၁၂. နိရောဓဓမ္မသုတ္တံ

၁၉၃. သာဝတ္ထိနိဒါနံ. ဧကမန္တံ နိသိန္နော ခေါ အာယသ္မာ ရာဓော ဘဂဝန္တံ ဧတဒဝေါစ – ‘‘သာဓု မေ၊ ဘန္တေ၊ ဘဂဝါ သံခိတ္တေန ဓမ္မံ ဒေသေတု၊ ယမဟံ ဘဂဝတော ဓမ္မံ သုတွာ ဧကော ဝူပကဋ္ဌော အပ္ပမတ္တော အာတာပီ ပဟိတတ္တော ဝိဟရေယျ’’န္တိ.

‘‘ယော ခေါ၊ ရာဓ၊ နိရောဓဓမ္မော၊ တတြ တေ ဆန္ဒော ပဟာတဗ္ဗော၊ ရာဂေါ ပဟာတဗ္ဗော၊ ဆန္ဒရာဂေါ ပဟာတဗ္ဗော. ကော စ၊ ရာဓ၊ နိရောဓဓမ္မော? ရူပံ ခေါ၊ ရာဓ၊ နိရောဓဓမ္မော၊ တတြ တေ ဆန္ဒော ပဟာတဗ္ဗော။ပေ။ ဝေဒနာ နိရောဓဓမ္မော၊ တတြ တေ ဆန္ဒော ပဟာတဗ္ဗော။ပေ။ သညာ နိရောဓဓမ္မော၊ တတြ တေ ဆန္ဒော ပဟာတဗ္ဗော။ပေ။ သင်္ခါရာ နိရောဓဓမ္မော၊ တတြ တေ ဆန္ဒော ပဟာတဗ္ဗော။ပေ။ ဝိညာဏံ နိရောဓဓမ္မော၊ တတြ တေ ဆန္ဒော ပဟာတဗ္ဗော။ပေ။ ယော ခေါ၊ ရာဓ၊ နိရောဓဓမ္မော၊ တတြ တေ ဆန္ဒော ပဟာတဗ္ဗော၊ ရာဂေါ ပဟာတဗ္ဗော၊ ဆန္ဒရာဂေါ ပဟာတဗ္ဗော’’တိ [သီဟဠပေါတ္ထကေ ပန ဣမသ္မိံ ဝဂ္ဂေ ဆတ္တိံသ သုတ္တာနိ ဝိဘတ္တာနိ ဧကေကံ သုတ္တံ တီဏိ တီဏိ ကတွာ၊ ဧဝံ စတုတ္ထဝဂ္ဂေပိ].

အာယာစနဝဂ္ဂေါ တတိယော.

တဿုဒ္ဒါနံ –

မာရော စ မာရဓမ္မော စ၊ အနိစ္စေန အပရေ ဒုဝေ၊

ဒုက္ခေန စ ဒုဝေ ဝုတ္တာ၊ အနတ္တေန တထေဝ စ၊

ခယဝယသမုဒယံ၊ နိရောဓဓမ္မေန ဒွါဒသာတိ.