၂. ဒုတိယဈာနပဉှာသုတ္တံ

၃၃၃. ‘‘‘ဒုတိယံ ဈာနံ၊ ဒုတိယံ ဈာန’န္တိ ဝုစ္စတိ. ကတမံ နု ခေါ ဒုတိယံ ဈာနန္တိ? တဿ မယှံ၊ အာဝုသော၊ ဧတဒဟောသိ – ‘ဣဓ ဘိက္ခု ဝိတက္ကဝိစာရာနံ ဝူပသမာ အဇ္ဈတ္တံ သမ္ပသာဒနံ စေတသော ဧကောဒိဘာဝံ အဝိတက္ကံ အဝိစာရံ သမာဓိဇံ ပီတိသုခံ ဒုတိယံ ဈာနံ ဥပသမ္ပဇ္ဇ ဝိဟရတိ. ဣဒံ ဝုစ္စတိ ဒုတိယံ ဈာန’န္တိ. သော ခွာဟံ၊ အာဝုသော၊ ဝိတက္ကဝိစာရာနံ ဝူပသမာ အဇ္ဈတ္တံ သမ္ပသာဒနံ စေတသော ဧကောဒိဘာဝံ အဝိတက္ကံ အဝိစာရံ သမာဓိဇံ ပီတိသုခံ ဒုတိယံ ဈာနံ ဥပသမ္ပဇ္ဇ ဝိဟရာမိ. တဿ မယှံ၊ အာဝုသော၊ ဣမိနာ ဝိဟာရေန ဝိဟရတော ဝိတက္ကသဟဂတာ သညာမနသိကာရာ သမုဒါစရန္တိ.

‘‘အထ ခေါ မံ၊ အာဝုသော၊ ဘဂဝါ ဣဒ္ဓိယာ ဥပသင်္ကမိတွာ ဧတဒဝေါစ – ‘မောဂ္ဂလ္လာန၊ မောဂ္ဂလ္လာန! မာ၊ ဗြာဟ္မဏ၊ ဒုတိယံ ဈာနံ ပမာဒေါ၊ ဒုတိယေ ဈာနေ စိတ္တံ သဏ္ဌပေဟိ၊ ဒုတိယေ ဈာနေ စိတ္တံ ဧကောဒိံ ကရောဟိ၊ ဒုတိယေ ဈာနေ စိတ္တံ သမာဒဟာ’တိ. သော ခွာဟံ၊ အာဝုသော၊ အပရေန သမယေန ဝိတက္ကဝိစာရာနံ ဝူပသမာ အဇ္ဈတ္တံ သမ္ပသာဒနံ စေတသော ဧကောဒိဘာဝံ အဝိတက္ကံ အဝိစာရံ သမာဓိဇံ ပီတိသုခံ ဒုတိယံ ဈာနံ ဥပသမ္ပဇ္ဇ ဝိဟာသိံ. ယဉှိ တံ၊ အာဝုသော၊ သမ္မာ ဝဒမာနော ဝဒေယျ – ‘သတ္ထာရာနုဂ္ဂဟိတော သာဝကော မဟာဘိညတံ ပတ္တော’တိ၊ မမံ တံ သမ္မာ ဝဒမာနော ဝဒေယျ – ‘သတ္ထာရာနုဂ္ဂဟိတော သာဝကော မဟာဘိညတံ ပတ္တော’’’တိ. ဒုတိယံ.