သုတ္တန္တိကဒုကမာတိကတ္ထဝဏ္ဏနာ

သုတ္တန္တိကဒုကေသု ဝေဒေတိ၊ ဝိဝိဓေန ဝါ အာကာရေန ဇာနာတီတိ ဝိဇ္ဇာ၊ ဝိပဿနာဉာဏမနောမယိဒ္ဓိဆအဘိညာဝသပ္ပဝတ္တာ ပညာ၊ တသ္မိံ ဝိဇ္ဇာဘာဂေ ဝိဇ္ဇာကောဋ္ဌာသေ ဝိဇ္ဇာသဘာဝေ ဝတ္တန္တီတိ ဝိဇ္ဇာဘာဂိနော. တာ ဧဝ ဝိဇ္ဇာ၊ တံ ဝါ ဝိဇ္ဇံ သမ္ပယောဂဝသေန ဘဇန္တီတိပိ ဝိဇ္ဇာဘာဂိနော၊ အဋ္ဌဝိဓဝိဇ္ဇာသမ္ပယုတ္တဓမ္မာ. တာသု ယာ ကာစိ ဧကာ ဝိဇ္ဇာ ဝိဇ္ဇာ၊ သေသာ ဝိဇ္ဇာဘာဂိနောတိ ဧဝံ ဝိဇ္ဇာပိ ဝိဇ္ဇာသမ္ပယုတ္တဓမ္မာပိ ဝိဇ္ဇာဘာဂိနောတွေဝ ဝေဒိတဗ္ဗာ၊ ဣဓ ပန ဝိဇ္ဇာသမ္ပယုတ္တာ ဓမ္မာဝ အဓိပ္ပေတာ. န ဝိဇာနာတီတိ အဝိဇ္ဇာ၊ စတုသစ္စစ္ဆာဒကဝသေန စတုဗ္ဗိဓော မောဟော၊ တသ္မိံ အဝိဇ္ဇာဘာဂေ အဝိဇ္ဇာကောဋ္ဌာသေ အဝိဇ္ဇာသဘာဝေ ဝတ္တန္တီတိ အဝိဇ္ဇာဘာဂိနော. တာ ဧဝ အဝိဇ္ဇာ၊ တံ ဝါ အဝိဇ္ဇံ သမ္ပယောဂဝသေန ဘဇန္တီတိပိ အဝိဇ္ဇာဘာဂိနော၊ အဝိဇ္ဇာသမ္ပယုတ္တဓမ္မာ. ဧဝံ အဝိဇ္ဇာပိ အဝိဇ္ဇာသမ္ပယုတ္တဓမ္မာပိ အဝိဇ္ဇာဘာဂိနောတွေဝ ဝေဒိတဗ္ဗာ၊ ဣဓ ပန အဝိဇ္ဇာသမ္ပယုတ္တဓမ္မာဝ အဓိပ္ပေတာ.

တတ္ထ အရဟတ္တမဂ္ဂစိတ္တံ၊ ပညာဝိရဟိတတံသမ္ပယုတ္တာ စ ဝိဇ္ဇာဘာဂိနော စ ဉာဏသမ္ပယုတ္တကာမာဝစရဇဝနာနိ၊ ဉာဏဝိရဟိတတံသမ္ပယုတ္တာ စ ဝိပဿနာဘာဝေန ပဝတ္တိယံ ဝိဇ္ဇာဘာဂိနော၊ အညဒါ န ဝတ္တဗ္ဗာ. ရူပါဝစရစတုတ္ထဇ္ဈာနိကဇဝနစိတ္တာနိ၊ ပညာဝိရဟိတတံသမ္ပယုတ္တာ စ မနောမယိဒ္ဓိဘာဝေန စ ပဉ္စာဘိညာဘာဝေန စ ပဝတ္တိယံ ဝိဇ္ဇာဘာဂိနော၊ အညဒါ န ဝတ္တဗ္ဗာ. တတ္ထ ဒွါဒသာကုသလစိတ္တာနိ၊ အဝိဇ္ဇာဝိရဟိတတံသမ္ပယုတ္တာ စ အဝိဇ္ဇာဘာဂိနောဝ၊ ဣဓ ပန အဝိဇ္ဇာ၊ သေသစိတ္တရူပနိဗ္ဗာနာနိ စ န ဝတ္တဗ္ဗာဝ. စေတသိကေသု ပန မောဟအပ္ပမညာ န ဝတ္တဗ္ဗာဝ၊ သေသာ ကုသလာဗျာကတာ သိယာ ဝိဇ္ဇာဘာဂိနော၊ သိယာ န ဝတ္တဗ္ဗာ၊ တိဇာတိကာ ဒွိဓာပိ န ဝတ္တဗ္ဗာ စ. သေသံ သုဝိညေယျမေဝ. ပဌမံ.

ပုန အနဇ္ဈောတ္ထရဏဝသေန ကိလေသန္ဓကာရံ ဝိဒ္ဓံသေတုံ အသမတ္ထတာယ ဝိဇ္ဇု ဥပမာ ဧတေသန္တိ ဝိဇ္ဇူပမာ၊ အာဒိတော တီသု မဂ္ဂေသု ဉာဏံဝ. နိဿေသံ ဝိဒ္ဓံသနသမတ္ထတာယ ဝဇိရံ ဥပမာ ဧတေသန္တိ ဝဇိရူပမာ၊ အရဟတ္တမဂ္ဂေ ဉာဏံ. ယထာ ဟိ မေဃန္ဓကာရေ မဂ္ဂပဋိပန္နဿ ပဋိစ္ဆာဒနအန္ဓကာရံ ဝိဓမိတွာ ဝိဇ္ဇုယာ ဥပ္ပန္နက္ခဏေ စာတုဒိသာ မဂ္ဂါ ပါကဋာ ဟောန္တိ၊ ဝိဇ္ဇုယာ နိရုဒ္ဓါယ ပုန အန္ဓကာရော ဩတ္ထရိတွာ မဂ္ဂံ ပဋိစ္ဆာဒေတိ၊ ဧဝံ ဝိပဿနာယာနိကဿ ယထာသကံ သစ္စစ္ဆာဒကကိလေသန္ဓကာရံ ဝိဓမိတွာ တီသု မဂ္ဂေသု ယထာက္ကမံ ဥပ္ပန္နေသု စတ္တာရိ သစ္စာနိ ပါကဋာနိ ဟောန္တိ၊ တေသု နိရုဒ္ဓေသု ပုန အဝသိဋ္ဌကိလေသန္ဓကာရော စတုသစ္စံ ပဋိစ္ဆာဒေတိ၊ တသ္မာ တီသု မဂ္ဂေသု ပညာ ဝိဇ္ဇူပမာ ဝုတ္တာ. ယထာ ပန ဝဇိရဿ အဘေဇ္ဇော ပါသာဏော နာမ နတ္ထိ၊ တဉ္စ နိဿေသတော ဝဇိရံ ခေပေတိ၊ ဝဇိရေန စ ဂတမဂ္ဂေ ပါသာဏဿ ပုန ပါကတိကဘာဝေါ နတ္ထိ၊ ဧဝံ အရဟတ္တမဂ္ဂဉာဏဿ အဝဇ္ဈကိလေသော နာမ နတ္ထိ၊ တဉ္စ နိဿေသတော အရဟတ္တမဂ္ဂဉာဏံ ခေပေတိ၊ တေန စ ခေပိတေ ကိလေသေ အဝသိဋ္ဌကိလေသာဘာဝတော တဿ ပုန ပစ္စုဒါဝတ္တနံ နာမ နတ္ထိ၊ တသ္မာ စတုတ္ထမဂ္ဂေ ပညာ ဝဇိရူပမာ ဝုတ္တာ. ပညာ ဧဝ ဟေတ္ထ သိယာ ဝိဇ္ဇူပမာ၊ သိယာ န ဝတ္တဗ္ဗာ စ ဟောတိ. သေသစေတသိကစိတ္တရူပနိဗ္ဗာနာနိ ပန သဗ္ဗာနိ န ဝတ္တဗ္ဗာနေဝ. ဒုတိယံ.

ဗာလေသု ဌိတတ္တာ၊ ယတ္ထ ဌိတာ တဒုပစာရေန ဗာလာ၊ ဗာလကရတ္တာ ဝါ ဗာလာ၊ ဒွါဒသာကုသလစိတ္တာနိ. ဣဓ ပန အဟိရိကဉ္စ အနောတ္တပ္ပဉ္စ ဗာလာ နာမ. ပဏ္ဍိတေသု ဌိတတ္တာ ပဏ္ဍိတာ၊ ပဏ္ဍိတကရတ္တာ ဝါ ပဏ္ဍိတာ၊ ဧကဝီသတိ ကုသလစိတ္တာနိ. ဣဓ ပန ဟိရီ စ ဩတ္တပ္ပဉ္စ ပဏ္ဍိတာ နာမ. သေသစိတ္တရူပနိဗ္ဗာနာနိ န ဝတ္တဗ္ဗာနိ. သေသံ သုဝိညေယျမေဝ. တတိယံ.

ကဏှာတိ ကာဠကာ၊ စိတ္တဿ အပဘဿရဘာဝကရဏာ. သုက္ကာတိ ဩဒါတာ၊ ပဘဿရဘာဝကရဏာ. သေသံ သဗ္ဗံ ဗာလဒုကသဒိသမေဝ. စတုတ္ထံ.

ဣဓ စေဝ သမ္ပရာယေ စ တပေန္တီတိ တပနီယာ. န တပနီယာ အတပနီယာ. သေသံ ဗာလဒုကသဒိသမေဝ. ပဉ္စမံ.

‘‘သိရိဝဍ္ဎကော ဓနဝဍ္ဎကော’’တိအာဒယော ဝိယ ဝစနမတ္တမေဝ အဓိကာရံ ကတွာ ပဝတ္တာ အဓိဝစနာ နာမ. နာမဓေယျန္တိ တေသံ တေသံ ဓမ္မာနံ နာမာနိ. တာနိ စတုဗ္ဗိဓာနိ သာမညနာမံ ဂုဏနာမံ ကိတ္တိမနာမံ ဩပပါတိကနာမန္တိ. တတ္ထ ပဌမကပ္ပိကေသု မဟာဇနေန သမ္မန္နိတွာ ဌပိတတ္တာ ‘‘မဟာသမ္မတော’’တိ ရညော နာမန္တိ ဧဝရူပံ သာမညနာမံ နာမ. ‘‘ဓမ္မကထိကော ပံသုကူလိကော ကာဠော ရဿော’’တိ ဧဝရူပံ ဂုဏတော အာဂတံ၊ ‘‘ဘဂဝါ အရဟံ သမ္မာသမ္ဗုဒ္ဓေါ’’တိအာဒီနိပိ တထာဂတဿ အနေကာနိ နာမသတာနိ ဂုဏနာမံ နာမ. ယံ ပန ဇာတဿ ကုမာရဿ ဉာတကာ ကပ္ပေတွာ ပကပ္ပေတွာ ‘‘အယံ အသုကော နာမာ’’တိ နာမံ ကရောန္တိ၊ ဣဒံ ကိတ္တိမနာမံ နာမ. ယာ ပန ပုရိမပညတ္တိ အပရပညတ္တိယံ နိပတတိ၊ သေယျထိဒံ – ပုရိမကပ္ပေပိ စန္ဒော စန္ဒော ဧဝ၊ ဧတရဟိပိ အနာဂတေပိ စန္ဒော ဧဝ. တထာ ‘‘သူရိယော သမုဒ္ဒေါ ပထဝီ ရူပံ ဝေဒနာ သညာ သင်္ခါရာ ဝိညာဏံ နိဗ္ဗာန’’န္တိဧဝမာဒိ ဩပပါတိကနာမံ နာမ. တာနိ ပုန ဝိဇ္ဇမာနပညတ္တိ အဝိဇ္ဇမာနပညတ္တိ ဝိဇ္ဇမာနေနအဝိဇ္ဇမာနပညတ္တိ အဝိဇ္ဇမာနေနဝိဇ္ဇမာနပညတ္တိ ဝိဇ္ဇမာနေနဝိဇ္ဇမာနပညတ္တိ အဝိဇ္ဇမာနေနအဝိဇ္ဇမာနပညတ္တီတိ ဧဝံ နာမပညတ္တိဝသေန ဆဗ္ဗိဓာနိ ဟောန္တိ.

တတ္ထ ပရမတ္ထတော ဥပလဗ္ဘမာနာ ယထာဝုတ္တဒွါသတ္တတိဝိဓာ နာမရူပဓမ္မာ ဝိဇ္ဇမာနာ နာမ၊ တေသံ ပကာရေဟိ ဉာပနတော ပညတ္တိ ဝိဇ္ဇမာနပညတ္တိ နာမ၊ ‘‘စိတ္တံ ဖဿော ပထဝီ ရူပံ နိဗ္ဗာန’’န္တိအာဒယော ပရမတ္ထဝါစကာ သဒ္ဒါ. ဥပါဒိန္နနာမရူပဓမ္မေ ပန ဥပါဒါယ ပညတ္တာ သတ္တပုဂ္ဂလဣတ္ထိပုရိသဒေဝမနုဿတိရစ္ဆာနာဒိဘေဒါ၊ အနုပါဒိန္နရူပဓမ္မေ ဥပါဒါယ ပညတ္တာ ဘူမိပဗ္ဗတရုက္ခသကဋစန္ဒသူရိယနက္ခတ္တဒိသာကာလကသိဏာဒိဘေဒါ စ ပရမတ္ထတော အနုပလဗ္ဘမာနာ အဝိဇ္ဇမာနာ နာမ၊ တေသံ ပညတ္တိ အဝိဇ္ဇမာနပညတ္တိ နာမ. တထာ ‘‘အတ္တာ ဘူမီ’’တိအာဒယော အတ္ထပညတ္တိဝါစကာ သဒ္ဒါ စ စိတ္တသန္တတိဝဏ္ဏုပဂန္တိအာဒိ ဝိဇ္ဇမာနတ္ထဝါစကာ သဒ္ဒါ ဝိဇ္ဇမာနေနအဝိဇ္ဇမာနပညတ္တိ နာမ. ‘‘ပုရိသဿ စိတ္တံ၊ မေဃဝဏ္ဏော’’တိအာဒီသု အဝိဇ္ဇမာနေနဝိဇ္ဇမာနပညတ္တိ နာမ. ‘‘စိတ္တလဟုတာ ပထဝီဂန္ဓော’’တိအာဒိ ဝိဇ္ဇမာနေနဝိဇ္ဇမာနပညတ္တိ နာမ. ‘‘မနုဿသရီရံ ရုက္ခသာခါ’’တိအာဒိ အဝိဇ္ဇမာနေနအဝိဇ္ဇမာနပညတ္တိ နာမ. ဧဝံ ဆဗ္ဗိဓာပိ စေတာ အဓိပ္ပါယံ ဝိညာပေတုကာမတာစိတ္တသမုဋ္ဌာပိတသဝိညတ္တိသဒ္ဒါနုသာရေန ဉာတသင်္ကေတဿ သောတဝိညာဏဝီထိအနန္တရံ ဥပ္ပန္နေဟိ မနောဒွါရိကဝိညာဏေဟိ ‘‘ဣမဿေဒံ နာမ’’န္တိ အနေကသဒ္ဒေသု ဧကတ္တမာရောပေတွာ ဝဝတ္ထာပိတာ အတ္ထာဘိမုခံ နမနတော ပကာရေဟိ အတ္ထဿ ဉာပနတော ‘‘နာမပညတ္တီ’’တိ ဝုစ္စန္တိ၊ တေသံ အဓိဝစနာနံ ပထာ အတ္ထာ အဓိဝစနပထာ၊ သမ္မုတိပရမတ္ထဘေဒါ သဗ္ဗေ ဓမ္မာ သဒ္ဒဝစနီယသဘာဝါ. ဆဋ္ဌံ.

ဣတော ပရံ ဒွေ ဒုကာ အဓိဝစနဒုကသဒိသာဝ၊ ကေဝလံ ပဒတ္ထမတ္တမေဝ ဝိသေသော. တတ္ထ အဘိသင်္ခရောန္တီတိ သင်္ခါရာတိ ဧဝံ နိဒ္ဓါရေတွာ သဟေတုကံ ကတွာ ဝုစ္စမာနာ နိရုတ္တိ နာမ၊ ‘‘တက္ကော ဝိတက္ကော သင်္ကပ္ပေါ’’တိ ဧဝံ တေန တေန ပကာရေန ဉာပနတော ပညတ္တိ နာမ၊ ယထာဝုတ္တနာမပညတ္တိယောဝ. န ဟိ အဓိဝစနနိရုတ္တိပညတ္တီသု အတ္ထတော ကောစိပိ ဘေဒေါ အတ္ထိ၊ နိဗ္ဗတ္တိနိမိတ္တဘေဒဒဿနတ္ထံ ပန နေသံ ဝိဘာဂေန ပဒတ္ထော ဒဿိတော. ဣမေသု စ တီသု ဒုကေသု ပညတ္တိသဟိတာ သဗ္ဗေ ဓမ္မာ လဗ္ဘန္တိ၊ အနန္တရေ နာမရူပဒုကေ ပညတ္တိရဟိတာတိ ဣမေ စတ္တာရော ဒုကာ ဣမေသု သုတ္တန္တိကဒုကေသု နိပ္ပဒေသာ၊ သေသာ ပန အဋ္ဌတိံသာပိ သပ္ပဒေသာတိ ဝေဒိတဗ္ဗာ. သတ္တမဋ္ဌမာနိ.

နာမကရဏဋ္ဌေန၊ နမနဋ္ဌေန၊ နာမနဋ္ဌေန စ နာမံ၊ အရူပက္ခန္ဓနိဗ္ဗာနာနိ. တာနိ ဟိ သဗ္ဗဒါပိ ဝေဒနာ သညာ သင်္ခါရာ ဝိညာဏံ နိဗ္ဗာနန္တိ ဩပပါတိကနာမဝသေန အတ္တနော နာမံ ကရောန္တာဝ ပဝတ္တန္တိ စန္ဒသူရိယာဒယော ဝိယ. န ဟိ တေသံ သာမညဂုဏကိတ္တိမဝသေန နာမကရဏကိစ္စံ အတ္ထီတိ. ဧဝံ နာမကရဏဋ္ဌေန နာမံ ဝေဒိတဗ္ဗံ. အာရမ္မဏာဘိမုခံ ပန နမနဋ္ဌေန၊ အညမညံ တတ္ထ နာမနဋ္ဌေန စ စတ္တာရော အရူပက္ခန္ဓာဝ နာမံ. နိဗ္ဗာနံ ပန အာရမ္မဏာဓိပတိပစ္စယတာယ အတ္တနိ အနဝဇ္ဇဓမ္မာနံ နာမနဋ္ဌေနေဝ နာမံ ဝေဒိတဗ္ဗံ. ရုပ္ပနဋ္ဌေန ရူပံ၊ ရူပက္ခန္ဓော. နဝမံ.

အဝိဇ္ဇာတိ ဒုက္ခာဒိပဋိစ္ဆာဒကော သဗ္ဗော မောဟော. ဘဝတဏှာတိ ဘဝပတ္ထနာဝသေန ပဝတ္တော လောဘော. တထာ အပ္ပဝတ္တော ပနေတ္ထ လောဘော၊ သေသစေတသိကစိတ္တရူပနိဗ္ဗာနာနိ စ န ဝတ္တဗ္ဗာနိ. ဣတော ပရံ ပန ဧဝံ နဝတ္တဗ္ဗဝိဘာဂံ အဒဿေတွာ ပဒတ္ထသရူပမတ္တမေဝ ဒဿယိဿာမ၊ ဒဿိတာဝသေသာ န ဝတ္တဗ္ဗာတိ ဂဟေတဗ္ဗာ. ဒသမံ.

ဘဝေါ ဝုစ္စတိ သဿတံ. ‘‘ဘဝိဿတိ အတ္တာ စ လောကော စာ’’တိ သဿတဝသေန ဥပ္ပဇ္ဇနကဒိဋ္ဌိ ဘဝဒိဋ္ဌိ နာမ. ဝိဘဝေါ ဝုစ္စတိ ဥစ္ဆေဒေါ. ‘‘န ဘဝိဿတိ အတ္တာ စ လောကော စာ’’တိ ဥစ္ဆေဒဝသေန ဥပ္ပဇ္ဇနကဒိဋ္ဌိ ဝိဘဝဒိဋ္ဌိ နာမ. ဥဘယေနာပိ မိစ္ဆာဒိဋ္ဌိ ဂဟိတာ. တထာ အနန္တရေသုပိ တီသု ဒုကေသု. ဧကာဒသမံ.

ခန္ဓပဉ္စကံ ‘‘အတ္တာ စ လောကော စာ’’တိ ဂဟေတွာ ‘‘သဿတော အတ္တာ စ လောကော စာ’’တိ ပဝတ္တာ ဒိဋ္ဌိ သဿတဒိဋ္ဌိ နာမ. တထာ ‘‘ဥစ္ဆိဇ္ဇိဿတီ’’တိ ပဝတ္တာ ဒိဋ္ဌိ ဥစ္ဆေဒဒိဋ္ဌိ နာမ. ‘‘အန္တဝါ’’တိ ပဝတ္တာ အန္တဝါဒိဋ္ဌိ နာမ. ‘‘အနန္တဝါ’’တိ ပဝတ္တာ အနန္တဝါဒိဋ္ဌိ နာမ. ပုဗ္ဗန္တံ အနုဂတာ ဗြဟ္မဇာလေ ဝုတ္တနယေန အတီတကောဋ္ဌာသံ အာရမ္မဏံ ကတွာ ပဝတ္တာ အဋ္ဌာရသဝိဓာ ပုဗ္ဗန္တာနုဒိဋ္ဌိ နာမ. အပရန္တံ အနုဂတာ တတ္ထေဝ အာဂတနယေန အနာဂတကောဋ္ဌာသံ အာရမ္မဏံ ကတွာ ပဝတ္တာ စတုစတ္တာလီသဝိဓာ အပရန္တာနုဒိဋ္ဌိ နာမ. အယမေတ္ထ သင်္ခေပေါ၊ ဝိတ္ထာရော ပန ဗြဟ္မဇာလေ (ဒီ. နိ. ၁.၂၈)၊ တဒဋ္ဌကထာယ (ဒီ. နိ. အဋ္ဌ. ၁.၂၈) စ ဝေဒိတဗ္ဗော. ဒွါဒသမတေရသမစုဒ္ဒသမာနိ.

အဟိရိကဒုကံ၊ ဟိရိဒုကဉ္စ သုဝိညေယျမေဝ. ပဉ္စဒသမသောဠသမာနိ.

ဒုက္ခံ ဝစော ဧတသ္မိံ ဝိပ္ပဋိကူလဂါဟိမှိ ဝိပစ္စနီကသာတေ အနာဒရေ ပုဂ္ဂလေတိ ဒုဗ္ဗစော၊ သဟဓမ္မိကံ ဒဿေတွာ ဩဝဒိယမာနေ အနာဒရကာရကော ပုဂ္ဂလော၊ တဿ ကမ္မံ ဒေါဝစဿံ၊ တဿ ဘာဝေါ ဒေါဝစဿတာ၊ အနာဒရဝသေန ပဝတ္တာ ဒွေ ပဋိဃစိတ္တာ၊ တံသမ္ပယုတ္တာ စ. ပါပါ အဿဒ္ဓါဒယော ပုဂ္ဂလာ ဧတဿ မိတ္တာတိ ပါပမိတ္တော၊ တဿ ဘာဝေါ ပါပမိတ္တတာ၊ ပါပပုဂ္ဂလေသု ဒဠှဘတ္တိဝသေန၊ ကာယစိတ္တေဟိ တံသေဝနာတန္နိန္နတာဝသေန စ ပဝတ္တာနိ အဋ္ဌ လောဘစိတ္တာနိ. သတ္တရသမံ.

သောဝစဿတာ၊ ကလျာဏမိတ္တတာ စ ဝုတ္တပဋိပက္ခဝသေန ဝေဒိတဗ္ဗာ. အတ္ထတော ပန တထာပဝတ္တာနိ သဟေတုကကာမာဝစရကုသလကိရိယစိတ္တာနိ. အဋ္ဌာရသမံ.

ပဉ္စသု၊ သတ္တသု ဝါ အာပတ္တီသု ကုသလဘာဝေါ အာပတ္တိကုသလတာ၊ သဟ ဝတ္ထုနာ တာသံ အာပတ္တီနံ အာပဇ္ဇနပရိစ္ဆေဒဇာနနဝသေန ပဝတ္တာ ကာမာဝစရဇဝနပညာ. အာပတ္တီဟိ ဝုဋ္ဌာနေ ကုသလဘာဝေါ အာပတ္တိဝုဋ္ဌာနကုသလတာ၊ ဝုဋ္ဌာနဝိဓာနေန သဒ္ဓိံ အာပတ္တိဝုဋ္ဌာနပရိစ္ဆေဒဇာနနဝသေန ပဝတ္တာ ယထာဝုတ္တစိတ္တသမ္ပယုတ္တပညာဝ. ဧကူနဝီသတိမံ.

သမာပဇ္ဇိတဗ္ဗတော သမာပတ္တိ၊ တာသု လောကိယလောကုတ္တရာသု သဝိတက္ကသဝိစာရာဒီသု သမာပတ္တီသု ကုသလတာ သမာပတ္တိကုသလတာ၊ သဟ ပရိကမ္မေန အပ္ပနာပရိစ္ဆေဒဇာနနဝသေန ပဝတ္တာ ပညာ. သမာပတ္တီဟိ ဝုဋ္ဌာနေ ကုသလဘာဝေါ သမာပတ္တိဝုဋ္ဌာနကုသလတာ၊ ယထာပရိစ္ဆိန္နကာလေယေဝ တာဟိ ဝုဋ္ဌာနကပညာ ကာမာဝစရဇဝနပညာဝ. ဝီသတိမံ.

အဋ္ဌာရသသု ဓာတူသု ကုသလဘာဝေါ ဓာတုကုသလတာ၊ သဝနဓာရဏပဋိဝေဓပစ္စဝေက္ခဏပညာ. တာသညေဝ ဓာတူနံ မနသိကာရေ ကုသလဘာဝေါ မနသိကာရကုသလတာ၊ တာသံ သမ္မသနပဋိဝေဓပစ္စဝေက္ခဏပညာ. ဧသ နယော အာယတနကုသလတာယပိ. တတ္ထ ဟိ သဝနဓာရဏပစ္စဝေက္ခဏာ ကာမာဝစရာဝ၊ ပဋိဝေဓော လောကုတ္တရောဝ၊ သမ္မသနံ ကာမာဝစရလောကုတ္တရံ. အညမညံ ပဋိစ္စ သဟိတံ ဖလံ ဥပ္ပါဒေတီတိ ပဋိစ္စသမုပ္ပါဒေါ၊ အဝိဇ္ဇာဒီဟိ နိဒ္ဒိဋ္ဌော ပစ္စယသမူဟော၊ တသ္မိံ ဒွါဒသင်္ဂေ အနုလောမပဋိစ္စသမုပ္ပါဒေ ကုသလဘာဝေါ ပဋိစ္စသမုပ္ပါဒကုသလတာ၊ ‘‘ဣမိနာ ပစ္စယေန ဣဒံ ဟောတီ’’တိ ဇာနနဝသေန ပဝတ္တာ လောကိယဇဝနပညာဝ. ဧကဝီသတိမဒွါဝီသတိမာနိ.

တိဋ္ဌတိ ဧတ္ထ ဖလံ တဒါယတ္တဝုတ္တိတာယာတိ ဌာနံ၊ ကာရဏံ၊ တသ္မိံ ဌာနေ ကုသလတာ ဌာနကုသလတာ. န ဌာနေ ကုသလတာ အဋ္ဌာနကုသလတာ. တေဝီသတိမံ.

ဥဇုဘာဝေါ အဇ္ဇဝေါ. မုဒုဘာဝေါ မဒ္ဒဝေါ. ကာယစိတ္တုဇုကတာမုဒုကတာဒွယံ. စတုဝီသတိမံ.

အဓိဝါသနသင်္ခါတာ ခမနံ ခန္တိ၊ တထာပဝတ္တကာမာဝစရဇဝနာနိ. ပါပတော သုဋ္ဌု ဩရတော ဝိရတောတိ သောရတော၊ တဿ ဘာဝေါ သောရစ္စံ. ကာယဝစီမနောသံဝရသီလသင်္ခါတာနိ လောကိယလောကုတ္တရဇဝနာနိ. ပဉ္စဝီသတိမံ.

သမ္မောဒကပိယဝါဒိတာသင်္ခါတော သခိလဘာဝေါ သာခလျံ၊ ယထာ ပရေဟိ သဒ္ဓိံ အတ္တနော ဆိဒ္ဒံ ဝိဝရံ န ဟောတိ၊ ဧဝံ ဓမ္မာမိသေဟိ ပဋိသန္ထရဏံ ပဋိစ္ဆာဒနံ ပဋိသန္ထာရော. အာဂန္တုကဿ ဟိ ပစ္စုဂ္ဂမနပတ္တစီဝရပဋိဂ္ဂဟဏအာသနဒါနဗီဇနပါဒဓောဝနမက္ခနာဒိနာ၊ ပါနီယေန အာပုစ္ဆနေန၊ ကာလေ အာဂတဿ ယာဂုအာဒီနံ၊ ဝိကာလေ ပါနကာဒီနဉ္စ ဒါနေန၊ ပုနဒိဝသေ ပိဏ္ဍာယ စရဏဋ္ဌာနဒဿနပဝေသနနိက္ခမနကာလာရောစနာဒိနာ စ ပဗ္ဗဇိတာ၊ ဂဟဋ္ဌာနဉ္စ ဝိနယေ အာဂတနယေန ယထာနုရူပံ အာမိသပဋိသန္ထာရော ကာတဗ္ဗော. အာဂန္တုကံ ပန ဥပသင်္ကမိတွာ ‘‘တုမှေ ကတရဘာဏကာ’’တိ အပုစ္ဆိတွာ ‘‘အာစရိယုပဇ္ဈာယာ ဝေါ ကတရံ ဂန္ထံ ဝဠဉ္ဇေန္တီ’’တိ ပုစ္ဆိတွာ တဿ ဝိသယေ ပဉှပုစ္ဆနေန သစေ န သက္ကောတိ၊ သယံ ကထေတွာ ဒါနေန၊ ဓမ္မကထနပဉှဝိဿဇ္ဇနကမ္မဋ္ဌာနကထနကုက္ကုစ္စဒိဋ္ဌိဝိနောဒနာဒိနာ၊ ပရိဝါသာဒိဝိနယကမ္မကရဏေန၊ ပဗ္ဗာဇနဥပသမ္ပဒါဒိနာ စ ဓမ္မပဋိသန္ထာရော ကာတဗ္ဗော. အယမေတ္ထ သင်္ခေပေါ၊ ဝိတ္ထာရတော ပနာယံ သဒ္ဓိံ အာနိသံသဒီပကဝတ္ထူဟိ အဋ္ဌသာလိနိယံ (ဓ. သ. အဋ္ဌ. ၁၃၅၁) ဉာတဗ္ဗော. ဧတသ္မိံ ဒုဝိဓေ ပဋိသန္ထာရေ ကုသလဘာဝေါ ပဋိသန္ထာရကုသလတာ၊ တထာပဝတ္တကာမာဝစရဇဝနာနိ ဧဝ. ဆဗ္ဗီသတိမံ.

ဣန္ဒြိယေသု မနစ္ဆဋ္ဌေသု အာပါထဂတရူပါဒီသု အာရမ္မဏေသု နိမိတ္တဂဟဏာဒိနာ ဣန္ဒြိယသံဝရဘေဒသင်္ခါတော အဂုတ္တဒွါရဘာဝေါ ဣန္ဒြိယေသု အဂုတ္တဒွါရတာ. ပဋိဂ္ဂဟဏပရိဘောဂဝသေန ဘောဇနေ မတ္တံ အဇာနနဘာဝေါ ဘောဇနေ အမတ္တညုတာ၊ တထာပဝတ္တအကုသလစိတ္တာနိ. သတ္တဝီသတိမံ.

အနန္တရဒုကေပိ ဝုတ္တပဋိပက္ခဝသေန ကာမာဝစရသဟေတုကကုသလကိရိယစိတ္တာနိ ဝေဒိတဗ္ဗာနိ. အဋ္ဌဝီသတိမံ.

သတိဝိပ္ပဝါသသင်္ခါတော မုဋ္ဌသတိဘာဝေါ မုဋ္ဌဿစ္စံ၊ သဗ္ဗေ အကုသလာ ဓမ္မာ၊ အသမ္ပဇာနနဘာဝေါ အသမ္ပဇညံ၊ မောဟော. ဧကူနတိံသတိမံ.

အနန္တရဒုကေ စတုဘူမိကာ သတိပညာဝ ဝုတ္တာ. တိံသတိမံ.

အပ္ပဋိသင်္ခါနေ အပ္ပဋိဝါနသင်္ခါတေ အကမ္ပိယဋ္ဌေန ယောနိသောဒဿနသင်္ခါတံ ပဋိသင်္ခါနမေဝ ဗလန္တိ ပဋိသင်္ခါနဗလံ၊ ကာမာဝစရပညာဝ. သတ္တဗောဇ္ဈင်္ဂါဒိဘာဝနာဝသေန ပဝတ္တာ စတုဘူမကဓမ္မာ ဘာဝနာဗလံ. ဧကတိံသတိမံ.

ပစ္စနီကဓမ္မေ သမေတီတိ သမထော၊ သော တိဝိဓော စိတ္တသမထော အဓိကရဏသမထော သဗ္ဗသင်္ခါရသမထောတိ. တတ္ထ စ ပုဗ္ဗဘာဂါသု အဋ္ဌသမာပတ္တီသု ဧကဂ္ဂတာ စိတ္တသမထော နာမ၊ သမ္မုခါဝိနယာဒိ သတ္တဝိဓော အဓိကရဏသမထော နာမ၊ နိဗ္ဗာနံ သဗ္ဗသင်္ခါရသမထော နာမ. ဣဓ ပန စတုဘူမကော သမာဓိ အဓိပ္ပေတော. အနိစ္စာဒိဝသေန ဝိဝိဓေနာကာရေန ပဿတီတိ ဝိပဿနာ၊ လောကိယလောကုတ္တရာ ဝိပဿနာပညာဝ. ဗာတ္တိံသတိမံ.

သမထောဝ တံ အာကာရံ ဂဟေတွာ ပုန ပဝတ္တေတဗ္ဗဿ သမထဿ နိမိတ္တန္တိ သမထနိမိတ္တံ. ပဂ္ဂါဟနိမိတ္တေပိ ဧသေဝ နယော. စတုဘူမကသမာဓိဝီရိယာနိ ဧဝ. တေတ္တိံသတိမံ.

အနန္တရဒုကေပိ ဝီရိယသမာဓီ ဧဝ ဝုတ္တာ. စတုတ္တိံသတိမံ.

သီလဝိနာသိကာ အသံဝရသင်္ခါတာ သီလဿ ဝိပတ္တီတိ သီလဝိပတ္တိ၊ တထာပဝတ္တာ အကုသလဓမ္မာ. သမ္မာဒိဋ္ဌိယာ ဝိပတ္တိ ဒိဋ္ဌိဝိပတ္တိ၊ မိစ္ဆာဒိဋ္ဌိ ဧဝ. ပဉ္စတိံသတိမံ.

သောရစ္စမေဝ သီလဿ သမ္ပာဒနတော သီလပရိပူရဏတော သီလဿ သမ္ပဒါတိ သီလသမ္ပဒါ. ဒိဋ္ဌိပါရိပူရိဘူတံ ဉာဏမေဝ ဒိဋ္ဌိယာ သမ္ပဒါတိ ဒိဋ္ဌိသမ္ပဒါ. စတုဘူမကာ သီလပညာဝ. တထာ အနန္တရဒုကေပိ. ဆတ္တိံသတိမံ.

ဝိသုဒ္ဓိဘာဝံ သမ္ပတ္တာ သီလသင်္ခါတာ သီလဿ ဝိသုဒ္ဓိ သီလဝိသုဒ္ဓိ. နိဗ္ဗာနသင်္ခါတံ ဝိသုဒ္ဓိံ ပါပေတုံ သမတ္ထာ ဒဿနသင်္ခါတာ ဒိဋ္ဌိယာ ဝိသုဒ္ဓိ ဒိဋ္ဌိဝိသုဒ္ဓိ. သတ္တတ္တိံသတိမံ.

ကမ္မဿကတာသစ္စာနုလောမိကမဂ္ဂဖလသမ္ပယုတ္တပညာ ဒိဋ္ဌိ ဝိသုဒ္ဓိ နာမ. ယထာဒိဋ္ဌိဿ တဒနုရူပံ ပဓာနံ ယထာဒိဋ္ဌိဿ စ ပဓာနံ နာမ. အဋ္ဌတိံသတိမံ.

သံဝေဂဇနကာနိ ဇာတိဇရာဗျာဓိမရဏသင်္ခါတာနိ ကာရဏာနိ သံဝေဇနီယဋ္ဌာနာနိ နာမ၊ တေသု ဇာတိအာဒိပဋိစ္စသမုပ္ပန္နဘယသင်္ခါတံ သံဝိဇနံ သံဝေဂေါ နာမ၊ တထာပဝတ္တကုသလာဒိ ဧဝ. ဧဝံ သံဝေဂဇာတဿ ယောနိသော ဥပါယေန ပဓာနံ သံဝိဂ္ဂဿ ယောနိသော ပဓာနံ၊ လောကိယလောကုတ္တရဝီရိယမေဝ. ဧကူနစတ္တာလီသတိမံ.

ကုသလဓမ္မပူရဏေ အသန္တုဋ္ဌိဘာဝေါ အသန္တုဋ္ဌိတာ. ယော ပန ဒါနံ ဒတွာ တတော တေန အသန္တုဋ္ဌော ဟုတွာ သရဏဂမနံ အာကင်္ခတိ၊ တတော ပဉ္စသီလာဒိံ၊ ပဗ္ဗဇ္ဇံ၊ ဗုဒ္ဓဝစနာနံ ဥဂ္ဂဏှနံ၊ သမထဝိပဿနံ၊ တတော တေနာပိ အသန္တုဋ္ဌော အနုက္ကမေန အရဟတ္တံ ဂဏှာတိ၊ အယံ အသန္တုဋ္ဌိတာ ကုသလေသု ဓမ္မေသု. အဓိကုသလဓမ္မာနံ ဘာဝနာယ ဥက္ကဏ္ဌမာနော ပဓာနံ ပဋိဝါပေတိ နိဝတ္တာပေတီတိ ပဋိဝါနိ၊ န ပဋိဝါနိ အပ္ပဋိဝါနိ၊ တဿ ဘဝေါ အပ္ပဋိဝါနိတာ. အရဟတ္တံ အပ္ပတွာ ပဓာနသ္မိံ အနိဝတ္တနတာ အနောသက္ကနတာ၊ တထာပဝတ္တလောကိယလောကုတ္တရကုသလာ ဓမ္မာ. စတ္တာလီသတိမံ.

ဝိဇာနနတော ဝိဇ္ဇာ၊ ပုဗ္ဗေနိဝါသစုတူပပါတအာသဝက္ခယဉာဏာနိ. ဝိမုစ္စနတော ဝိမုတ္တိ၊ အဋ္ဌ သမာပတ္တိယော၊ နိဗ္ဗာနဉ္စ. အဋ္ဌ သမာပတ္တိယော ဟိ အာရမ္မဏေ အဓိမုစ္စနတော၊ သယံ ဝိက္ခမ္ဘိတကိလေသေဟိ ဝိမုစ္စနဋ္ဌေန စ ဝိမုတ္တီတိ ဝုတ္တာ၊ နိဗ္ဗာနံ ပန သဗ္ဗကိလေသေဟိ အစ္စန္တဝိမုစ္စနဋ္ဌေန. ဧကစတ္တာလီသတိမံ.

ကိလေသက္ခယကရေသု စတူသု အရိယမဂ္ဂေသု ဉာဏံ ခယေ ဉာဏံ နာမ. ပဋိသန္ဓိဝသေန အနုပ္ပါဒဘူတေ တံတံမဂ္ဂဝဇ္ဈကိလေသာနံ အနုပ္ပါဒပရိယောသာနေ ဥပ္ပန္နအရိယဖလေ ဉာဏံ အနုပ္ပါဒေ ဉာဏံ နာမ. သေသံ သဗ္ဗတ္ထ သုဝိညေယျမေဝ. ဒွါစတ္တာလီသတိမံ.

သုတ္တန္တိကဒုကမာတိကတ္ထဝဏ္ဏနာ နိဋ္ဌိတာ.

မောဟဝိစ္ဆေဒနိယာ အဘိဓမ္မမာတိကတ္ထဝဏ္ဏနာယ

ဓမ္မသင်္ဂဏီမာတိကတ္ထဝဏ္ဏနာ နိဋ္ဌိတာ.