၇-၁၆. အဏ္ဍဇဒါနူပကာရသုတ္တဒသကံ

၃၉၈-၄၀၇. သာဝတ္ထိနိဒါနံ. ဧကမန္တံ နိသိန္နော ခေါ သော ဘိက္ခု ဘဂဝန္တံ ဧတဒဝေါစ – ‘‘ကော နု ခေါ၊ ဘန္တေ၊ ဟေတု၊ ကော ပစ္စယော၊ ယေန မိဓေကစ္စော ကာယဿ ဘေဒါ ပရံ မရဏာ အဏ္ဍဇာနံ သုပဏ္ဏာနံ သဟဗျတံ ဥပပဇ္ဇတီ’’တိ? ‘‘ဣဓ၊ ဘိက္ခု၊ ဧကစ္စော ကာယေန ဒွယကာရီ ဟောတိ၊ ဝါစာယ ဒွယကာရီ၊ မနသာ ဒွယကာရီ. တဿ သုတံ ဟောတိ – ‘အဏ္ဍဇာ သုပဏ္ဏာ ဒီဃာယုကာ ဝဏ္ဏဝန္တော သုခဗဟုလာ’တိ. တဿ ဧဝံ ဟောတိ – ‘အဟော ဝတာဟံ ကာယဿ ဘေဒါ ပရံ မရဏာ အဏ္ဍဇာနံ သုပဏ္ဏာနံ သဟဗျတံ ဥပပဇ္ဇေယျ’န္တိ. သော အန္နံ ဒေတိ။ပေ။ ပါနံ ဒေတိ။ ဝတ္ထံ ဒေတိ။ ယာနံ ဒေတိ။ မာလံ ဒေတိ။ ဂန္ဓံ ဒေတိ။ ဝိလေပနံ ဒေတိ။ သေယျံ ဒေတိ။ အာဝသထံ ဒေတိ။ ပဒီပေယျံ ဒေတိ. သော ကာယဿ ဘေဒါ ပရံ မရဏာ အဏ္ဍဇာနံ သုပဏ္ဏာနံ သဟဗျတံ ဥပပဇ္ဇတိ. အယံ ခေါ၊ ဘိက္ခု၊ ဟေတု၊ အယံ ပစ္စယော၊ ယေန မိဓေကစ္စော ကာယဿ ဘေဒါ ပရံ မရဏာ အဏ္ဍဇာနံ သုပဏ္ဏာနံ သဟဗျတံ ဥပပဇ္ဇတီ’’တိ. သောဠသမံ.