၁. အာပါယိကသုတ္တဝဏ္ဏနာ

၁၁၄. ဒုတိယဿ ပဌမေ အပါယေသု နိဗ္ဗတ္တနသီလတာယ အပါယူပဂါ အာပါယိကာတိ အာဟ ‘‘အပါယံ ဂစ္ဆိဿန္တီတိ အာပါယိကာ’’တိ. အညေ ဗြဟ္မစာရိနော သုနိဝတ္ထေ သုပါရုတေ သုမ္ဘကပတ္တဓရေ ဂါမနိဂမရာဇဓာနီသု ပိဏ္ဍာယ စရိတွာ ဇီဝိကံ ကပ္ပေန္တေ ဒိသွာ သယမ္ပိ တာဒိသေန အာကာရေန တထာပဋိပဇ္ဇနတော ‘‘အဟံ ဗြဟ္မစာရီ’’တိ ပဋိညံ ဒေန္တော ဝိယ ဟောတီတိ အာဟ ‘‘ဗြဟ္မစာရိပဋိညောတိ ဗြဟ္မစာရိပဋိရူပကော’’တိ. ‘‘အဟမ္ပိ ဘိက္ခူ’’တိ ဝတွာ ဥပေါသထင်္ဂါဒီနိ ပဝိသန္တော ပန ဗြဟ္မစာရိပဋိညော ဟောတိယေဝ၊ တထာ သံဃိကံ လာဘံ ဂဏှန္တော. တေနာဟ ‘‘တေသံ ဝါ။ပေ။ ဧဝံပဋိညော’’တိ. အက္ကောသတီတိ ‘‘အဿမဏောသိ၊ သမဏပဋိညောသီ’’တိအာဒိနာ အက္ကောသတိ. ပရိဘာသတီတိ ‘‘သော တွံ ‘ဟောတု၊ မုဏ္ဍကသမဏော အဟ’န္တိ မညသိ၊ ဣဒါနိ တေ အဿမဏဘာဝံ အာရောပေဿာမီ’’တိအာဒိနာ ဝဒန္တော ပရိဘာသတိ.

ကိလေသကာမောပိ အဿာဒိယမာနော ဝတ္ထုကာမန္တောဂဓောယေဝ၊ ကိလေသကာမဝသေန စ တေသံ အဿာဒနံ သိယာတိ အာဟ ‘‘ကိလေသကာမေန ဝတ္ထုကာမေ သေဝန္တဿာ’’တိ. ကိလေသကာမေနာတိ ကရဏတ္ထေ ကရဏဝစနံ. နတ္ထိ ဒေါသောတိ အဿာဒေတွာ ဝိသယပရိဘောဂေ နတ္ထိ အာဒီနဝေါ၊ တပ္ပစ္စယာ န ကောစိ အန္တရာယောတိ အဓိပ္ပါယော. ပါတဗ္ဗတံ အာပဇ္ဇတီတိ ပရိဘုဉ္ဇနကတံ ဥပဂစ္ဆတိ. ပရိဘောဂတ္ထော ဟိ အယံ ပါ-သဒ္ဒေါ၊ ကတ္တုသာဓနော စ တဗ္ဗ-သဒ္ဒေါ၊ ယထာရုစိ ပရိဘုဉ္ဇတီတိ အတ္ထော. ပိဝိတဗ္ဗတံ ပရိဘုဉ္ဇိတဗ္ဗတန္တိ ဧတ္ထာပိ ကတ္တုဝသေနေဝ အတ္ထော ဝေဒိတဗ္ဗော.

အာပါယိကသုတ္တဝဏ္ဏနာ နိဋ္ဌိတာ.