၇. ဇိဂုစ္ဆိတဗ္ဗသုတ္တဝဏ္ဏနာ

၂၇. သတ္တမေ အဗ္ဘုဂ္ဂစ္ဆတီတိ ဧတ္ထ အဘိ-သဒ္ဒါပေက္ခာယ ‘‘န’’န္တိ သာမိအတ္ထေ ဥပယောဂဝစနန္တိ အာဟ ‘‘အဿာ’’တိ ‘‘တံ ခေါ ပန ဘဝန္တ’’န္တိအာဒီသု ဝိယ. ပါပကော ကိတ္တိသဒ္ဒေါတိ လာမကဘာဝေန ကထေတဗ္ဗသဒ္ဒေါ. ဂူထကူပေါ ဝိယ ဒုဿီလျန္တိ ဧတေန ဒုဿီလဿ ဂူထသဒိသတ္တမေဝ ဒဿေတိ. ဝစနန္တိ အနိဋ္ဌဝစနံ. ပုရိမနယေနေဝါတိ ‘‘ဂူထကူပေါ ဝိယ ဒုဿီလျ’’န္တိအာဒိနာ ပုဗ္ဗေ ဝုတ္တနယေန. သုစိမိတ္တောတိ သီလာစာရသုဒ္ဓိယာ သုစိမိတ္တော. သဟ အယန္တိ ပဝတ္တန္တီတိ သဟာယာတိ အာဟ ‘‘သဟဂါမိနော’’တိ.

ဇိဂုစ္ဆိတဗ္ဗသုတ္တဝဏ္ဏနာ နိဋ္ဌိတာ.