၉. ပဌမဒွယသုတ္တံ

၉၂. ‘‘ဒွယံ ဝေါ၊ ဘိက္ခဝေ၊ ဒေသေဿာမိ. တံ သုဏာထ. ကိဉ္စ၊ ဘိက္ခဝေ၊ ဒွယံ? စက္ခုဉ္စေဝ ရူပါ စ၊ သောတဉ္စေဝ သဒ္ဒါ စ၊ ဃာနဉ္စေဝ ဂန္ဓာ စ၊ ဇိဝှါ စေဝ ရသာ စ၊ ကာယော စေဝ ဖောဋ္ဌဗ္ဗာ စ၊ မနော စေဝ ဓမ္မာ စ – ဣဒံ ဝုစ္စတိ၊ ဘိက္ခဝေ၊ ဒွယံ.

‘‘ယော၊ ဘိက္ခဝေ၊ ဧဝံ ဝဒေယျ – ‘အဟမေတံ ဒွယံ ပစ္စက္ခာယ အညံ ဒွယံ ပညပေဿာမီ’တိ၊ တဿ ဝါစာဝတ္ထုကမေဝဿ. ပုဋ္ဌော စ န သမ္ပာယေယျ. ဥတ္တရိဉ္စ ဝိဃာတံ အာပဇ္ဇေယျ. တံ ကိဿ ဟေတု? ယထာ တံ၊ ဘိက္ခဝေ၊ အဝိသယသ္မိ’’န္တိ. နဝမံ.