၁၃. ဘဝပဉှာသုတ္တံ

၃၂၆. ‘‘‘ဘဝေါ၊ ဘဝေါ’တိ၊ အာဝုသော သာရိပုတ္တ၊ ဝုစ္စတိ. ကတမော နု ခေါ၊ အာဝုသော၊ ဘဝေါ’’တိ? ‘‘တယော မေ၊ အာဝုသော၊ ဘဝါ. ကာမဘဝေါ၊ ရူပဘဝေါ၊ အရူပဘဝေါ – ဣမေ ခေါ၊ အာဝုသော၊ တယော ဘဝါ’’တိ. ‘‘အတ္ထိ ပနာဝုသော၊ မဂ္ဂေါ အတ္ထိ ပဋိပဒါ၊ ဧတေသံ ဘဝါနံ ပရိညာယာ’’တိ? ‘‘အတ္ထိ ခေါ၊ အာဝုသော၊ မဂ္ဂေါ အတ္ထိ ပဋိပဒါ၊ ဧတေသံ ဘဝါနံ ပရိညာယာ’’တိ. ‘‘ကတမော၊ ပနာဝုသော၊ မဂ္ဂေါ ကတမာ ပဋိပဒါ၊ ဧတေသံ ဘဝါနံ ပရိညာယာ’’တိ? ‘‘အယမေဝ ခေါ၊ အာဝုသော၊ အရိယော အဋ္ဌင်္ဂိကော မဂ္ဂေါ၊ ဧတေသံ ဘဝါနံ ပရိညာယ၊ သေယျထိဒံ – သမ္မာဒိဋ္ဌိ သမ္မာသင်္ကပ္ပေါ သမ္မာဝါစာ သမ္မာကမ္မန္တော သမ္မာအာဇီဝေါ သမ္မာဝါယာမော သမ္မာသတိ သမ္မာသမာဓိ. အယံ ခေါ၊ အာဝုသော၊ မဂ္ဂေါ အယံ ပဋိပဒါ၊ ဧတေသံ ဘဝါနံ ပရိညာယာ’’တိ. ‘‘ဘဒ္ဒကော၊ အာဝုသော၊ မဂ္ဂေါ ဘဒ္ဒိကာ ပဋိပဒါ၊ ဧတေသံ ဘဝါနံ ပရိညာယ. အလဉ္စ ပနာဝုသော သာရိပုတ္တ၊ အပ္ပမာဒါယာ’’တိ. တေရသမံ.