၁၀. ဒုတိယနိဒါနသုတ္တဝဏ္ဏနာ

၁၁၃. ဒသမေ ဝိဝဋ္ဋဂါမိကမ္မာနန္တိ ဝိဝဋ္ဋူပနိဿယကမ္မာနံ. တဒဘိနိဝတ္တေတီတိ ဧတ္ထ တံ-သဒ္ဒေန ပစ္စာမသနဿ ဝိပါကဿ ပရာမာသောတိ အာဟ ‘‘တံ အဘိနိဝတ္တေတီ’’တိ၊ တံ ဝိပါကံ အဘိဘဝိတွာ နိဝတ္တေတီတိ အတ္ထော. ဣဒါနိ န ကေဝလံ ဝိပါကဿေဝ ပရာမာသော တံ-သဒ္ဒေန၊ အထ ခေါ ဆန္ဒရာဂဋ္ဌာနိယာနံ ဓမ္မာနံ တဗ္ဗိပါကဿ စ ပရာမာသော ဒဋ္ဌဗ္ဗောတိ အာဟ ‘‘ယဒါ ဝါ တေနာ’’တိအာဒိ. တေ စေဝ ဓမ္မေတိ တေ ဆန္ဒရာဂဋ္ဌာနိယေ ဓမ္မေ. နိဗ္ဗိဇ္ဈိတွာ ပဿတီတိ ကိလေသေ နိဗ္ဗိဇ္ဈိတွာ ဝိဘူတံ ပါကဋံ ကတွာ ပဿတီတိ.

ဒုတိယနိဒါနသုတ္တဝဏ္ဏနာ နိဋ္ဌိတာ.

သမ္ဗောဓဝဂ္ဂဝဏ္ဏနာ နိဋ္ဌိတာ.