၉. အဝိဇ္ဇာပဉှာသုတ္တံ

၃၂၂. ‘‘‘အဝိဇ္ဇာ၊ အဝိဇ္ဇာ’တိ၊ အာဝုသော သာရိပုတ္တ၊ ဝုစ္စတိ. ကတမာ နု ခေါ၊ အာဝုသော၊ အဝိဇ္ဇာ’’တိ? ‘‘ယံ ခေါ၊ အာဝုသော၊ ဒုက္ခေ အညာဏံ၊ ဒုက္ခသမုဒယေ အညာဏံ၊ ဒုက္ခနိရောဓေ အညာဏံ၊ ဒုက္ခနိရောဓဂါမိနိယာ ပဋိပဒါယ အညာဏံ – အယံ ဝုစ္စတာဝုသော၊ အဝိဇ္ဇာ’’တိ. ‘‘အတ္ထိ ပနာဝုသော၊ မဂ္ဂေါ အတ္ထိ ပဋိပဒါ၊ ဧတိဿာ အဝိဇ္ဇာယ ပဟာနာယာ’’တိ? ‘‘အတ္ထိ ခေါ၊ အာဝုသော၊ မဂ္ဂေါ အတ္ထိ ပဋိပဒါ၊ ဧတိဿာ အဝိဇ္ဇာယ ပဟာနာယာ’’တိ. ‘‘ကတမော ပနာဝုသော၊ မဂ္ဂေါ ကတမာ ပဋိပဒါ၊ ဧတိဿာ အဝိဇ္ဇာယ ပဟာနာယာ’’တိ? ‘‘အယမေဝ ခေါ၊ အာဝုသော၊ အရိယော အဋ္ဌင်္ဂိကော မဂ္ဂေါ၊ ဧတိဿာ အဝိဇ္ဇာယ ပဟာနာယ၊ သေယျထိဒံ – သမ္မာဒိဋ္ဌိ သမ္မာသင်္ကပ္ပေါ သမ္မာဝါစာ သမ္မာကမ္မန္တော သမ္မာအာဇီဝေါ သမ္မာဝါယာမော သမ္မာသတိ သမ္မာသမာဓိ. အယံ ခေါ၊ အာဝုသော၊ မဂ္ဂေါ အယံ ပဋိပဒါ၊ ဧတိဿာ အဝိဇ္ဇာယ ပဟာနာယာ’’တိ. ‘‘ဘဒ္ဒကော၊ အာဝုသော၊ မဂ္ဂေါ ဘဒ္ဒိကာ ပဋိပဒါ၊ ဧတိဿာ အဝိဇ္ဇာယ ပဟာနာယ. အလဉ္စ ပနာဝုသော သာရိပုတ္တ၊ အပ္ပမာဒါယာ’’တိ. နဝမံ.