၁၁-၁၃. ပဌမမောရနိဝါပသုတ္တာဒိဝဏ္ဏနာ

၁၄၄-၁၄၆. ဧကာဒသမေ အကုပ္ပဓမ္မတာယ ခယဝယသင်္ခါတံ အန္တံ အတီတာတိ အစ္စန္တာ၊ ဧဝံ အပရိဟာယနသဘာဝတ္တာ အစ္စန္တာ နိဋ္ဌာ အဿာတိ အစ္စန္တနိဋ္ဌော. တေနာဟ ‘‘အန္တံ အတိက္ကန္တနိဋ္ဌော’’တိအာဒိ. န ဟိ ပဋိဝိဒ္ဓဿ လောကုတ္တရဓမ္မဿ ဒဿနံ ကုပ္ပနံ နာမ အတ္ထိ. ဓုဝနိဋ္ဌောတိ သတတနိဋ္ဌော. အစ္စန္တမေဝ စတူဟိ ယောဂေဟိ ခေမော ဧတဿ အတ္ထီတိ အစ္စန္တယောဂက္ခေမီ၊ နိစ္စယောဂက္ခေမီတိ အတ္ထော. မဂ္ဂဗြဟ္မစရိယဿ ဝုသိတတ္တာ တဿ အဝိဟာယနသဘာဝတ္တာ အစ္စန္တံ ဗြဟ္မစာရီတိ အစ္စန္တဗြဟ္မစာရီ၊ နိစ္စဗြဟ္မစာရီတိ အတ္ထော. ပရိယောသာနန္တိ ဗြဟ္မစရိယပရိယောသာနံ ဝဋ္ဋဒုက္ခပရိယောသာနဉ္စ. အစ္စန္တံ ပရိယောသာနမဿာတိ အစ္စန္တပရိယောသာနော. ဒွါဒသမတေရသမာနိ ဥတ္တာနတ္ထာနေဝ.

ပဌမမောရနိဝါပသုတ္တာဒိဝဏ္ဏနာ နိဋ္ဌိတာ.

ယောဓာဇီဝဝဂ္ဂဝဏ္ဏနာ နိဋ္ဌိတာ.

၁၄၇-၁၅၆. မင်္ဂလဝဂ္ဂေါ ဥတ္တာနတ္ထောယေဝ.

တတိယပဏ္ဏာသကံ နိဋ္ဌိတံ.