၉. ဣဒ္ဓါဒိဒေသနာသုတ္တံ

၈၃၁. ‘‘ဣဒ္ဓိံ ဝေါ၊ ဘိက္ခဝေ၊ ဒေသေဿာမိ ဣဒ္ဓိပါဒဉ္စ ဣဒ္ဓိပါဒဘာဝနဉ္စ ဣဒ္ဓိပါဒဘာဝနာဂါမိနိဉ္စ ပဋိပဒံ. တံ သုဏာထ.

‘‘ကတမာ စ၊ ဘိက္ခဝေ၊ ဣဒ္ဓိ? ဣဓ၊ ဘိက္ခဝေ၊ ဘိက္ခု အနေကဝိဟိတံ ဣဒ္ဓိဝိဓံ ပစ္စနုဘောတိ – ဧကောပိ ဟုတွာ ဗဟုဓာ ဟောတိ၊ ဗဟုဓာပိ ဟုတွာ ဧကော ဟောတိ။ပေ။ ယာဝ ဗြဟ္မလောကာပိ ကာယေန ဝသံ ဝတ္တေတိ – အယံ ဝုစ္စတိ၊ ဘိက္ခဝေ၊ ဣဒ္ဓိ.

‘‘ကတမော စ၊ ဘိက္ခဝေ၊ ဣဒ္ဓိပါဒေါ? ယော သော၊ ဘိက္ခဝေ၊ မဂ္ဂေါ ယာ ပဋိပဒါ ဣဒ္ဓိလာဘာယ ဣဒ္ဓိပဋိလာဘာယ သံဝတ္တတိ – အယံ ဝုစ္စတိ၊ ဘိက္ခဝေ၊ ဣဒ္ဓိပါဒေါ.

‘‘ကတမာ စ၊ ဘိက္ခဝေ၊ ဣဒ္ဓိပါဒဘာဝနာ? ဣဓ၊ ဘိက္ခဝေ၊ ဘိက္ခု ဆန္ဒသမာဓိပ္ပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ၊ ဝီရိယသမာဓိ။ပေ။ စိတ္တသမာဓိ ။ပေ။ ဝီမံသာသမာဓိပ္ပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ – အယံ ဝုစ္စတိ၊ ဘိက္ခဝေ၊ ဣဒ္ဓိပါဒဘာဝနာ.

‘‘ကတမာ စ၊ ဘိက္ခဝေ၊ ဣဒ္ဓိပါဒဘာဝနာဂါမိနီ ပဋိပဒါ? အယမေဝ အရိယော အဋ္ဌင်္ဂိကော မဂ္ဂေါ၊ သေယျထိဒံ – သမ္မာဒိဋ္ဌိ၊ သမ္မာသင်္ကပ္ပေါ၊ သမ္မာဝါစာ၊ သမ္မာကမ္မန္တော၊ သမ္မာအာဇီဝေါ၊ သမ္မာဝါယာမော၊ သမ္မာသတိ၊ သမ္မာသမာဓိ – အယံ ဝုစ္စတိ၊ ဘိက္ခဝေ၊ ဣဒ္ဓိပါဒဘာဝနာဂါမိနီ ပဋိပဒါ’’တိ. နဝမံ.