၅. တတိယသာရိပုတ္တကောဋ္ဌိကသုတ္တံ

၄၁၄. ဧကံ သမယံ အာယသ္မာ စ သာရိပုတ္တော၊ အာယသ္မာ စ မဟာကောဋ္ဌိကော ဗာရာဏသိယံ ဝိဟရန္တိ ဣသိပတနေ မိဂဒါယေ။ပေ။ (သာယေဝ ပုစ္ဆာ) ‘‘ကော နု ခေါ၊ အာဝုသော၊ ဟေတု ကော ပစ္စယော၊ ယေနေတံ အဗျာကတံ ဘဂဝတာ’’တိ? ‘‘ရူပေ ခေါ၊ အာဝုသော၊ အဝိဂတရာဂဿ အဝိဂတစ္ဆန္ဒဿ အဝိဂတပေမဿ အဝိဂတပိပါသဿ အဝိဂတပရိဠာဟဿ အဝိဂတတဏှဿ ‘ဟောတိ တထာဂတော ပရံ မရဏာ’တိပိဿ ဟောတိ။ပေ။ ‘နေဝ ဟောတိ န န ဟောတိ တထာဂတော ပရံ မရဏာ’တိပိဿ ဟောတိ. ဝေဒနာယ။ပေ။ သညာယ။ပေ။ သင်္ခါရေသု။ပေ။ ဝိညာဏေ အဝိဂတရာဂဿ အဝိဂတစ္ဆန္ဒဿ အဝိဂတပေမဿ အဝိဂတပိပါသဿ အဝိဂတပရိဠာဟဿ အဝိဂတတဏှဿ ‘ဟောတိ တထာဂတော ပရံ မရဏာ’တိပိဿ ဟောတိ။ပေ။ ‘နေဝ ဟောတိ န န ဟောတိ တထာဂတော ပရံ မရဏာ’တိပိဿ ဟောတိ. ရူပေ စ ခေါ၊ အာဝုသော၊ ဝိဂတရာဂဿ။ပေ။ ဝေဒနာယ။ပေ။ သညာယ။ပေ။ သင်္ခါရေသု။ပေ။ ဝိညာဏေ ဝိဂတရာဂဿ ဝိဂတစ္ဆန္ဒဿ ဝိဂတပေမဿ ဝိဂတပိပါသဿ ဝိဂတပရိဠာဟဿ ဝိဂတတဏှဿ ‘ဟောတိ တထာဂတော ပရံ မရဏာ’တိပိဿ န ဟောတိ။ပေ။ ‘နေဝ ဟောတိ န န ဟောတိ တထာဂတော ပရံ မရဏာ’တိပိဿ န ဟောတိ. အယံ ခေါ၊ အာဝုသော၊ ဟေတု၊ အယံ ပစ္စယော၊ ယေနေတံ အဗျာကတံ ဘဂဝတာ’’တိ. ပဉ္စမံ.