လောကုတ္တရဝိပါကဝဏ္ဏနာ

မဂ္ဂစိတ္တဿ ဝိယ ဖလစိတ္တဿ မဂ္ဂယောဂတော ဘေဒါဘာဝေန ‘‘စတုမဂ္ဂယောဂတော’’တိ အဝတွာ ‘‘စတုမဂ္ဂသမ္ပယုတ္တစိတ္တဖလတ္တာ’’တိ ဝုတ္တံ၊ စတူဟိ အရိယမဂ္ဂေဟိ သမ္ပယုတ္တကုသလစိတ္တဿ ဖလတ္တာ စတုဗ္ဗိဓသာမညဖလသမ္ပယုတ္တစိတ္တဘာဝတောတိ အတ္ထော. သောတာပတ္တိမဂ္ဂဿ ဖလံ စိတ္တံ သောတာပတ္တိမဂ္ဂဖလစိတ္တံ. ဧဝံ သေသေသု. မဂ္ဂဝီထိယံ ဒွိက္ခတ္တုံ၊ တိက္ခတ္တုံ ဝါ ဖလသမာပတ္တိယာ အပရိစ္ဆိန္နပရိမာဏံ ပဝတ္တမာနမ္ပိ ဒွီသွေဝ ဌာနေသု ပဝတ္တိယာ ဒုဝိဓမေဝ ဟောတီတိ အာဟ ‘‘မဂ္ဂဝီထိဖလသမာပတ္တိဝသေန ပဝတ္တိတော ဒုဝိဓ’’န္တိ.

၅၀-၁. မဂ္ဂဿာနန္တရေ ဖလေ လဗ္ဘန္တိ မဂ္ဂါဂမနတောတိ အဓိပ္ပါယော. မဂ္ဂေါ ဟိ အာဂမနတော ‘‘သုညတော’’တိ လဒ္ဓနာမော သဂုဏာလမ္ဗဏဝသေန အနိမိတ္တအပ္ပဏိဟိတနာမမ္ပိ လဘတီတိ ဖလဿ နာမတ္တယမ္ပိ ဒေတိ၊ တထာ အာဂမနတော အပ္ပဏိဟိတော မဂ္ဂေါ သဂုဏာရမ္မဏဝသေန အနိမိတ္တသုညတအပ္ပဏိဟိတနာမကောတိ ဖလဿ နာမတ္တယမ္ပိ ဒေတိ. ဧဝဉ္စ ကတွာ အဘိဓမ္မေ ဧကေကဿ ဖလဿ တီဏိ တီဏိ နာမာနိ ဝုတ္တာနိ. နနု စ အဘိဓမ္မေ ‘‘သဂုဏာရမ္မဏတော နာမံ အနဓိပ္ပေတ’’န္တိ ဝုတ္တံ? သစ္စံ ဝုတ္တံ၊ တံ ပန နာမလာဘံ သန္ဓာယ၊ န နာမဒါနံ. တတ္ထ ဟိ ဝဝတ္ထာနကရတ္တာဘာဝတော တထာ အနဓိပ္ပေတံ၊ န အလဗ္ဘနတော. ဣဓ ပန ဧကေကဿ ဖလံ နာမတ္တယမ္ပိ လဘတီတိ ဝဝတ္ထာနပ္ပယောဇနာဘာဝတော သဂုဏာရမ္မဏေဟိ လဒ္ဓနာမဒါနဿ အဓိပ္ပေတတ္တာ တိဝိဓမ္ပိ နာမံ ဒေတိ. ဧကန္တေန စေတံ ဧဝံ သမ္ပဋိစ္ဆိတဗ္ဗံ၊ ဣတရထာ ဝိပဿနာပိ ဝိပဿတော လဒ္ဓနာမမဂ္ဂဿ တံ န ဒဒေယျာတိ. ပရဘာဂသ္မိန္တိ အပရဘာဂေ. ဝဠဉ္ဇနဖလေသူတိ သမာပဇ္ဇနဝသေန အနုဘဝိတဗ္ဗဖလေသု. ‘‘ဝဠဉ္ဇနဖလေသု နာ’’တိ မဂ္ဂါဂမနံ သန္ဓာယ ပဋိက္ခိတ္တန္တိ အာဟ ‘‘ဝိပဿနာဝသေနေဝါ’’တိအာဒိ. ဝဠဉ္ဇနဖလဉှိ ဝိသုံ ဝိပဿနာဝသေနေဝ နိဗ္ဗတ္တတီတိ တဿ တံဝသေန နာမလာဘော. ယဒိ ဧဝံ မဂ္ဂဿ ဝိယ အနိမိတ္တနာမလာဘော န သိယာ? တံ န၊ ယထာ မဂ္ဂါနန္တရဿ ဖလဿ ဝိယ ဝဠဉ္ဇနကဖလသမာပတ္တိယာပိ မဂ္ဂါဂမနတော စ ဈာနပဋိပဒါဘေဒေါ ဟောတိ၊ ဧဝံ အနိမိတ္တနာမမ္ပိ လဗ္ဘတီတိ.

၅၂-၃. ဟောန္တိ သာဓိပတီနေဝါတိ ဧတ္ထ ကာရဏံ ဝုတ္တမေဝ. မဂ္ဂဘာဝေနာတိ သောဠသဟိ အာကာရေဟိ စတုသစ္စပဋိဝေဓကမဂ္ဂဘာဝေန၊ ကိလေသမာရဏဝသေန ဂမနသင်္ခါတေန၊ နိဗ္ဗာနတ္ထိကေဟိ မဂ္ဂိတဗ္ဗဘာဝသင်္ခါတေန ဝါ မဂ္ဂဘာဝေန. ဖလံ။ပေ။ ဝုစ္စတီတိ သယံ ဖလဘာဝမ္ပိ မဂ္ဂဿ ဖလတ္တာ၊ တံသဒိသတာယ ဝါ တမုပါဒါယ မဂ္ဂေါတိ ဝုစ္စတိ ‘‘မဂ္ဂင်္ဂံ မဂ္ဂပရိယာပန္န’’န္တိအာဒီသူတိ အဓိပ္ပါယော.

လောကုတ္တရဝိပါကဝဏ္ဏနာ နိဋ္ဌိတာ.