၉. အန္ဓသုတ္တဝဏ္ဏနာ

၂၉. နဝမေ အန္ဓောတိအာဒီသု ပါဠိပဒေသု ပဌမော ဒိဋ္ဌဓမ္မိကဘောဂသံဟရဏပညာစက္ခုနော စ သမ္ပရာယိကတ္ထသာဓနပညာစက္ခုနော စ အဘာဝါ ‘‘အန္ဓော’’တိ ဝုစ္စတိ ဒုတိယောပိ၊ တတိယော ပန ဒွိန္နမ္ပိ ဘာဝါ ‘‘ဒွိစက္ခူ’’တိ ဝုစ္စတိ. ပညာစက္ခူတိ အာယကောသလ္လဘူတာ ပညာစက္ခု. တေနာဟ ‘‘ဖာတိံ ကရေယျာ’’တိ. အဓမုတ္တမေတိ အဓမေ စေဝ ဥတ္တမေ စ. ပဋိပက္ခဝသေနာတိ ပဋိပက္ခဿ အတ္ထိတာဝသေန. သုက္ကသပ္ပဋိဘာဂါတိ သုက္ကဓမ္မေဟိ ပဟာယကေဟိ သပ္ပဋိဘာဂါတိ ဇာနေယျ. ကဏှသပ္ပဋိဘာဂါတိ ကဏှဓမ္မေဟိ ပဟာတဗ္ဗေဟိ သပ္ပဋိဘာဂါတိ ဇာနေယျ.

တထာဇာတိကာတိ ယာဒိသေဟိ သပုတ္တဒါရပရိဇနသဉာတိမိတ္တဗန္ဓဝဂ္ဂံ အတ္တာနံ သုခေတိ ပီဏေတိ၊ တာဒိသာ ဘောဂါပိ န သန္တိ. ပုညာနိ စ န ကရောတီတိ သမဏဗြာဟ္မဏကပဏဒ္ဓိကယာစကာနံ သန္တပ္ပနဝသေန ပုညာနိ န ကရောတိ. ဥဘယတ္ထာတိ ဥဘယသ္မိံ လောကေ၊ ဥဘယသ္မိံ ဝါ အတ္ထေတိ ဝိဂ္ဂဟောတိ ဒဿေန္တော ‘‘ဣဓလောကေ’’တိအာဒိမာဟ. ဥဘယေနာတိ ဝုတ္တမတ္ထံ ယောဇေတွာ ဒဿေတုံ ‘‘ကထ’’န္တိအာဒိ ဝုတ္တံ. ယသ္မိံ ဌာနေတိ ယသ္မိံယေဝ ဌာနေ. န သောစတီတိ သောကဟေတူနံ တတ္ထ အဘာဝတော န သောစတိ.

အန္ဓသုတ္တဝဏ္ဏနာ နိဋ္ဌိတာ.