၃. တပနီယသုတ္တဝဏ္ဏနာ

၃. တတိယေ တပနီယာတိ ဧတ္ထ ကတ္တုအတ္ထေ အနီယ-သဒ္ဒေါတိ အာဟ ‘‘တပန္တီတိ တပနီယာ’’တိ. တပန္တီတိ ဝိဗာဓေန္တိ၊ ဝိဟေဌေန္တီတိ အတ္ထော. တပနံ ဝါ ဒုက္ခံ၊ ဒိဋ္ဌေ စေဝ ဓမ္မေ အဘိသမ္ပရာယဉ္စ တဿ ဥပ္ပါဒနေန စေဝ အနုဗလပ္ပဒါနေန စ ဟိတာတိ တပနီယာ. အထ ဝါ တပန္တိ တေနာတိ တပနံ၊ အနုတာပေါ၊ ဝိပ္ပဋိသာရောတိ အတ္ထော. တဿ ဟေတုဘာဝတော ဟိတာတိ တပနီယာ. အနုသောစတီတိ ဝိပ္ပဋိသာရီ ဟုတွာ ကတာကတံ အနုဂမ္မ သောစတိ. သောစနဉှိ ကတတ္တာ စ ဟောတိ အကတတ္တာ စ. တထာ စေဝ ပါဠိယံ ဝိဘတ္တံ. နန္ဒယက္ခာဒီနံ ဝတ္ထူနိ ပါကဋာနီတိ တာနိ အဒဿေတွာ ဒွေဘာတိကဝတ္ထုံ ဒဿေန္တော ‘‘တေ ကိရာ’’တိ အာဒိမာဟ. တတ္ထ တေတိ ဒွေ ဘာတရော. ပုန ကိံ မဂ္ဂသီတိ ပုန ကိံ ဣစ္ဆသိ.

တပနီယသုတ္တဝဏ္ဏနာ နိဋ္ဌိတာ.