၉. စရိယသုတ္တဝဏ္ဏနာ

၉. နဝမေ လောကန္တိ သတ္တလောကံ. သန္ဓာရေန္တီတိ အာစာရသန္ဓာရဏဝသေန ဓာရေန္တိ. ဌပေန္တီတိ မရိယာဒါယံ ဌပေန္တိ. ရက္ခန္တီတိ အာစာရသန္ဓာရဏေန မရိယာဒါယံ ဌပေတွာ ရက္ခန္တိ. ဂရုစိတ္တီကာရဝသေန န ပညာယေထာတိ ဂရုံ ကတွာ စိတ္တေ ကရဏဝသေန န ပညာယေထ၊ အယမာစာရော န လဗ္ဘေယျ. မာတုစ္ဆာတိ ဝါတိ ဧတ္ထ ဣတိ-သဒ္ဒေါ အာဒျတ္ထော. တေန မာတုလာနီတိ ဝါ အာစရိယဘရိယာတိ ဝါ ဂရူနံ ဒါရာတိ ဝါတိ ဣမေ သင်္ဂဏှာတိ. တတ္ထ မာတု ဘဂိနီ မာတုစ္ဆာ. မာတုလဘရိယာ မာတုလာနီ. ဂရူနံ ဒါရာ မဟာပိတုစူဠပိတုဇေဋ္ဌဘာတုအာဒီနံ ဂရုဋ္ဌာနိယာနံ ဘရိယာ. ယထာ အဇေဠကာတိအာဒီသု အယံ သင်္ခေပတ္ထော – ယထာ အဇေဠကာဒယော တိရစ္ဆာနာ ဟိရောတ္တပ္ပရဟိတာ မာတာတိ သညံ အကတွာ ဘိန္နမရိယာဒါ သဗ္ဗတ္ထ သမ္ဘေဒေန ဝတ္တန္တိ၊ ဧဝမယံ မနုဿလောကော ယဒိ လောကပါလဓမ္မာ န ဘဝေယျုံ၊ သဗ္ဗတ္ထ သမ္ဘေဒေန ဝတ္တေယျ. ယသ္မာ ပနိမေ လောကပါလကဓမ္မာ လောကံ ပါလေန္တိ၊ တသ္မာ နတ္ထိ သမ္ဘေဒေါတိ.

စရိယသုတ္တဝဏ္ဏနာ နိဋ္ဌိတာ.