၇. ဝေဒနာပဉှာသုတ္တံ

၃၂၀. ‘‘‘ဝေဒနာ၊ ဝေဒနာ’တိ၊ အာဝုသော သာရိပုတ္တ၊ ဝုစ္စတိ. ကတမာ နု ခေါ၊ အာဝုသော၊ ဝေဒနာ’’တိ? ‘‘တိဿော ဣမာဝုသော၊ ဝေဒနာ. ကတမာ တိဿော? သုခါ ဝေဒနာ၊ ဒုက္ခာ ဝေဒနာ၊ အဒုက္ခမသုခါ ဝေဒနာ – ဣမာ ခေါ၊ အာဝုသော၊ တိဿော ဝေဒနာ’’တိ. ‘‘အတ္ထိ ပနာဝုသော၊ မဂ္ဂေါ အတ္ထိ ပဋိပဒါ၊ ဧတာသံ တိဿန္နံ ဝေဒနာနံ ပရိညာယာ’’တိ? ‘‘အတ္ထိ ခေါ၊ အာဝုသော၊ မဂ္ဂေါ အတ္ထိ ပဋိပဒါ၊ ဧတာသံ တိဿန္နံ ဝေဒနာနံ ပရိညာယာ’’တိ. ‘‘ကတမော ပနာဝုသော၊ မဂ္ဂေါ ကတမာ ပဋိပဒါ၊ ဧတာသံ တိဿန္နံ ဝေဒနာနံ ပရိညာယာ’’တိ? ‘‘အယမေဝ ခေါ၊ အာဝုသော၊ အရိယော အဋ္ဌင်္ဂိကော မဂ္ဂေါ၊ ဧတာသံ တိဿန္နံ ဝေဒနာနံ ပရိညာယ၊ သေယျထိဒံ – သမ္မာဒိဋ္ဌိ သမ္မာသင်္ကပ္ပေါ သမ္မာဝါစာ သမ္မာကမ္မန္တော သမ္မာအာဇီဝေါ သမ္မာဝါယာမော သမ္မာသတိ သမ္မာသမာဓိ. အယံ ခေါ၊ အာဝုသော၊ မဂ္ဂေါ အယံ ပဋိပဒါ၊ ဧတာသံ တိဿန္နံ ဝေဒနာနံ ပရိညာယာ’’တိ. ‘‘ဘဒ္ဒကော၊ အာဝုသော၊ မဂ္ဂေါ ဘဒ္ဒိကာ ပဋိပဒါ၊ ဧတာသံ တိဿန္နံ ဝေဒနာနံ ပရိညာယ. အလဉ္စ ပနာဝုသော သာရိပုတ္တ၊ အပ္ပမာဒါယာ’’တိ. သတ္တမံ.