၁. အဇ္ဈတ္တနန္ဒိက္ခယသုတ္တံ

၁၅၆. ‘‘အနိစ္စံယေဝ၊ ဘိက္ခဝေ၊ ဘိက္ခု စက္ခုံ အနိစ္စန္တိ ပဿတိ၊ သာဿ [သာယံ (ပီ. က.)] ဟောတိ သမ္မာဒိဋ္ဌိ. သမ္မာ ပဿံ နိဗ္ဗိန္ဒတိ. နန္ဒိက္ခယာ ရာဂက္ခယော၊ ရာဂက္ခယာ နန္ဒိက္ခယော. နန္ဒိရာဂက္ခယာ စိတ္တံ သုဝိမုတ္တန္တိ ဝုစ္စတိ။ပေ။ အနိစ္စံယေဝ၊ ဘိက္ခဝေ၊ ဘိက္ခု ဇိဝှံ အနိစ္စန္တိ ပဿတိ၊ သာဿ ဟောတိ သမ္မာဒိဋ္ဌိ. သမ္မာ ပဿံ နိဗ္ဗိန္ဒတိ. နန္ဒိက္ခယာ ရာဂက္ခယော၊ ရာဂက္ခယာ။ပေ။ စိတ္တံ သုဝိမုတ္တန္တိ ဝုစ္စတိ။ပေ။ အနိစ္စံယေဝ၊ ဘိက္ခဝေ၊ ဘိက္ခု မနံ အနိစ္စန္တိ ပဿတိ၊ သာဿ ဟောတိ သမ္မာဒိဋ္ဌိ. သမ္မာ ပဿံ နိဗ္ဗိန္ဒတိ. နန္ဒိက္ခယာ ရာဂက္ခယော၊ ရာဂက္ခယာ နန္ဒိက္ခယော. နန္ဒိရာဂက္ခယာ စိတ္တံ သုဝိမုတ္တန္တိ ဝုစ္စတီ’’တိ. ပဌမံ.