၁၇. သမာပတ္တိမူလကသက္ကစ္စသုတ္တံ

၆၇၈. သာဝတ္ထိနိဒါနံ. ‘‘စတ္တာရောမေ၊ ဘိက္ခဝေ၊ ဈာယီ. ကတမေ စတ္တာရော? ဣဓ၊ ဘိက္ခဝေ၊ ဧကစ္စော ဈာယီ သမာဓိသ္မိံ သမာပတ္တိကုသလော ဟောတိ၊ န သမာဓိသ္မိံ သက္ကစ္စကာရီ. ဣဓ ပန၊ ဘိက္ခဝေ၊ ဧကစ္စော ဈာယီ သမာဓိသ္မိံ သက္ကစ္စကာရီ ဟောတိ၊ န သမာဓိသ္မိံ သမာပတ္တိကုသလော. ဣဓ ပန၊ ဘိက္ခဝေ၊ ဧကစ္စော ဈာယီ နေဝ သမာဓိသ္မိံ သမာပတ္တိကုသလော ဟောတိ၊ န စ သမာဓိသ္မိံ သက္ကစ္စကာရီ. ဣဓ ပန၊ ဘိက္ခဝေ၊ ဧကစ္စော ဈာယီ သမာဓိသ္မိံ သမာပတ္တိကုသလော စ ဟောတိ၊ သမာဓိသ္မိံ သက္ကစ္စကာရီ စ. တတြ။ပေ။ ပဝရော စာ’’တိ. သတ္တရသမံ.