၂. အရဟတ္တပဉှာသုတ္တံ

၃၁၅. ‘‘‘အရဟတ္တံ၊ အရဟတ္တ’န္တိ၊ အာဝုသော သာရိပုတ္တ၊ ဝုစ္စတိ. ကတမံ နု ခေါ၊ အာဝုသော၊ အရဟတ္တ’’န္တိ? ‘‘ယော ခေါ၊ အာဝုသော၊ ရာဂက္ခယော ဒေါသက္ခယော မောဟက္ခယော – ဣဒံ ဝုစ္စတိ အရဟတ္တ’’န္တိ. ‘‘အတ္ထိ ပနာဝုသော၊ မဂ္ဂေါ အတ္ထိ ပဋိပဒါ ဧတဿ အရဟတ္တဿ သစ္ဆိကိရိယာယာ’’တိ? ‘‘အတ္ထိ ခေါ၊ အာဝုသော၊ မဂ္ဂေါ အတ္ထိ ပဋိပဒါ ဧတဿ အရဟတ္တဿ သစ္ဆိကိရိယာယာ’’တိ. ‘‘ကတမော ပနာဝုသော၊ မဂ္ဂေါ ကတမာ ပဋိပဒါ ဧတဿ အရဟတ္တဿ သစ္ဆိကိရိယာယာ’’တိ? ‘‘အယမေဝ ခေါ၊ အာဝုသော၊ အရိယော အဋ္ဌင်္ဂိကော မဂ္ဂေါ ဧတဿ အရဟတ္တဿ သစ္ဆိကိရိယာယ၊ သေယျထိဒံ – သမ္မာဒိဋ္ဌိ သမ္မာသင်္ကပ္ပေါ သမ္မာဝါစာ သမ္မာကမ္မန္တော သမ္မာအာဇီဝေါ သမ္မာဝါယာမော သမ္မာသတိ သမ္မာသမာဓိ. အယံ ခေါ အာဝုသော၊ မဂ္ဂေါ၊ အယံ ပဋိပဒါ ဧတဿ အရဟတ္တဿ သစ္ဆိကိရိယာယာ’’တိ. ‘‘ဘဒ္ဒကော၊ အာဝုသော၊ မဂ္ဂေါ ဘဒ္ဒိကာ ပဋိပဒါ ဧတဿ အရဟတ္တဿ သစ္ဆိကိရိယာယ. အလဉ္စ ပနာဝုသော သာရိပုတ္တ၊ အပ္ပမာဒါယာ’’တိ. ဒုတိယံ.