၇. ဒုတိယအညတရဘိက္ခုသုတ္တံ

၇. သာဝတ္ထိနိဒါနံ. အထ ခေါ အညတရော ဘိက္ခု ယေန ဘဂဝါ တေနုပသင်္ကမိ။ပေ။ ဧကမန္တံ နိသိန္နော ခေါ သော ဘိက္ခု ဘဂဝန္တံ ဧတဒဝေါစ –

‘‘‘ရာဂဝိနယော ဒေါသဝိနယော မောဟဝိနယော’တိ၊ ဘန္တေ၊ ဝုစ္စတိ. ကိဿ နု ခေါ ဧတံ၊ ဘန္တေ၊ အဓိဝစနံ – ‘ရာဂဝိနယော ဒေါသဝိနယော မောဟဝိနယော’’’တိ? ‘‘နိဗ္ဗာနဓာတုယာ ခေါ ဧတံ၊ ဘိက္ခု၊ အဓိဝစနံ – ‘ရာဂဝိနယော ဒေါသဝိနယော မောဟဝိနယော’တိ. အာသဝါနံ ခယော တေန ဝုစ္စတီ’’တိ.

ဧဝံ ဝုတ္တေ သော ဘိက္ခု ဘဂဝန္တံ ဧတဒဝေါစ – ‘‘‘အမတံ၊ အမတ’န္တိ၊ ဘန္တေ၊ ဝုစ္စတိ. ကတမံ နု ခေါ၊ ဘန္တေ၊ အမတံ၊ ကတမော အမတဂါမိမဂ္ဂေါ’’တိ? ‘‘ယော ခေါ၊ ဘိက္ခု၊ ရာဂက္ခယော ဒေါသက္ခယော မောဟက္ခယော – ဣဒံ ဝုစ္စတိ အမတံ. အယမေဝ အရိယော အဋ္ဌင်္ဂိကော မဂ္ဂေါ အမတဂါမိမဂ္ဂေါ၊ သေယျထိဒံ – သမ္မာဒိဋ္ဌိ။ပေ။ သမ္မာသမာဓီ’’တိ. သတ္တမံ.