၁၂. နိရောဓဓမ္မသုတ္တံ

၂၀၅. သာဝတ္ထိနိဒါနံ. ဧကမန္တံ နိသိန္နံ ခေါ အာယသ္မန္တံ ရာဓံ ဘဂဝါ ဧတဒဝေါစ – ‘‘ယော ခေါ၊ ရာဓ၊ နိရောဓဓမ္မော၊ တတြ တေ ဆန္ဒော ပဟာတဗ္ဗော၊ ရာဂေါ ပဟာတဗ္ဗော၊ ဆန္ဒရာဂေါ ပဟာတဗ္ဗော. ကော စ၊ ရာဓ၊ နိရောဓဓမ္မော? ရူပံ ခေါ၊ ရာဓ၊ နိရောဓဓမ္မော၊ တတြ တေ ဆန္ဒော ပဟာတဗ္ဗော၊ ရာဂေါ ပဟာတဗ္ဗော၊ ဆန္ဒရာဂေါ ပဟာတဗ္ဗော. ဝေဒနာ။ပေ။ သညာ။ပေ။ သင်္ခါရာ။ပေ။ ဝိညာဏံ နိရောဓဓမ္မော၊ တတြ တေ ဆန္ဒော ပဟာတဗ္ဗော၊ ရာဂေါ ပဟာတဗ္ဗော၊ ဆန္ဒရာဂေါ ပဟာတဗ္ဗော. ယော ခေါ၊ ရာဓ၊ နိရောဓဓမ္မော၊ တတြ တေ ဆန္ဒော ပဟာတဗ္ဗော၊ ရာဂေါ ပဟာတဗ္ဗော၊ ဆန္ဒရာဂေါ ပဟာတဗ္ဗော’’တိ.

ဥပနိသိန္နဝဂ္ဂေါ စတုတ္ထော.

တဿုဒ္ဒါနံ –

မာရော စ မာရဓမ္မော စ၊ အနိစ္စေန အပရေ ဒုဝေ၊

ဒုက္ခေန စ ဒုဝေ ဝုတ္တာ၊ အနတ္တေန တထေဝ စ၊

ခယဝယသမုဒယံ၊ နိရောဓဓမ္မေန ဒွါဒသာတိ.

ရာဓသံယုတ္တံ သမတ္တံ.