၇. ကုမ္ဘသုတ္တံ

၂၇. သာဝတ္ထိနိဒါနံ. ‘‘သေယျထာပိ၊ ဘိက္ခဝေ၊ ကုမ္ဘော အနာဓာရော သုပ္ပဝတ္တိယော ဟောတိ၊ သာဓာရော ဒုပ္ပဝတ္တိယော ဟောတိ၊ ဧဝမေဝ ခေါ၊ ဘိက္ခဝေ၊ စိတ္တံ အနာဓာရံ သုပ္ပဝတ္တိယံ ဟောတိ၊ သာဓာရံ ဒုပ္ပဝတ္တိယံ ဟောတိ. ကော စ၊ ဘိက္ခဝေ၊ စိတ္တဿ အာဓာရော? အယမေဝ အရိယော အဋ္ဌင်္ဂိကော မဂ္ဂေါ၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓိ. အယံ စိတ္တဿ အာဓာရော. သေယျထာပိ၊ ဘိက္ခဝေ၊ ကုမ္ဘော အနာဓာရော သုပ္ပဝတ္တိယော ဟောတိ၊ သာဓာရော ဒုပ္ပဝတ္တိယော ဟောတိ၊ ဧဝမေဝ ခေါ၊ ဘိက္ခဝေ၊ စိတ္တံ အနာဓာရံ သုပ္ပဝတ္တိယံ ဟောတိ၊ သာဓာရံ ဒုပ္ပဝတ္တိယံ ဟောတီ’’တိ. သတ္တမံ.