၅. ပဌမကာမဘူသုတ္တံ

၃၄၇. ဧကံ သမယံ အာယသ္မာ ကာမဘူ မစ္ဆိကာသဏ္ဍေ ဝိဟရတိ အမ္ဗာဋကဝနေ. အထ ခေါ စိတ္တော ဂဟပတိ ယေနာယသ္မာ ကာမဘူ တေနုပသင်္ကမိ၊ ဥပသင်္ကမိတွာ အာယသ္မန္တံ ကာမဘုံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ စိတ္တံ ဂဟပတိံ အာယသ္မာ ကာမဘူ ဧတဒဝေါစ –

‘‘ဝုတ္တမိဒံ၊ ဂဟပတိ –

‘‘နေလင်္ဂေါ သေတပစ္ဆာဒေါ၊ ဧကာရော ဝတ္တတီ ရထော၊

အနီဃံ ပဿ အာယန္တံ [အပ္ပတ္တံ (သျာ. ကံ. က.)]၊ ဆိန္နသောတံ အဗန္ဓန’’န္တိ.

‘‘ဣမဿ နု ခေါ၊ ဂဟပတိ၊ သံခိတ္တေန ဘာသိတဿ ကထံ ဝိတ္ထာရေန အတ္ထော ဒဋ္ဌဗ္ဗော’’တိ? ‘‘ကိံ နု ခေါ ဧတံ၊ ဘန္တေ၊ ဘဂဝတာ ဘာသိတ’’န္တိ? ‘‘ဧဝံ၊ ဂဟပတီ’’တိ. ‘‘တေန ဟိ၊ ဘန္တေ၊ မုဟုတ္တံ အာဂမေဟိ ယာဝဿ အတ္ထံ ပေက္ခာမီ’’တိ. အထ ခေါ စိတ္တော ဂဟပတိ မုဟုတ္တံ တုဏှီ ဟုတွာ အာယသ္မန္တံ ကာမဘုံ ဧတဒဝေါစ –

‘‘‘နေလင်္ဂ’န္တိ ခေါ၊ ဘန္တေ၊ သီလာနမေတံ အဓိဝစနံ. ‘သေတပစ္ဆာဒေါ’တိ ခေါ၊ ဘန္တေ၊ ဝိမုတ္တိယာ ဧတံ အဓိဝစနံ. ‘ဧကာရော’တိ ခေါ၊ ဘန္တေ၊ သတိယာ ဧတံ အဓိဝစနံ. ‘ဝတ္တတီ’တိ ခေါ၊ ဘန္တေ၊ အဘိက္ကမပဋိက္ကမဿေတံ အဓိဝစနံ. ‘ရထော’တိ ခေါ၊ ဘန္တေ၊ ဣမဿေတံ စာတုမဟာဘူတိကဿ ကာယဿ အဓိဝစနံ မာတာပေတ္တိကသမ္ဘဝဿ ဩဒနကုမ္မာသူပစယဿ အနိစ္စုစ္ဆာဒနပရိမဒ္ဒနဘေဒနဝိဒ္ဓံသနဓမ္မဿ. ရာဂေါ ခေါ၊ ဘန္တေ၊ နီဃော၊ ဒေါသော နီဃော၊ မောဟော နီဃော. တေ ခီဏာသဝဿ ဘိက္ခုနော ပဟီနာ ဥစ္ဆိန္နမူလာ တာလာဝတ္ထုကတာ အနဘာဝင်္ကတာ အာယတိံ အနုပ္ပါဒဓမ္မာ. တသ္မာ ခီဏာသဝေါ ဘိက္ခု ‘အနီဃော’တိ ဝုစ္စတိ. ‘အာယန္တ’န္တိ ခေါ၊ ဘန္တေ၊ အရဟတော ဧတံ အဓိဝစနံ. ‘သောတော’တိ ခေါ၊ ဘန္တေ၊ တဏှာယေတံ အဓိဝစနံ. သာ ခီဏာသဝဿ ဘိက္ခုနော ပဟီနာ ဥစ္ဆိန္နမူလာ တာလာဝတ္ထုကတာ အနဘာဝင်္ကတာ အာယတိံ အနုပ္ပါဒဓမ္မာ. တသ္မာ ခီဏာသဝေါ ဘိက္ခု ‘ဆိန္နသောတော’တိ ဝုစ္စတိ. ရာဂေါ ခေါ၊ ဘန္တေ၊ ဗန္ဓနံ၊ ဒေါသော ဗန္ဓနံ၊ မောဟော ဗန္ဓနံ. တေ ခီဏာသဝဿ ဘိက္ခုနော ပဟီနာ ဥစ္ဆိန္နမူလာ တာလာဝတ္ထုကတာ အနဘာဝင်္ကတာ အာယတိံ အနုပ္ပါဒဓမ္မာ. တသ္မာ ခီဏာသဝေါ ဘိက္ခု ‘အဗန္ဓနော’တိ ဝုစ္စတိ. ဣတိ ခေါ၊ ဘန္တေ၊ ယံ တံ ဘဂဝတာ ဝုတ္တံ –

‘‘နေလင်္ဂေါ သေတပစ္ဆာဒေါ၊ ဧကာရော ဝတ္တတီ ရထော၊

အနီဃံ ပဿ အာယန္တံ၊ ဆိန္နသောတံ အဗန္ဓန’’န္တိ.

‘‘ဣမဿ ခေါ၊ ဘန္တေ၊ ဘဂဝတာ သံခိတ္တေန ဘာသိတဿ ဧဝံ ဝိတ္ထာရေန အတ္ထံ အာဇာနာမီ’’တိ. ‘‘လာဘာ တေ၊ ဂဟပတိ၊ သုလဒ္ဓံ တေ၊ ဂဟပတိ! ယဿ တေ ဂမ္ဘီရေ ဗုဒ္ဓဝစနေ ပညာစက္ခု ကမတီ’’တိ. ပဉ္စမံ.