၂. ပဏီတတရသုတ္တံ

၃၄၃. သာဝတ္ထိနိဒါနံ. ‘‘စတဿော ဣမာ၊ ဘိက္ခဝေ၊ နာဂယောနိယော. ကတမာ စတဿော? အဏ္ဍဇာ နာဂါ၊ ဇလာဗုဇာ နာဂါ၊ သံသေဒဇာ နာဂါ၊ ဩပပါတိကာ နာဂါ. တတြ၊ ဘိက္ခဝေ၊ အဏ္ဍဇေဟိ နာဂေဟိ ဇလာဗုဇာ စ သံသေဒဇာ စ ဩပပါတိကာ စ နာဂါ ပဏီတတရာ. တတြ၊ ဘိက္ခဝေ၊ အဏ္ဍဇေဟိ စ ဇလာဗုဇေဟိ စ နာဂေဟိ သံသေဒဇာ စ ဩပပါတိကာ စ နာဂါ ပဏီတတရာ. တတြ၊ ဘိက္ခဝေ၊ အဏ္ဍဇေဟိ စ ဇလာဗုဇေဟိ စ သံသေဒဇေဟိ စ နာဂေဟိ ဩပပါတိကာ နာဂါ ပဏီတတရာ. ဣမာ ခေါ၊ ဘိက္ခဝေ၊ စတဿော နာဂယောနိယော’’တိ. ဒုတိယံ.