၂. အာနန္ဒသုတ္တဝဏ္ဏနာ

၃၂. ဒုတိယေ တထာဇာတိကောတိ တထာသဘာဝေါ. စိတ္တေကဂ္ဂတာလာဘောတိ စိတ္တေကဂ္ဂတာယ အဓိဂမော. ရူပမေဝ ကိလေသုပ္ပတ္တိယာ ကာရဏဘာဝတော ရူပနိမိတ္တံ. ဧသ နယော သေသေသုပိ. သဿတာဒိနိမိတ္တန္တိ သဿတုစ္ဆေဒဘာဝနိမိတ္တံ. ပုဂ္ဂလနိမိတ္တန္တိ ပုဂ္ဂလာဘိနိဝေသနနိမိတ္တံ. ဓမ္မနိမိတ္တန္တိ ဓမ္မာရမ္မဏသင်္ခါတံ နိမိတ္တံ. ‘‘သိယာ နု ခေါ၊ ဘန္တေ’’တိ ထေရေန ပုဋ္ဌော ဘဂဝါ ‘‘သိယာ’’တိ အဝေါစ လောကုတ္တရသမာဓိပ္ပဋိလာဘံ သန္ဓာယ. သော ဟိ နိဗ္ဗာနံ သန္တံ ပဏီတန္တိ စ ပဿတိ. တေနာဟ ‘‘ဣဓာနန္ဒာ’’တိအာဒိ.

နိဗ္ဗာနံ သန္တန္တိ သမာပတ္တိံ အပ္ပေတွာတိ နိဗ္ဗာနံ သန္တန္တိ အာဘုဇိတွာ ဖလသမာပတ္တိံ အပ္ပေတွာ. ဒိဝသမ္ပီတိအာဒိနာ အသင်္ခတာယ ဓာတုယာ အစ္စန္တသန္တပဏီတာဒိဘာဝံ ဒဿေတိ. အဋ္ဌဝိဓေတိ ‘‘သန္တံ ပဏီတံ သဗ္ဗသင်္ခါရသမထော သဗ္ဗူပဓိပဋိနိဿဂ္ဂေါ တဏှာက္ခယော ဝိရာဂေါ နိရောဓော နိဗ္ဗာန’’န္တိ ဧဝံ အဋ္ဌဝိဓေ အာဘောဂသညိတေ သမန္နာဟာရေ. နိဒ္ဓါရဏေ စေတံ ဘုမ္မံ. ဣမသ္မိံ ဌာနေ။ပေ။ လဗ္ဘန္တေဝါတိ ‘‘ဣဓာနန္ဒ၊ ဘိက္ခုနော ဧဝံ ဟောတီ’’တိ အာဂတေ ဣမသ္မိံ သုတ္တပ္ပဒေသေ ဧကောပိ အာဘောဂသမန္နာဟာရော စေပိ သဗ္ဗေ အဋ္ဌပိ အာဘောဂသမန္နာဟာရာ လဗ္ဘန္တေဝ သမန္နာဟရတံ အတ္ထာဝဟတ္တာ.

ဉာဏေန ဇာနိတွာတိ ဝိပဿနာဉာဏသဟိတေန မဂ္ဂဉာဏေန ဇာနိတွာ. ပရာနိ စ ဩပရာနိ စ စက္ခာဒီနိ အာယတနာနိ. သန္တတာယာတိ ပဋိပ္ပဿဒ္ဓိတာယ. ကာယဒုစ္စရိတာဒိဓူမဝိရဟိတောတိ ကာယဒုစ္စရိတာဒိ ဧဝ သန္တာပနဋ္ဌေန ဓူမော၊ တေန ဝိရဟိတော. အနီဃောတိ အပါပေါ. ဇာတိဇရာဂဟဏေနေဝ ဗျာဓိမရဏမ္ပိ ဂဟိတမေဝါတိ တဗ္ဘာဝဘာဝတောတိ ဝုတ္တံ.

အာနန္ဒသုတ္တဝဏ္ဏနာ နိဋ္ဌိတာ.