၃. အာဝေဏိကဒုက္ခသုတ္တံ

၂၈၂. ‘‘ပဉ္စိမာနိ၊ ဘိက္ခဝေ၊ မာတုဂါမဿ အာဝေဏိကာနိ ဒုက္ခာနိ၊ ယာနိ မာတုဂါမော ပစ္စနုဘောတိ၊ အညတြေဝ ပုရိသေဟိ. ကတမာနိ ပဉ္စ? ဣဓ၊ ဘိက္ခဝေ၊ မာတုဂါမော ဒဟရောဝ သမာနော ပတိကုလံ ဂစ္ဆတိ၊ ဉာတကေဟိ ဝိနာ ဟောတိ. ဣဒံ၊ ဘိက္ခဝေ၊ မာတုဂါမဿ ပဌမံ အာဝေဏိကံ ဒုက္ခံ၊ ယံ မာတုဂါမော ပစ္စနုဘောတိ၊ အညတြေဝ ပုရိသေဟိ. ပုန စပရံ၊ ဘိက္ခဝေ၊ မာတုဂါမော ဥတုနီ ဟောတိ. ဣဒံ၊ ဘိက္ခဝေ၊ မာတုဂါမဿ ဒုတိယံ အာဝေဏိကံ ဒုက္ခံ၊ ယံ မာတုဂါမော ပစ္စနုဘောတိ၊ အညတြေဝ ပုရိသေဟိ. ပုန စပရံ၊ ဘိက္ခဝေ၊ မာတုဂါမော ဂဗ္ဘိနီ ဟောတိ. ဣဒံ၊ ဘိက္ခဝေ၊ မာတုဂါမဿ တတိယံ အာဝေဏိကံ ဒုက္ခံ၊ ယံ မာတုဂါမော ပစ္စနုဘောတိ၊ အညတြေဝ ပုရိသေဟိ. ပုန စပရံ၊ ဘိက္ခဝေ၊ မာတုဂါမော ဝိဇာယတိ. ဣဒံ၊ ဘိက္ခဝေ၊ မာတုဂါမဿ စတုတ္ထံ အာဝေဏိကံ ဒုက္ခံ၊ ယံ မာတုဂါမော ပစ္စနုဘောတိ၊ အညတြေဝ ပုရိသေဟိ. ပုန စပရံ၊ ဘိက္ခဝေ၊ မာတုဂါမော ပုရိသဿ ပါရိစရိယံ ဥပေတိ. ဣဒံ ခေါ၊ ဘိက္ခဝေ၊ မာတုဂါမဿ ပဉ္စမံ အာဝေဏိကံ ဒုက္ခံ၊ ယံ မာတုဂါမော ပစ္စနုဘောတိ၊ အညတြေဝ ပုရိသေဟိ. ဣမာနိ ခေါ၊ ဘိက္ခဝေ၊ ပဉ္စ မာတုဂါမဿ အာဝေဏိကာနိ ဒုက္ခာနိ၊ ယာနိ မာတုဂါမော ပစ္စနုဘောတိ၊ အညတြေဝ ပုရိသေဟီ’’တိ. တတိယံ.