၄. စတုတ္ထဈာနပဉှာသုတ္တံ

၃၃၅. ‘‘‘စတုတ္ထံ ဈာနံ၊ စတုတ္ထံ ဈာန’န္တိ ဝုစ္စတိ. ကတမံ နု ခေါ စတုတ္ထံ ဈာနန္တိ? တဿ မယှံ၊ အာဝုသော၊ ဧတဒဟောသိ – ‘ဣဓ ဘိက္ခု သုခဿ စ ပဟာနာ ဒုက္ခဿ စ ပဟာနာ ပုဗ္ဗေဝ သောမနဿဒေါမနဿာနံ အတ္ထင်္ဂမာ အဒုက္ခမသုခံ ဥပေက္ခာသတိပါရိသုဒ္ဓိံ စတုတ္ထံ ဈာနံ ဥပသမ္ပဇ္ဇ ဝိဟရတိ. ဣဒံ ဝုစ္စတိ စတုတ္ထံ ဈာန’န္တိ. သော ခွာဟံ၊ အာဝုသော၊ သုခဿ စ ပဟာနာ ဒုက္ခဿ စ ပဟာနာ ပုဗ္ဗေဝ သောမနဿဒေါမနဿာနံ အတ္ထင်္ဂမာ အဒုက္ခမသုခံ ဥပေက္ခာသတိပါရိသုဒ္ဓိံ စတုတ္ထံ ဈာနံ ဥပသမ္ပဇ္ဇ ဝိဟရာမိ. တဿ မယှံ၊ အာဝုသော၊ ဣမိနာ ဝိဟာရေန ဝိဟရတော သုခသဟဂတာ သညာမနသိကာရာ သမုဒါစရန္တိ.

‘‘အထ ခေါ မံ၊ အာဝုသော၊ ဘဂဝါ ဣဒ္ဓိယာ ဥပသင်္ကမိတွာ ဧတဒဝေါစ – ‘မောဂ္ဂလ္လာန၊ မောဂ္ဂလ္လာန! မာ၊ ဗြာဟ္မဏ၊ စတုတ္ထံ ဈာနံ ပမာဒေါ၊ စတုတ္ထေ ဈာနေ စိတ္တံ သဏ္ဌပေဟိ၊ စတုတ္ထေ ဈာနေ စိတ္တံ ဧကောဒိံ ကရောဟိ၊ စတုတ္ထေ ဈာနေ စိတ္တံ သမာဒဟာ’တိ. သော ခွာဟံ၊ အာဝုသော၊ အပရေန သမယေန သုခဿ စ ပဟာနာ ဒုက္ခဿ စ ပဟာနာ ပုဗ္ဗေဝ သောမနဿဒေါမနဿာနံ အတ္ထင်္ဂမာ အဒုက္ခမသုခံ ဥပေက္ခာသတိပါရိသုဒ္ဓိံ စတုတ္ထံ ဈာနံ ဥပသမ္ပဇ္ဇ ဝိဟာသိံ. ယဉှိ တံ၊ အာဝုသော၊ သမ္မာ ဝဒမာနော ဝဒေယျ။ပေ။ မဟာဘိညတံ ပတ္တော’’တိ. စတုတ္ထံ.