၄၆-၄၉. ဂေါစရမူလကအဘိနီဟာရသုတ္တာဒိစတုက္ကံ

၇၀၇. သာဝတ္ထိနိဒါနံ။ ‘‘သမာဓိသ္မိံ ဂေါစရကုသလော ဟောတိ၊ န သမာဓိသ္မိံ အဘိနီဟာရကုသလော။ သမာဓိသ္မိံ အဘိနီဟာရကုသလော ဟောတိ၊ န သမာဓိသ္မိံ ဂေါစရကုသလော။ နေဝ သမာဓိသ္မိံ ဂေါစရကုသလော ဟောတိ၊ န စ သမာဓိသ္မိံ အဘိနီဟာရကုသလော။ သမာဓိသ္မိံ ဂေါစရကုသလော စ ဟောတိ၊ သမာဓိသ္မိံ အဘိနီဟာရကုသလော စ။ သေယျထာပိ၊ ဘိက္ခဝေ၊ ဂဝါ ခီရံ၊ ခီရမှာ ဒဓိ၊ ဒဓိမှာ နဝနီတံ၊ နဝနီတမှာ သပ္ပိ၊ သပ္ပိမှာ သပ္ပိမဏ္ဍော တတြ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယွာယံ ဈာယီ သမာဓိသ္မိံ ဂေါစရကုသလော စ ဟောတိ သမာဓိသ္မိံ အဘိနီဟာရကုသလော စ အယံ ဣမေသံ စတုန္နံ ဈာယီနံ။ပေ။ ဥတ္တမော စ ပဝရော စာ’’တိ. ဆစတ္တာလီသမံ.

၇၀၈. သမာဓိသ္မိံ ဂေါစရကုသလော ဟောတိ၊ န သမာဓိသ္မိံ သက္ကစ္စကာရီ။ပေ။. ဝိတ္ထာရေတဗ္ဗံ. သတ္တစတ္တာလီသမံ.

၇၀၉. သမာဓိသ္မိံ ဂေါစရကုသလော ဟောတိ၊ န သမာဓိသ္မိံ သာတစ္စကာရီ။ပေ။. အဋ္ဌစတ္တာလီသမံ.

၇၁၀. သမာဓိသ္မိံ ဂေါစရကုသလော ဟောတိ၊ န သမာဓိသ္မိံ သပ္ပါယကာရီ။ပေ။. ဧကူနပညာသမံ. (ဂေါစရမူလကံ.)