၃၃. ပရာယနသုတ္တံ

၄၀၉. ‘‘ပရာယနဉ္စ [ပရာယဏဉ္စ (ပီ. သီ. အဋ္ဌ.)] ဝေါ၊ ဘိက္ခဝေ၊ ဒေသေဿာမိ ပရာယနဂါမိဉ္စ မဂ္ဂံ. တံ သုဏာထ. ကတမဉ္စ၊ ဘိက္ခဝေ၊ ပရာယနံ? ယော၊ ဘိက္ခဝေ၊ ရာဂက္ခယော ဒေါသက္ခယော မောဟက္ခယော – ဣဒံ ဝုစ္စတိ၊ ဘိက္ခဝေ၊ ပရာယနံ. ကတမော စ၊ ဘိက္ခဝေ၊ ပရာယနဂါမီ မဂ္ဂေါ? ကာယဂတာသတိ. အယံ ဝုစ္စတိ၊ ဘိက္ခဝေ၊ ပရာယနဂါမိမဂ္ဂေါ. ဣတိ ခေါ၊ ဘိက္ခဝေ၊ ဒေသိတံ ဝေါ မယာ ပရာယနံ၊ ဒေသိတော ပရာယနဂါမိမဂ္ဂေါ. ယံ၊ ဘိက္ခဝေ၊ သတ္ထာရာ ကရဏီယံ သာဝကာနံ ဟိတေသိနာ အနုကမ္ပကေန အနုကမ္ပံ ဥပါဒါယ၊ ကတံ ဝေါ တံ မယာ. ဧတာနိ၊ ဘိက္ခဝေ၊ ရုက္ခမူလာနိ၊ ဧတာနိ သုညာဂါရာနိ. ဈာယထ၊ ဘိက္ခဝေ၊ မာ ပမာဒတ္ထ၊ မာ ပစ္ဆာ ဝိပ္ပဋိသာရိနော အဟုဝတ္ထ. အယံ ဝေါ အမှာကံ အနုသာသနီ’’တိ. (ယထာ အသင်္ခတံ တထာ ဝိတ္ထာရေတဗ္ဗံ). တေတ္တိံသတိမံ.

ဒုတိယော ဝဂ္ဂေါ.

တဿုဒ္ဒါနံ –

အသင်္ခတံ အနတံ အနာသဝံ၊ သစ္စဉ္စ ပါရံ နိပုဏံ သုဒုဒ္ဒသံ၊

အဇဇ္ဇရံ ဓုဝံ အပလောကိတံ၊ အနိဒဿနံ နိပ္ပပဉ္စ သန္တံ.

အမတံ ပဏီတဉ္စ သိဝဉ္စ ခေမံ၊ တဏှာက္ခယော အစ္ဆရိယဉ္စ အဗ္ဘုတံ၊

အနီတိကံ အနီတိကဓမ္မံ၊ နိဗ္ဗာနမေတံ သုဂတေန ဒေသိတံ.

အဗျာပဇ္ဈော ဝိရာဂေါ စ၊ သုဒ္ဓိ မုတ္တိ အနာလယော၊

ဒီပေါ လေဏဉ္စ တာဏဉ္စ၊ သရဏဉ္စ ပရာယနန္တိ.

အသင်္ခတသံယုတ္တံ သမတ္တံ.