၅. ပဌမဖလသုတ္တံ

၈၃၇. ‘‘စတ္တာရောမေ၊ ဘိက္ခဝေ၊ ဣဒ္ဓိပါဒါ. ကတမေ စတ္တာရော? ဣဓ၊ ဘိက္ခဝေ၊ ဘိက္ခု ဆန္ဒသမာဓိပ္ပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ၊ ဝီရိယသမာဓိ။ပေ။ စိတ္တသမာဓိ ။ပေ။ ဝီမံသာသမာဓိပ္ပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ – ဣမေ ခေါ၊ ဘိက္ခဝေ၊ စတ္တာရော ဣဒ္ဓိပါဒါ. ဣမေသံ ခေါ၊ ဘိက္ခဝေ၊ စတုန္နံ ဣဒ္ဓိပါဒါနံ ဘာဝိတတ္တာ ဗဟုလီကတတ္တာ ဘိက္ခုနာ ဒွိန္နံ ဖလာနံ အညတရံ ဖလံ ပါဋိကင်္ခံ – ဒိဋ္ဌေဝ ဓမ္မေ အညာ၊ သတိ ဝါ ဥပါဒိသေသေ အနာဂါမိတာ’’တိ. ပဉ္စမံ.