၁၁. ဩဃပဉှာသုတ္တံ

၃၂၄. ‘‘‘ဩဃော၊ ဩဃော’တိ၊ အာဝုသော သာရိပုတ္တ၊ ဝုစ္စတိ. ကတမော နု ခေါ၊ အာဝုသော၊ ဩဃော’’တိ? ‘‘စတ္တာရောမေ၊ အာဝုသော၊ ဩဃာ. ကာမောဃော၊ ဘဝေါဃော၊ ဒိဋ္ဌောဃော၊ အဝိဇ္ဇောဃော – ဣမေ ခေါ၊ အာဝုသော၊ စတ္တာရော ဩဃာ’’တိ. ‘‘အတ္ထိ ပနာဝုသော၊ မဂ္ဂေါ အတ္ထိ ပဋိပဒါ၊ ဧတေသံ ဩဃာနံ ပဟာနာယာ’’တိ? ‘‘အတ္ထိ ခေါ၊ အာဝုသော၊ မဂ္ဂေါ အတ္ထိ ပဋိပဒါ၊ ဧတေသံ ဩဃာနံ ပဟာနာယာ’’တိ. ‘‘ကတမော ပနာဝုသော၊ မဂ္ဂေါ ကတမာ ပဋိပဒါ၊ ဧတေသံ ဩဃာနံ ပဟာနာယာ’’တိ? ‘‘အယမေဝ ခေါ၊ အာဝုသော၊ အရိယော အဋ္ဌင်္ဂိကော မဂ္ဂေါ၊ ဧတေသံ ဩဃာနံ ပဟာနာယ၊ သေယျထိဒံ – သမ္မာဒိဋ္ဌိ သမ္မာသင်္ကပ္ပေါ သမ္မာဝါစာ သမ္မာကမ္မန္တော သမ္မာအာဇီဝေါ သမ္မာဝါယာမော သမ္မာသတိ သမ္မာသမာဓိ. အယံ ခေါ၊ အာဝုသော၊ မဂ္ဂေါ အယံ ပဋိပဒါ၊ ဧတေသံ ဩဃာနံ ပဟာနာယာ’’တိ. ‘‘ဘဒ္ဒကော၊ အာဝုသော၊ မဂ္ဂေါ ဘဒ္ဒိကာ ပဋိပဒါ၊ ဧတေသံ ဩဃာနံ ပဟာနာယ. အလဉ္စ ပနာဝုသော သာရိပုတ္တ၊ အပ္ပမာဒါယာ’’တိ. ဧကာဒသမံ.