၃-၄. စိန္တီသုတ္တာဒိဝဏ္ဏနာ

၃-၄. တတိယေ ဧတေဟီတိ ဒုစ္စိန္တိတစိန္တိတာဒီဟိ. ဧတေန လက္ခဏသဒ္ဒဿ သရဏတ္ထတမာဟ. တာနေဝါတိ လက္ခဏာနိ ဧဝ. အဿာတိ ဗာလဿ. ဗာလော အယန္တိ နိမီယတိ သဉ္ဇာနီယတိ ဧတေဟီတိ ဗာလနိမိတ္တာနိ. အပဒါနံ ဝုစ္စတိ၊ ဝိချာတံ ကမ္မံ၊ ဒုစ္စိန္တိတစိန္တိတာဒီနိ စ ဗာလေ ဝိချာတာနိ အသာဓာရဏဘာဝေန. တသ္မာ ‘‘ဗာလဿ အပဒါနာနီ’’တိ. အဘိဇ္ဈာဒီဟိ ဒုဋ္ဌံ ဒူသိတံ စိန္တိတံ ဒုစ္စိန္တိတံ၊ တံ စိန္တေတီတိ ဒုစ္စိန္တိတစိန္တီ. လောဘာဒီဟိ ဒုဋ္ဌံ ဘာသိတံ မုသာဝါဒါဒိံ ဘာသတီတိ ဒုဗ္ဘာသိတဘာသီ. တေသံယေဝ ဝသေန ကတ္တဗ္ဗတော ဒုက္ကဋကမ္မံ ပါဏာတိပါတာဒိံ ကရောတီတိ ဒုက္ကဋကမ္မကာရီ. တေနာဟ ‘‘စိန္တယန္တော’’တိအာဒိ. ဝုတ္တာနုသာရေနာတိ ‘‘ဗာလော အယ’’န္တိအာဒိနာ ဝုတ္တဿ အတ္ထဝစနဿ ‘‘ပဏ္ဍိတော အယန္တိ ဧတေဟိ လက္ခီယတီ’’တိအာဒိနာ အနုဿရဏေန. မနောသုစရိတာဒီနံ ဝသေနာတိ ‘‘စိန္တယန္တော အနဘိဇ္ဈာဗျာပါဒသမ္မာဒဿနဝသေန သုစိန္တိတမေဝ စိန္တေတီ’’တိအာဒိနာ မနောသုစရိတာဒီနံ တိဏ္ဏံ သုစရိတာနံ ဝသေန ယောဇေတဗ္ဗာနိ. စတုတ္ထံ ဝုတ္တနယတ္တာ ဥတ္တာနတ္ထမေဝ.

စိန္တီသုတ္တာဒိဝဏ္ဏနာ နိဋ္ဌိတာ.