၂. ဒုတိယော ပရိစ္ဆေဒေါ

ခန္ဓတ္တယသင်္ခေပေါ

၇၃. ဝေဒနာနုဘဝေါ တေဓာ၊ သုခဒုက္ခမုပေက္ခယာ၊

ဣဋ္ဌာနိဋ္ဌာနုဘဝနမဇ္ဈာနုဘဝလက္ခဏာ.

၇၄. ကာယိကံ မာနသံ ဒုက္ခံ၊ သုခေါပေက္ခာ စ ဝေဒနာ၊

ဧကံ မာနသမေဝေတိ၊ ပဉ္စဓိန္ဒြိယဘေဒတော.

၇၅. ယထာ တထာ ဝါ သညာဏံ၊ သညာ သတိနိဗန္ဓနံ၊

ဆဓာ ဆဒွါရသမ္ဘူတဖဿဇာနံ ဝသေန သာ.

၇၆. သင်္ခါရာ စေတနာ ဖဿော၊

မနက္ကာရာယု သဏ္ဌိတိ၊

တက္ကော စာရော စ ဝါယာမော၊

ပီတိ ဆန္ဒောဓိမောက္ခကော.

၇၇. သဒ္ဓါ သတိ ဟိရောတ္တပ္ပံ၊ စာဂေါ မေတ္တာ မတိ ပုန၊

မဇ္ဈတ္တတာ စ ပဿဒ္ဓီ၊ ကာယစိတ္တဝသာ ဒုဝေ.

၇၈. လဟုတာ မုဒုကမ္မညပါဂုညမုဇုတာ တထာ၊

ဒယာ မုဒါ မိစ္ဆာဝါစာ၊ ကမ္မန္တာဇီဝသံဝရော.

၇၉. လောဘော ဒေါသော စ မောဟော စ၊ ဒိဋ္ဌိ ဥဒ္ဓစ္စမေဝ စ၊

အဟိရီကံ အနောတ္တပ္ပံ၊ ဝိစိကိစ္ဆိတမေဝ စ.

၈၀. မာနော ဣဿာ စ မစ္ဆေရံ၊ ကုက္ကုစ္စံ ထိနမိဒ္ဓကံ၊

ဣတိ ဧတေဝ ပညာသ၊ သင်္ခါရက္ခန္ဓသညိတာ.

၈၁. ဗျာပါရော စေတနာ ဖဿော၊ ဖုသနံ သရဏံ တဟိံ၊

မနက္ကာရော ပါလနာယု၊ သမာဓိ အဝိသာရတာ.

၈၂. အာရောပနာနုမဇ္ဇဋ္ဌာ၊ တက္ကစာရာ ပနီဟနာ၊

ဝီရိယံ ပီနနာ ပီတိ၊ ဆန္ဒော တု ကတ္တုကာမတာ.

၈၃. အဓိမောက္ခော နိစ္ဆယော သဒ္ဓါ၊

ပသာဒေါ သရဏံ သတိ၊

ဟိရီ ပါပဇိဂုစ္ဆာ ဟိ၊

ဩတ္တပ္ပံ တဿ ဘီရုတာ.

၈၄. အလဂ္ဂေါ စ အစဏ္ဍိက္ကံ၊ စာဂေါ မေတ္တာ မတိ ပန၊

ယာထာဝဗောဓော မဇ္ဈတ္တံ၊ သမဝါဟိတလက္ခဏံ.

၈၅. ဆ ယုဂါနိ ကာယစိတ္တဒရဂါရဝထဒ္ဓတာ-

အကမ္မညတ္တဂေလညကုဋိလာနံ ဝိနောဒနာ.

၈၆. တာနုဒ္ဓတာဒိထိနာဒိဒိဋ္ဌာဒီနံ ယထာက္ကမံ၊

သေသကာဒိအသဒ္ဓါဒိမာယာဒီနံ ဝိပက္ခိနော.

၈၇. ဒုက္ခာပနယနကာမာ၊ ဒယာ မောဒါ ပမောဒနာ၊

ဝစီဒုစ္စရိတာဒီနံ၊ ဝိရာမော ဝိရတိတ္တယံ.

၈၈. လောဘော ဒေါသော စ မောဟော စ၊

ဂေဓစဏ္ဍမနန္ဓနာ၊

ကမေန ဒိဋ္ဌိ ဒုဂ္ဂါဟော၊

ဥဒ္ဓစ္စံ ဘန္တတံ မတံ.

၈၉. အဟိရီကမလဇ္ဇတ္တံ၊ အနောတ္တပ္ပမတာသတာ၊

သံသယော ဝိစိကိစ္ဆာ ဟိ၊ မာနော ဥန္နတိလက္ခဏော.

၉၀. ပရဿကသမ္ပတ္တီနံ၊

ဥသူယာ စ နိဂူဟနာ၊

ဣဿာမစ္ဆေရကာ တာပေါ၊

ကတာကတဿ သောစနာ.

၉၁. ထိနံ စိတ္တဿ သင်္ကောစော၊ အကမ္မညတ္တတာ ပန၊

မိဒ္ဓမိစ္စေဝမေတေသံ၊ လက္ခဏဉ္စ နယေ ဗုဓော.

၉၂. ဝေဒနာဒိသမာဓန္တာ၊ သတ္တ သဗ္ဗဂသညိတာ၊

တက္ကာဒိအဓိမောက္ခန္တာ၊ ဆ ပကိဏ္ဏကနာမကာ.

၉၃. သဒ္ဓါဒယော ဝိရမန္တာ၊ အရဏာ ပဉ္စဝီသတိ၊

လောဘာဒိမိဒ္ဓကန္တာနိ၊ သရဏာနိ စတုဒ္ဒသ.

၉၄. ဣဿာမစ္ဆေရကုက္ကုစ္စဒေါသာ ကာမေ ဒယာ မုဒါ၊

ကာမေ ရူပေ စ သေသာ ဆ-စတ္တာလီသ တိဓာတုဇာ.

၉၅. ဆန္ဒနိစ္ဆယမဇ္ဈတ္တမနက္ကာရာ သဥဒ္ဓဝါ၊

ဒယာဒီ ပဉ္စ မာနာဒီ၊ ဆ ယေဝါပန သောဠသ.

၉၆. ဆန္ဒာဒီ ပဉ္စ နိယတာ၊ တတ္ထေကာဒသ နေတရာ၊

အဟိရီကမနောတ္တပ္ပံ၊ လောကနာသနကံ ဒွယံ.

၉၇. ဧတေ ဒွေ မောဟုဒ္ဓစ္စာတိ၊ စတ္တာရော ပါပသဗ္ဗဂါ၊

လောကပါလဒုကံ ဝုတ္တံ၊ ဟိရိဩတ္တပ္ပနာမကံ.

၉၈. အာရမ္မဏူပနိဇ္ဈာနာ၊ ဈာနင်္ဂါ တက္ကစာရကာ၊

ပီတိ ဧကဂ္ဂတာ စေတိ၊ သတ္တ ဝိတ္တိတ္တယေန ဝေ.

၉၉. သဒ္ဓါ သတိ မတေကဂ္ဂ-ဓိတိ လောကဝိနာသကာ၊

ပါလကာ နဝ စေတာနိ၊ ဗလာနိ အဝိကမ္ပတော.

၁၀၀. ဧတ္ထ သဒ္ဓါဒိပဉ္စာယု၊ ကတွာတြ စတုဓာ မတိံ၊

ဝေဒနာဟိ ဒွိသတ္တေတေ၊ ဣန္ဒြိယာနာဓိပစ္စတော.

၁၀၁. မနရူပိန္ဒြိယေဟေတေ၊ သဗ္ဗေ ဣန္ဒြိယနာမကာ၊

ဗာဝီသတိ ဘဝန္တာယုဒွယံ ကတွေကသင်္ဂဟံ.

၁၀၂. ဒိဋ္ဌီဟေကဂ္ဂတာတက္ကသတီဝိရတိယော ပထာ၊

အဋ္ဌ နိယျာနတော အာဒိစတုရော ဘိတွာန ဒွါဒသ.

၁၀၃. ဖဿော စ စေတနာ စေဝ၊

ဒွေဝေတ္ထာဟာရဏတ္တတော၊

အာဟာရာ မနဝေါဇာဟိ၊

ဘဝန္တိ စတုရောထဝါ.

၁၀၄. ဟေတု မူလဋ္ဌတော ပါပေ၊

လောဘာဒိတ္တယမီရိတံ၊

ကုသလာဗျာကတေ စာပိ၊

အလောဘာဒိတ္တယံ တထာ.

၁၀၅. ဒိဋ္ဌိလောဘဒုသာ ကမ္မပထာပါယဿ မဂ္ဂတော၊

တဗ္ဗိပက္ခာ သုဂတိယာ၊ တယောတိ ဆ ပထီရိတာ.

၁၀၆. ပဿဒ္ဓါဒိယုဂါနိ ဆ၊ ဝဂ္ဂတ္တာ ယုဂဠာနိ တု၊

ဥပကာရာ သတိ ဓီ စ၊ ဗဟူပကာရဘာဝတော.

၁၀၇. ဩဃာဟရဏတော ယောဂါ၊

ယောဇနေနာဘဝဂ္ဂတော၊

သဝနေနာသဝါ ဒိဋ္ဌိ-

မောဟေဇေတ္ထ ဒုဓာ လုဘော.

၁၀၈. ဒဠှဂ္ဂါဟေန ဒိဋ္ဌေဇာ၊ ဥပါဒါနံ တိဓာ တဟိံ၊

ဒိဋ္ဌိ ဒေါသေန တေ ဂန္ထာ၊ ဂန္ထတော ဒိဋ္ဌိဟ ဒွိဓာ.

၁၀၉. ပဉ္စာဝရဏတော ကာမ-ကင်္ခါဒေါသုဒ္ဓဝံ တပေါ၊

ထိနမိဒ္ဓဉ္စ မောဟေန၊ ဆ ဝါ နီဝရဏာနိထ.

၁၁၀. ကတွာ တာပုဒ္ဓဝံ ဧကံ၊ ထိနမိဒ္ဓဉ္စ ဝုစ္စတိ၊

ကိစ္စဿာဟာရတော စေဝ၊ ဝိပက္ခဿ စ လေသတော.

၁၁၁. ဒိဋ္ဌေဇုဒ္ဓဝဒေါသန္ဓ-

ကင်္ခါထိနုဏ္ဏတီ ဒသ၊

လောကနာသယုဂေနေတေ၊

ကိလေသာ စိတ္တက္လေသတော.

၁၁၂. လောဘဒေါသမူဟမာန-ဒိဋ္ဌိကင်္ခိဿမစ္ဆရာ၊

သံယောဇနာနိ ဒိဋ္ဌေဇာ၊ ဘိတွာ ဗန္ဓနတော ဒုဓာ.

၁၁၃. တာနိ မောဟုဒ္ဓဝံမာနကင်္ခါဒေါသေဇဒိဋ္ဌိယော၊

ဒုဓာဒိဋ္ဌိ တိဓာ လောဘံ၊ ဘိတွာ သုတ္တေ ဒသီရိတာ.

၁၁၄. ဒိဋ္ဌိလောဘမူဟမာနဒေါသကင်္ခါ တဟိံ ဒုဓာ၊

ကတွာ လောဘမိမေ သတ္တာနုသယာ သမုဒီရိတာ.

၁၁၅. ဒိဋ္ဌိ ဧဝ ပရာမာသော၊ ဉေယျော ဧဝံ သမာသတော၊

အတ္ထော သင်္ခါရက္ခန္ဓဿ၊ ဝုတ္တော ဝုတ္တာနုသာရတော.

ဣတိ သစ္စသင်္ခေပေ ခန္ဓတ္တယသင်္ခေပေါ နာမ

ဒုတိယော ပရိစ္ဆေဒေါ.