၁၄. ပဉ္စဝေရသုတ္တံ

၂၉၃. ‘‘ပဉ္စဟိ၊ အနုရုဒ္ဓ၊ ဓမ္မေဟိ သမန္နာဂတော မာတုဂါမော။ပေ။ နိရယံ ဥပပဇ္ဇတိ. ကတမေဟိ ပဉ္စဟိ? ပါဏာတိပါတီ စ ဟောတိ၊ အဒိန္နာဒါယီ စ ဟောတိ၊ ကာမေသုမိစ္ဆာစာရီ စ ဟောတိ၊ မုသာဝါဒီ စ ဟောတိ၊ သုရာမေရယမဇ္ဇပ္ပမာဒဋ္ဌာယီ စ ဟောတိ – ဣမေဟိ ခေါ၊ အနုရုဒ္ဓ၊ ပဉ္စဟိ ဓမ္မေဟိ သမန္နာဂတော မာတုဂါမော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတီ’’တိ. စုဒ္ဒသမံ.

ပဌမပေယျာလဝဂ္ဂေါ.

တဿုဒ္ဒါနံ –

မာတုဂါမော ပုရိသော စ၊ အာဝေဏိကာ တိဓမ္မော စ [ဒွေ မနာပါမနာပါစ၊ အာဝေဏိကာ တီဟိ အနုရုဒ္ဓေါ (သဗ္ဗတ္ထ)]၊

ကောဓနော ဥပနာဟီ စ၊ ဣဿုကီ မစ္ဆရေန စ၊

အတိစာရီ စ ဒုဿီလော၊ အပ္ပဿုတော စ ကုသီတော၊

မုဋ္ဌဿတိ ပဉ္စဝေရံ၊ ကဏှပက္ခေ ပကာသိတော.