၈. ပေါတ္ထကသုတ္တဝဏ္ဏနာ

၁၀၀. အဋ္ဌမေ နဝေါတိ နဝဝါယိမော. တေနာဟ ‘‘ကရဏံ ဥပါဒါယ ဝုစ္စတီ’’တိ. ဝါကမယဝတ္ထန္တိ သာဏာဒိဝါကသာဋကံ. ဒုဗ္ဗဏ္ဏောတိ ဝိဝဏ္ဏော. ဒုက္ခသမ္ဖဿောတိ ခရသမ္ဖဿော. အပ္ပံ အဂ္ဃတီတိ အပ္ပဂ္ဃေါ. အတိဗဟုံ အဂ္ဃန္တော ကဟာပဏဂ္ဃနကော ဟောတိ. ပရိဘောဂမဇ္ဈိမောတိ ပရိဘောဂကာလဝသေန မဇ္ဈိမော. သော ဟိ နဝဘာဝံ အတိက္ကမိတွာ ဇိဏ္ဏဘာဝံ အပ္ပတ္တော မဇ္ဈေ ပရိဘောဂကာလေပိ ဒုဗ္ဗဏ္ဏော စ ဒုက္ခသမ္ဖဿော စ အပ္ပဂ္ဃေါယေဝ ဟောတိ. အတိဗဟုံ အဂ္ဃန္တော အဍ္ဎံ အဂ္ဃတိ၊ ဇိဏ္ဏကာလေ ပန အဍ္ဎမာသကံ ဝါ ကာကဏိကံ ဝါ အဂ္ဃတိ. ဥက္ခလိပရိပုဉ္ဆနန္တိ ကာဠုက္ခလိပရိပုဉ္ဆနံ. နဝေါတိပိ ဥပသမ္ပဒါယ ပဉ္စဝဿကာလတော ဟေဋ္ဌာ ဇာတိယာ သဋ္ဌိဝဿောပိ နဝေါယေဝ. ဒုဗ္ဗဏ္ဏတာယာတိ သရီရဝဏ္ဏေနပိ ဂုဏဝဏ္ဏေနပိ ဒုဗ္ဗဏ္ဏတာယ. ဒုဿီလဿ ဟိ ပရိသမဇ္ဈေ နိတ္တေဇတာယ သရီရဝဏ္ဏောပိ န သမ္ပဇ္ဇတိ၊ ဂုဏဝဏ္ဏေန ဝတ္တဗ္ဗမေဝ နတ္ထိ. အဋ္ဌကထာယံ ပန သရီရဝဏ္ဏေန ဒုဗ္ဗဏ္ဏတာပိ ဂုဏဝဏ္ဏဿ အဘာဝေန ဒုဗ္ဗဏ္ဏတာယာတိ ဝုတ္တံ.

ယေ ခေါ ပနဿာတိ ယေ ခေါ ပန တဿ ဥပဋ္ဌာကာ ဝါ ဉာတိမိတ္တာဒယော ဝါ ဧတံ ပုဂ္ဂလံ သေဝန္တိ. တေသန္တိ တေသံ ပုဂ္ဂလာနံ ဆ သတ္ထာရေ သေဝန္တာနံ မိစ္ဆာဒိဋ္ဌိကာနံ ဝိယ. ဒေဝဒတ္တေ သေဝန္တာနံ ကောကာလိကာဒီနံ ဝိယ စ တံ သေဝနံ ဒီဃရတ္တံ အဟိတာယ ဒုက္ခာယ ဟောတိ. မဇ္ဈိမောတိ ပဉ္စဝဿကာလတော ပဋ္ဌာယ ယာဝ နဝဝဿကာလာ မဇ္ဈိမော နာမ. ထေရောတိ ဒသဝဿတော ပဋ္ဌာယ ထေရော နာမ. ဧဝမာဟံသူတိ ဧဝံ ဝဒန္တိ. ကိံ နု ခေါ တုယှန္တိ တုယှံ ဗာလဿ ဘဏိတေန ကော အတ္ထောတိ ဝုတ္တံ ဟောတိ. တထာရူပန္တိ တထာဇာတိကံ တထာသဘာဝံ ဥက္ခေပနီယကမ္မဿ ကာရဏဘူတံ.

တီဟိ ကပ္ပါသအံသူဟိ သုတ္တံ ကန္တိတွာ ကတဝတ္ထန္တိ တယော ကပ္ပါသအံသူ ဂဟေတွာ ကန္တိတသုတ္တေန ဝါယိတံ သုခုမဝတ္ထံ၊ တံ နဝဝါယိမံ အနဂ္ဃံ ဟောတိ၊ ပရိဘောဂမဇ္ဈိမံ ဝီသမ္ပိ တိံသမ္ပိ သဟဿာနိ အဂ္ဃတိ၊ ဇိဏ္ဏကာလေ၊ အဋ္ဌပိ ဒသပိ သဟဿာနိ အဂ္ဃတိ.

တေသံ တံ ဟောတီတိ တေသံ သမ္မာသမ္ဗုဒ္ဓါဒယော သေဝန္တာ ဝိယ တံ သေဝနံ ဒီဃရတ္တံ ဟိတာယ သုခါယ ဟောတိ. သမ္မာသမ္ဗုဒ္ဓဉှိ ဧကံ နိဿာယ ယာဝဇ္ဇကာလာ မုစ္စနကသတ္တာနံ ပမာဏံ နတ္ထိ၊ တထာ သာရိပုတ္တတ္ထေရမဟာမောဂ္ဂလ္လာနတ္ထေရေ အဝသေသေ စ အသီတိ မဟာသာဝကေ နိဿာယ သဂ္ဂဂတသတ္တာနံ ပမာဏံ နတ္ထိ၊ ယာဝဇ္ဇကာလာ တေသံ ဒိဋ္ဌာနုဂတိံ ပဋိပန္နသတ္တာနမ္ပိ ပမာဏံ နတ္ထိယေဝ. အာဓေယျံ ဂစ္ဆတီတိ တဿ မဟာထေရဿ တံ အတ္ထနိဿိတံ ဝစနံ ယထာ ဂန္ဓကရဏ္ဍကေ ကာသိကဝတ္ထံ အာဓာတဗ္ဗတံ ဌပေတဗ္ဗတံ ဂစ္ဆတိ၊ ဧဝံ ဥတ္တမင်္ဂေ သိရသ္မိံ ဟဒယေ စ အာဓာတဗ္ဗတံ ဌပေတဗ္ဗတံ ဂစ္ဆတိ.

ပေါတ္ထကသုတ္တဝဏ္ဏနာ နိဋ္ဌိတာ.