၇. ပဌမာဘိနန္ဒသုတ္တံ

၁၉. ‘‘ယော၊ ဘိက္ခဝေ၊ စက္ခုံ အဘိနန္ဒတိ၊ ဒုက္ခံ သော အဘိနန္ဒတိ. ယော ဒုက္ခံ အဘိနန္ဒတိ၊ အပရိမုတ္တော သော ဒုက္ခသ္မာတိ ဝဒါမိ. ယော သောတံ။ပေ။ ယော ဃာနံ။ပေ။ ယော ဇိဝှံ အဘိနန္ဒတိ၊ ဒုက္ခံ သော အဘိနန္ဒတိ. ယော ဒုက္ခံ အဘိနန္ဒတိ၊ အပရိမုတ္တော သော ဒုက္ခသ္မာတိ ဝဒါမိ. ယော ကာယံ။ပေ။ ယော မနံ အဘိနန္ဒတိ၊ ဒုက္ခံ သော အဘိနန္ဒတိ. ယော ဒုက္ခံ အဘိနန္ဒတိ၊ အပရိမုတ္တော သော ဒုက္ခသ္မာ’’တိ ဝဒါမိ.

‘‘ယော စ ခေါ၊ ဘိက္ခဝေ၊ စက္ခုံ နာဘိနန္ဒတိ၊ ဒုက္ခံ သော နာဘိနန္ဒတိ. ယော ဒုက္ခံ နာဘိနန္ဒတိ၊ ပရိမုတ္တော သော ဒုက္ခသ္မာတိ ဝဒါမိ. ယော သောတံ။ပေ။ ယော ဃာနံ။ပေ။ ယော ဇိဝှံ နာဘိနန္ဒတိ၊ ဒုက္ခံ သော နာဘိနန္ဒတိ. ယော ဒုက္ခံ နာဘိနန္ဒတိ၊ ပရိမုတ္တော သော ဒုက္ခသ္မာတိ ဝဒါမိ. ယော ကာယံ။ပေ။ ယော မနံ နာဘိနန္ဒတိ၊ ဒုက္ခံ သော နာဘိနန္ဒတိ. ယော ဒုက္ခံ နာဘိနန္ဒတိ၊ ပရိမုတ္တော သော ဒုက္ခသ္မာ’’တိ ဝဒါမိ. သတ္တမံ.