၁. ပဌမော ပရိစ္ဆေဒေါ
ရူပသင်္ခေပေါ
၃. သစ္စာနိ ပရမတ္ထဉ္စ၊ သမ္မုတိဉ္စာတိ ဒွေ တဟိံ၊
ထဒ္ဓဘာဝါဒိနာ ဉေယျံ၊ သစ္စံ တံ ပရမတ္ထကံ.
၄. သန္နိဝေသဝိသေသာဒိဉေယျံ သမ္မုတိ တံ ဒွယံ၊
ဘာဝသင်္ကေတသိဒ္ဓီနံ၊ တထတ္တာ သစ္စမီရိတံ.
၅. ပရမတ္ထော သနိဗ္ဗာနပဉ္စက္ခန္ဓေတ္ထ ရာသိတော၊
ခန္ဓတ္ထော စ သမာသေတွာ၊ ဝုတ္တောတီတာဒိဘေဒနံ.
၆. ဝေဒနာဒီသုပေကသ္မိံ၊ ခန္ဓသဒ္ဒေါ တု ရုဠှိယာ၊
သမုဒ္ဒါဒေကဒေသေ တု၊ သမုဒ္ဒါဒိရဝေါ ယထာ.
၇. တတ္ထ သီတာဒိရုပ္ပတ္တာ၊ ရူပံ ဘွာပါနလာနိလံ၊
ဘူတံ ကထိနဒဝတာပစနီရဏဘာဝကံ.
၈. စက္ခု သောတဉ္စ ဃာနဉ္စ၊ ဇိဝှါ ကာယော ပဘာ ရဝေါ၊
ဂန္ဓော ရသောဇာ ဣတ္ထီ စ၊ ပုမာ ဝတ္ထု စ ဇီဝိတံ.
၉. ခံ ဇာတိ ဇရတာ ဘင်္ဂေါ၊ ရူပဿ လဟုတာ တထာ၊
မုဒုကမ္မညတာ ကာယဝစီဝိညတ္တိ ဘူတိကံ.
၁၀. စက္ခာဒီ ဒဋ္ဌုကာမာဒိဟေတုကမ္မဇဘူတိကာ၊
ပသာဒါ ရူပသဒ္ဒါဒီ၊ စက္ခုဉာဏာဒိဂေါစရာ.
၁၁. ဩဇာ ဟိ ယာပနာ ဣတ္ထိပုမလိင်္ဂါဒိဟေတုကံ၊
ဘာဝဒွယံ တု ကာယံဝ၊ ဗျာပိ နော သဟဝုတ္တိကံ.
၁၂. နိဿယံ ဝတ္ထု ဓာတူနံ၊ ဒွိန္နံ ကမ္မဇပါလနံ၊
ဇီဝိတံ ဥပ္ပလာဒီနံ၊ ဥဒကံဝ ဌိတိက္ခဏေ.
၁၃. ခံ ရူပါနံ ပရိစ္ဆေဒေါ၊ ဇာတိအာဒိတ္တယံ ပန၊
ရူပနိဗ္ဗတ္တိ ပါကော စ၊ ဘေဒေါ စေဝ ယထာက္ကမံ.
၁၄. လဟုတာဒိတ္တယံ တံ ဟိ၊ ရူပါနံ ကမတော သိယာ၊
အဒန္ဓထဒ္ဓတာ စာပိ၊ ကာယကမ္မာနုကူလတာ.
၁၅. အဘိက္ကမာဒိဇနကစိတ္တဇဿာနိလဿ ဟိ၊
ဝိကာရော ကာယဝိညတ္တိ၊ ရူပတ္ထမ္ဘာဒိကာရဏံ.
၁၆. ဝစီဘေဒကစိတ္တေန၊ ဘူတဘူမိဝိကာရတာ၊
ဝစီဝိညတ္တုပါဒိန္နဃဋ္ဋနဿေဝ ကာရဏံ.
၁၇. ရူပမဗျာကတံ သဗ္ဗံ၊ ဝိပ္ပယုတ္တမဟေတုကံ၊
အနာလမ္ဗံ ပရိတ္တာဒိ၊ ဣတိ ဧကဝိဓံ နယေ.
၁၈. အဇ္ဈတ္တိကာနိ စက္ခာဒီ၊ ပဉ္စေတေဝ ပသာဒကာ၊
ဝတ္ထုနာ ဝတ္ထု တာနေဝ၊ ဒွါရာ ဝိညတ္တိဘီ သဟ.
၁၉. သေသံ ဗာဝီသတိ စေကဝီသ ဝီသတိ ဗာဟိရံ၊
အပ္ပသာဒမဝတ္ထုံ စ၊ အဒွါရဉ္စ ယထာက္ကမံ.
၂၀. ပသာဒါ ပဉ္စ ဘာဝါယု၊ ဣန္ဒြိယနိန္ဒြိယေတရံ၊
ဝိနာပံ အာဒိတော ယာဝ၊ ရသာ ထူလံ န စေတရံ.
၂၁. အဋ္ဌကံ အဝိနိဗ္ဘောဂံ၊ ဝဏ္ဏဂန္ဓရသောဇကံ၊
ဘူတံ တံ တု ဝိနိဗ္ဘောဂမိတရန္တိ ဝိနိဒ္ဒိသေ.
၂၂. အဋ္ဌာရသာဒိတော ရူပါ၊ နိပ္ဖန္နံ တု န စေတရံ၊
ဖောဋ္ဌဗ္ဗမာပဝဇ္ဇံ တု၊ ဘူတံ ကာမေ န စေတရံ.
၂၃. သေက္ခသပ္ပဋိဃာသေက္ခပဋိဃံ ဒွယဝဇ္ဇိတံ၊
ဝဏ္ဏံ တဒိတရံ ထူလံ၊ သုခုမဉ္စေတိ တံ တိဓာ.
၂၄. ကမ္မဇာကမ္မဇံနေဝကမ္မာကမ္မဇတော တိဓာ၊
စိတ္တောဇဥတုဇာဒီနံ၊ ဝသေနာပိ တိဓာ တထာ.
၂၅. ဒိဋ္ဌံ သုတံ မုတဉ္စာပိ၊ ဝိညာတံ ဝတ စေတသာ၊
ဧကမေကဉ္စ ပဉ္စာပိ၊ ဝီသတိ စ ကမာ သိယုံ.
၂၆. ဟဒယံ ဝတ္ထု ဝိညတ္တိ၊ ဒွါရံ စက္ခာဒိပဉ္စကံ၊
ဝတ္ထု ဒွါရဉ္စ သေသာနိ၊ ဝတ္ထု ဒွါရဉ္စ နော သိယာ.
၂၇. နိပ္ဖန္နံ ရူပရူပံ ခံ၊ ပရိစ္ဆေဒေါထ လက္ခဏံ၊
ဇာတိအာဒိတ္တယံ ရူပံ၊ ဝိကာရော လဟုတာဒိကံ.
၂၈. ယထာ သင်္ခတဓမ္မာနံ၊ လက္ခဏံ သင်္ခတံ တထာ၊
ပရိစ္ဆေဒါဒိကံ ရူပံ၊ တဇ္ဇာတိမနတိက္ကမာ.
၂၉. ကမ္မစိတ္တာနလာဟာရပစ္စယာနံ ဝသေနိဓ၊
ဉေယျာ ပဝတ္တိ ရူပဿ၊ ပိဏ္ဍာနဉ္စ ဝသာ ကထံ.
၃၀. ကမ္မဇံ သေန္ဒြိယံ ဝတ္ထု၊ ဝိညတ္တိ စိတ္တဇာ ရဝေါ၊
စိတ္တဂ္ဂိဇော လဟုတာဒိတ္တယံ စိတ္တာနလန္နဇံ.
၃၁. အဋ္ဌကံ ဇာတိ စာကာသော၊ စတုဇာ ဇရတာ ခယံ၊
ကုတောစိ နေဝ ဇာတံ တပ္ပါကဘေဒံ ဟိ တံ ဒွယံ.
၃၂. ဇာတိယာပိ န ဇာတတ္တံ၊ ကုတောစိဋ္ဌကထာနယာ၊
လက္ခဏာဘာဝတော တဿာ၊ သတိ တသ္မိံ န နိဋ္ဌိတိ.
၃၃. ကမ္မစိတ္တာနလန္နေဟိ၊ ပိဏ္ဍာ နဝ စ သတ္တ စ၊
စတ္တာရော ဒွေ စ ဝိညေယျာ၊ သဇီဝေ ဒွေ အဇီဝကေ.
၃၄. အဋ္ဌကံ ဇီဝိတေနာယုနဝကံ ဘာဝဝတ္ထုနာ၊
စက္ခာဒီ ပဉ္စ ဒသကာ၊ ကလာပါ နဝ ကမ္မဇာ.
၃၅. သုဒ္ဓဋ္ဌဝိညတ္တိယုတ္တနဝကောပိ စ ဒသကော၊
သုဒ္ဓသဒ္ဒေန နဝကော၊ လဟုတာဒိဒသေကကော.
၃၆. ဝိညတ္တိလဟုတာဒီဟိ၊ ပုန ဒွါဒသ တေရသ၊
စိတ္တဇာ ဣတိ ဝိညေယျာ၊ ကလာပါ သတ္တ ဝါ ဆ ဝါ.
၃၇. သုဒ္ဓဋ္ဌံ သဒ္ဒနဝကံ၊ လဟုတာဒိဒသေကကံ၊
သဒ္ဒေနလဟုတာဒီဟိ၊ စတုရောတုဇကဏ္ဏိကာ.
၃၈. သုဒ္ဓဋ္ဌလဟုတာဒီဟိ၊ အန္နဇာ ဒွေတိမေ နဝ၊
သတ္တ စတ္တာရိ ဒွေ စေတိ၊ ကလာပါ ဝီသတီ ဒွိဘိ.
၃၉. တယဋ္ဌကာ စ စတ္တာရော၊ နဝကာ ဒသကာ နဝ၊
တယော ဒွေကော စ ဧကေန၊ ဒသ ဒွီဟိ စ တီဟိ စ.
၄၀. စတုန္နမ္ပိ စ ဓာတူနံ၊ အဓိကံသဝသေနိဓ၊
ရူပဘေဒေါထ ဝိညေယျော၊ ကမ္မစိတ္တာနလန္နဇော.
၄၁. ကေသာဒိမတ္ထလုင်္ဂန္တာ၊ ပထဝံသာတိ ဝီသတိ၊
ပိတ္တာဒိမုတ္တကန္တာ တေ၊ ဇလံသာ ဒွါဒသီရိတာ.
၄၂. ယေန သန္တပ္ပနံ ယေန၊ ဇီရဏံ ဒဟနံ တထာ၊
ယေနသိတာဒိပါကောတိ၊ စတုရံသာနလာဓိကာ.
၄၃. ဥဒ္ဓါဓောဂမကုစ္ဆိဋ္ဌာ၊ ကောဋ္ဌာသေယျင်္ဂသာရိ စ၊
အဿာသောတိ စ ဝိညေယျာ၊ ဆဠံသာ ဝါယုနိဿိတာ.
၄၄. ပုဗ္ဗမုတ္တကရီသဉ္စုဒရိယံ စတုရောတုဇာ၊
ကမ္မာ ပါစဂ္ဂိ စိတ္တမှာ-ဿာသောတိ ဆပိ ဧကဇာ.
၄၅. သေဒသိင်္ဃာနိကဿု စ၊ ခေဠော စိတ္တောတုသမ္ဘဝါ၊
ဒွိဇာ ဒွတ္တိံသ ကောဋ္ဌာသာ၊ သေသာ ဧဝ စတုဗ္ဘဝါ.
၄၆. ဧကဇေသွာဒိစတူသု၊ ဥတုဇာ စတုရဋ္ဌကာ၊
ဇီဝီတနဝကော ပါစေဿာသေ စိတ္တဘဝဋ္ဌကော.
၄၇. ဒွိဇေသု မနတေဇေဟိ၊ ဒွေ ဒွေ ဟောန္တိ ပနဋ္ဌကာ၊
သေသတေဇာနိလံသေသု၊ ဧကေကမှိ တယော တယော.
၄၈. အဋ္ဌကောဇမနဂ္ဂီဟိ၊ ဟောန္တိ အဋ္ဌသု ကမ္မတော၊
အဋ္ဌာယုနဝကာ ဧဝံ၊ ဣမေ အဋ္ဌ စတုဗ္ဘဝါ.
၄၉. စတုဝီသေသု သေသေသု၊ စတုဇေသုဋ္ဌကာ တယော၊
ဧကေကမှိ စ ဝိညေယျာ၊ ပိဏ္ဍာ စိတ္တာနလန္နဇာ.
၅၀. ကမ္မဇာ ကာယဘာဝဝှါ၊ ဒသကာပိ သိယုံ တဟိံ၊
စတုဝီသေသု အံသေသု၊ ဧကေကမှိ ဒုဝေ ဒုဝေ.
၅၁. ပဉ္စာပိ စက္ခုသောတာဒီ၊ ပဒေသဒသကာ ပုန၊
နဝကာ သဒ္ဒသင်္ခါတာ၊ ဒွေတိစ္စေဝံ ကလာပတော.
၅၂. တေပညာသ ဒသေကဉ္စ၊ နဝုတ္တရသတာနိ စ၊
ဒသကာ နဝကာ စေဝ၊ အဋ္ဌကာ စ သိယုံ ကမာ.
၅၃. သေကပဉ္စသတံ ကာယေ၊ သဟဿံ တံ ပဝတ္တတိ၊
ပရိပုဏ္ဏိန္ဒြိယေ ရူပံ၊ နိပ္ဖန္နံ ဓာတုဘေဒတော.
၅၄. စိတ္တုပ္ပါဒေ သိယုံ ရူပ-ဟေတူ ကမ္မာဒယော ပန၊
ဌိတိ န ပါဌေ စိတ္တဿ၊ န ဘင်္ဂေ ရူပသမ္ဘဝေါ.
၅၅. ‘‘အညထတ္တံ ဌိတဿာ’’တိ၊ ဝုတ္တတ္တာဝ ဌိတိက္ခဏံ၊
အတ္ထီတိ စေ ပဗန္ဓေန၊ ဌိတိ တတ္ထ ပဝုစ္စတိ.
၅၆. အထ ဝါ တိက္ခဏေ ကမ္မံ၊ စိတ္တမတ္တုဒယက္ခဏေ၊
ဥတုဩဇာတ္တနော ဌာနေ၊ ရူပဟေတူ ဘဝန္တိ ဟိ.
၅၇. သေယျဿာဒိက္ခဏေ ကာယ-
ဘာဝဝတ္ထုဝသာ တယော၊
ဒသကာ ဟောန္တိဘာဝိဿ၊
ဝိနာ ဘာဝံ ဒုဝေ သိယုံ.
၅၈. တတော ပရဉ္စ ကမ္မဂ္ဂိစိတ္တဇာ တေ စ ပိဏ္ဍိကာ၊
အဋ္ဌကာ စ ဒုဝေ ပုဗ္ဗေ၊ ဝုတ္တဝုတ္တက္ခဏေ ဝဒေ.
၅၉. ကာလေနာဟာရဇံ ဟောတိ၊ စက္ခာဒိဒသကာနိ စ၊
စတုပစ္စယတော ရူပံ၊ သမ္ပိဏ္ဍေဝံ ပဝတ္တတိ.
၆၀. တံ သတ္တရသစိတ္တာယု၊ ဝိနာ ဝိညတ္တိလက္ခဏံ၊
သန္တတာမရဏာ ရူပံ၊ ဇရာဒိဖလမာဝဟံ.
၆၁. ဘင်္ဂါ သတ္တရသုပ္ပါဒေ၊ ဇာယတေ ကမ္မဇံ န တံ၊
တဒုဒ္ဓံ ဇာယတေ တသ္မာ၊ တက္ခယာ မရဏံ ဘဝေ.
၆၂. အာယုကမ္မုဘယေသံ ဝါ၊ ခယေန မရဏံ ဘဝေ၊
ဥပက္ကမေန ဝါ ကေသဉ္စုပစ္ဆေဒကကမ္မုနာ.
၆၃. ဩပပါတိကဘာဝိဿ၊ ဒသကာ သတ္တ ကမ္မဇာ၊
ကာမေ အာဒေါ ဘဝန္တဂ္ဂိဇာဟိ ပုဗ္ဗေဝ ဘူယတေ.
၆၄. အာဒိကပ္ပနရာနဉ္စ၊ အပါယေ အန္ဓကဿ စ၊
ဗဓိရဿာပိ အာဒေါ ဆ၊ ပုဗ္ဗေဝေတရဇာ သိယုံ.
၆၅. တတ္ထေဝန္ဓဗဓိရဿ၊ ပဉ္စ ဟောန္တိ အဘာဝိနော၊
ယုတ္တိယာ ဣဓ ဝိညေယျာ၊ ပဉ္စ ဝါ စတုရောပိ ဝါ.
၆၆. စက္ခာဒိတ္တယဟီနဿ၊ စတုရောဝ ဘဝန္တိတိ၊
ဝုတ္တံ ဥပပရိက္ခိတွာ၊ ဂဟေတဗ္ဗံ ဝိဇာနတာ.
၆၇. ရူပေ ဇီဝိတဆက္ကဉ္စ၊ စက္ခာဒိသတ္တကတ္တယံ၊
ပဉ္စ ဆ ဥတုစိတ္တေဟိ၊ ပဉ္စ ဆာသညိနံ ဘဝေ.
၆၈. ပဉ္စဓာတွာဒိနိယမာ၊ ပါဌေ ဂန္ဓရသောဇနံ၊
နုပ္ပတ္တိ တတ္ထ ဘူတာနံ၊ အဖောဋ္ဌဗ္ဗပဝတ္တိနံ.
၆၉. ထဒ္ဓုဏှီရဏဘာဝေါဝ၊ နတ္ထိ ဓာတွာဒိကိစ္စတော၊
အညံ ဂန္ဓာဒီနံ တေသံ၊ တက္ကိစ္စေနောပလဒ္ဓိတော.
၇၀. ရူပေ သပ္ပဋိဃတ္တာဒိ၊ တတ္ထ ရုပ္ပနတာ ဝိယ၊
ဃဋ္ဋနဉ္စ ရဝုပ္ပါဒဿညတ္ထဿေဝ ဟေတုတာ.
၇၁. ဣစ္ဆိတဗ္ဗမိမေကန္တမေဝံ ပါဌာဝိရောဓတော၊
အထ ဝါ တေဟိ ဝိညေယျံ၊ ဒသကံ နဝကဋ္ဌကံ.
၇၂. သဗ္ဗံ ကာမဘဝေ ရူပံ၊ ရူပေ ဧကူနဝီသတိ၊
အသညီနံ ဒသ ဂန္ဓရသောဇာဟိ စ ဗြဟ္မုနံ.
ဣတိ သစ္စသင်္ခေပေ ရူပသင်္ခေပေါ နာမ
ပဌမော ပရိစ္ဆေဒေါ.