒနမတ္တာဟီတိ မဇ္ဈိမပ္ပမာဏဿ ဂေဟဿ ဧကစ္ဆဒနပ္ပမာဏေဟိ. သုတ္တာဟတံ ကရိတွာတိ ကာဠသုတ္တံ ပါတေတွာ. ယထာ ရထော သဗ္ဗသော ပဇ္ဇလိတော ဟောတိ အယောမယော၊ ဧဝံ ယုဂါဒယောပိဿ ပဇ္ဇလိတာ သဇောတိဘူတာ ဧဝ ဟောန္တီတိ အာဟ ‘‘သဒ္ဓိံ။ပေ။ ရထေ ယောဇေတွာ’’တိ. မဟာကူဋာဂါရပ္ပမာဏန္တိ သတ္တဘူမကမဟာကူဋာဂါရပ္ပမာဏံ.

ဝိဘတ္တောတိ သတ္တာနံ သာဓာရဏေန ပါပကမ္မုနာ ဝိဘတ္တော. ဟီနံ ကာယန္တိ ဟီနံ သတ္တနိကာယံ၊ ဟီနံ ဝါ အတ္တဘာဝံ. ဥပါဒါနေတိ စတုဗ္ဗိဓေ ဥပါဒါနေ. အတ္ထတော ပန တဏှာဒိဋ္ဌိဂ္ဂါဟောတိ အာဟ ‘‘တဏှာဒိဋ္ဌိဂ္ဂဟဏေ’’တိ. သမ္ဘဝတိ ဇရာမရဏံ ဧတေနာတိ သမ္ဘဝေါ၊ ဥပါဒါနန္တိ အာဟ ‘‘ဇာတိယာ စ မရဏဿ ဆ ကာရဏဘူတေ’’တိ. အနုပါဒါတိ အနုပါဒါယ. တေနာဟ ‘‘အနုပါဒိယိတွာ’’တိ. သကလဝဋ္ဋဒုက္ခံ အတိက္ကန္တာတိ စရိမစိတ္တနိရောဓေန ဝဋ္ဋဒုက္ခဿ ကိလေသာနမ္ပိ အသမ္ဘဝတော သဗ္ဗံ ဝဋ္ဋဒုက္ခံ အတိက္ကန္တာ.

ဒေဝဒူတသုတ္တဝဏ္ဏနာ နိဋ္ဌိတာ.