၄. ဧသနာဝဂ္ဂေါ

၁-၁၀. ဧသနာဒိသုတ္တဒသကံ

၆၈၅-၆၉၄. ‘‘တိဿော ဣမာ၊ ဘိက္ခဝေ၊ ဧသနာ. ကတမာ တိဿော? ကာမေသနာ၊ ဘဝေသနာ၊ ဗြဟ္မစရိယေသနာ – ဣမာ ခေါ၊ ဘိက္ခဝေ၊ တိဿော ဧသနာ. ဣမာသံ ခေါ၊ ဘိက္ခဝေ၊ တိဿန္နံ ဧသနာနံ အဘိညာယ ပရိညာယ ပရိက္ခယာယ ပဟာနာယ စတ္တာရော သမ္မပ္ပဓာနာ ဘာဝေတဗ္ဗာ. ကတမေ စတ္တာရော? ဣဓ၊ ဘိက္ခဝေ၊ ဘိက္ခု အနုပ္ပန္နာနံ။ပေ။ ဥပ္ပန္နာနံ ကုသလာနံ ဓမ္မာနံ ဌိတိယာ အသမ္မောသာယ ဘိယျောဘာဝါယ ဝေပုလ္လာယ ဘာဝနာယ ပါရိပူရိယာ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ. ဣမာသံ ခေါ၊ ဘိက္ခဝေ၊ တိဿန္နံ ဧသနာနံ အဘိညာယ ပရိညာယ ပရိက္ခယာယ ပဟာနာယ ဣမေ စတ္တာရော သမ္မပ္ပဓာနာ ဘာဝေတဗ္ဗာ’’တိ. (ဝိတ္ထာရေတဗ္ဗံ). ဒသမံ.

ဧသနာဝဂ္ဂေါ စတုတ္ထော.

တဿုဒ္ဒါနံ –

ဧသနာ ဝိဓာ အာသဝေါ၊ ဘဝေါ စ ဒုက္ခတာ တိဿော၊

ခိလံ မလဉ္စ နီဃော စ၊ ဝေဒနာ တဏှာ တသိနာ စာတိ.