၇. ကဏှသုတ္တဝဏ္ဏနာ

၇. သတ္တမေ ယထာ ‘‘ကဏှာ ဂါဝီ’’တိအာဒီသု ကာဠဝဏ္ဏေန သမန္နာဂတာ ‘‘ကဏှာ’’တိ ဝုစ္စတိ၊ န ဧဝံ ကာဠဝဏ္ဏတာယ ဓမ္မာ ‘‘ကဏှာ’’တိ ဝုစ္စန္တိ၊ အထ ခေါ ကဏှာဘိဇာတိနိဗ္ဗတ္တိဟေတုတော အပ္ပဘဿရဘာဝကရဏတော ဝါ ‘‘ကဏှာ’’တိ ဝုစ္စန္တီတိ ဒဿေန္တော ‘‘န ကာဠဝဏ္ဏတာယာ’’တိအာဒိမာဟ. ကဏှတာယာတိ ကဏှာဘိဇာတိတာယ. ကဏှာဘိဇာတီတိ စ အပါယာ ဝုစ္စန္တိ မနုဿေသု စ ဒေါဘဂ္ဂိယံ. သရသေနာတိ သဘာဝေန. န ဟိရီယတိ န လဇ္ဇတီတိ အဟိရိကော၊ ပုဂ္ဂလော၊ စိတ္တံ၊ တံ သမ္ပယုတ္တဓမ္မသမုဒါယော ဝါ. တဿ ဘာဝေါ အဟိရိက္ကန္တိ ဝတ္တဗ္ဗေ ဧကဿ က-ကာရဿ လောပံ ကတွာ အဟိရိကန္တိ ဝုတ္တန္တိ အာဟ ‘‘အဟိရိကန္တိ အဟိရိကဘာဝေါ’’တိ. န ဩတ္တပ္ပတီတိ အနောတ္တာပီ၊ ပုဂ္ဂလော၊ ယထာဝုတ္တဓမ္မသမုဒါယော ဝါ၊ တဿ ဘာဝေါ အနောတ္တပ္ပန္တိ အာဟ ‘‘အနောတ္တာပိဘာဝေါ’’တိ.

ကဏှသုတ္တဝဏ္ဏနာ နိဋ္ဌိတာ.