၁၀. ဝဍ္ဎီသုတ္တံ

၃၁၃. ‘‘ပဉ္စဟိ၊ ဘိက္ခဝေ၊ ဝဍ္ဎီဟိ ဝဍ္ဎမာနာ အရိယသာဝိကာ အရိယာယ ဝဍ္ဎိယာ ဝဍ္ဎတိ သာရာဒါယိနီ စ ဟောတိ ဝရာဒါယိနီ စ ကာယဿ. ကတမေဟိ ပဉ္စဟိ? သဒ္ဓါယ ဝဍ္ဎတိ၊ သီလေန ဝဍ္ဎတိ၊ သုတေန ဝဍ္ဎတိ၊ စာဂေန ဝဍ္ဎတိ၊ ပညာယ ဝဍ္ဎတိ – ဣမေဟိ ခေါ၊ ဘိက္ခဝေ၊ ပဉ္စဟိ ဝဍ္ဎီဟိ ဝဍ္ဎမာနာ အရိယသာဝိကာ အရိယာယ ဝဍ္ဎိယာ ဝဍ္ဎတိ၊ သာရာဒါယိနီ စ ဟောတိ၊ ဝရာဒါယိနီ စ ကာယဿာ’’တိ.

‘‘သဒ္ဓါယ သီလေန စ ယာဓ ဝဍ္ဎတိ၊

ပညာယ စာဂေန သုတေန စူဘယံ၊

သာ တာဒိသီ သီလဝတီ ဥပါသိကာ၊

အာဒီယတိ သာရမိဓေဝ အတ္တနော’’တိ. ဒသမံ၊

ဗလဝဂ္ဂေါ တတိယော.

တဿုဒ္ဒါနံ –

ဝိသာရဒါ ပသယှ အဘိဘုယျ၊ ဧကံ အင်္ဂေန ပဉ္စမံ၊

နာသေန္တိ ဟေတု ဌာနဉ္စ၊ ဝိသာရဒေါ ဝဍ္ဎိနာ ဒသာတိ.

မာတုဂါမသံယုတ္တံ သမတ္တံ.